“کڵۆڵی” عێراق پاش 20 ساڵ بەسەر ڕووخانی سەدام.. ئاوات ئەسعەدی

20 ساڵ بەر لە ئیستە پاش جەنگی ئەمریکاو هاوپەیمانان، لە بەرەبەیانی رۆژی 9 ی نیسانی 2003 لیوای 2 ی فیرقەی 3 ی پیادەی لەشکری ئەمریکا دەستیان بەسەر پێگە سەرەکییەکانی پایتەختی عێڕاقا گرت و داگیریان کرد، لەوانە وەزارەتی نەوت، بارەگای سەرەکی ئاساییش و زانکۆی شارەکە. نزیک 6 ی ئیوارەی ئەو رۆژە مێژووییە سەربازێکی ئەمریکایی لە بەردەم هۆتێلی فەلەستین لە گۆڕەپانی فیرداوسدا سەرکەوتە سەر پەیکەرە گەورەکەی سەدام حوسێن وەک ئەوەی مزگێنی کۆتاییهێنانی حوکمی رەشی ئەو دیکتاتۆرە بەجیهان رابگەیەنێ، پەیکەرەکەی داپۆشی، لە سەرەتادا بە ئاڵای ئەمریکا، دواتر بە ئاڵای عێراق؛ پاشان ئەو پەیکەرە گەورەیە بە هۆی زرێپۆشێکی چیایی M88 سوپای ئەمریکا هێنرایە خوارەوە.
ئەم دیمەنە لە زۆربەی کەنالە تەلەفزۆنیە جیهانیەکانا راستەوخۆ پیشان درا. بووە هێمایەکی زۆر گرنگ و پڕواتا لە بۆ روخانی یەکێک لە دڕندەترین رژێمەکانی ناوچەکەو مێژووی تازەی جیهان.
پێم وایە زۆرینەی گەلانی ستەم ستەمدیدەی عێراق هەرگیز خەونیان بە رۆژێکی واوە نەئەدی، کە زلهێزێکی جیهان بە خوێنی سەربازانی خۆی، ئەو رژێمە خوێناوییەیان بەو ئاسانیە لە کۆڵبکاتەوە.
ئەمڕۆ ئەو رۆژە مێژووییە، وەک رزگاریی ئەو وڵاتەو قوتاربوونی لەو دەسەڵاتە تاریکە تەماشا ناکرێت.
هەڵەش نیە گەر بڵێێن: کەس بیری ئەو رۆژە گرنگەی نەماوە!
هۆکاری ئەمەش شاراوە نیە لای کەس: جێگرەوەی ئەو رژێمە دڕندەیە، ئەگەرچی بە “پرۆسەیەکی نیمچە دیموکراتیانەش خاوەنی جۆرە شەرعیەتێک بن”، بە رەفتاری نالەبارو خراپیان، بە سیاسەتی هەمیشە شکستخواردەیان، “وڵاتیان” گەیاندوەتە باڕێکی زۆر کۆڵەوار. زۆریش بە داخەوە کەسانێکی زۆری چینە جیاوازەکانی کۆمەڵگەکانی عێراق، لە نەزانی بێت، لە بێئاگایی بێت، بە هوشیاری بێت، یان بە ناهوشیاری، زۆر دەمێکە “رەحمەت ئەنێرێن” بۆ سەددام حوسێنی وێرانکارو خوێنرێژی ئەو وڵاتە.
لەمەش تاڵتر ئەوەیە، کە رێک بیست ساڵ لە رۆژی یادەوەری روخانی دیکتاتۆریەتدا، هەڵبژاردەی تیپی فوتبالی عێراق، نەک لە وڵاتێکی بێلاینا یان لە ئەمریکا و لەگەڵ تیپی ئەو وڵاتەیا یاریەکی دۆستانە ئەنجام ئەدات، بەڵکو لەگەڵ هەڵبژاردەی تیپی تەریکراوی روسیای شەرخواز لە شاری سانت پیتەرسبۆرگ.
ئەمەش ئەگەر نیشانەی شتێک بێت، ئەوا تەنیا بودەڵەیی و سەرلێشێواوی و سوکێتیی سیاسەتمەدارانی عێراقی دوای سەددامەو هیچیتر.
وڵاتێک هێندە “نەزانانە” نزیکی وڵاتێکی دیکتاتۆری و بوخزێنراو بکەوێتەوە، کە هاوشێوەی رژێمە شەڕئەنگیزەکەی سەدام بێت، هیچ کەمتەرخەمیەکی نەبێت، لە جەنگە وێرانکاریەکانیدا لەگەڵ هاوسێیانیی، ئەوا “سیاسەتمەدارانی” ئەو دەوڵەتە شایستەی هیچ رێز و سەروەریەک نین.
کورد جوانی وتووە: “تەیری گول عاشق بە داری ژەقنەبووتە.”

ئەو وێنەیەی سەروە هی ئاژانسی AP یە.

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.