ونبوون لەناو یەکتردا.. شیعری: ستیڤان شەمزینی
ئازیز گیان
با بە دوای خۆماندا بگەڕێین
بۆی هەیە وەک دوو دێڕی نامۆ
چۆڕابینە ناو باوڵی بیرەوەرییەوە
بۆی هەیە وەک دوو ئەسرینی زەرد
لە چاوی هەتاوەوە رژا بین
رەنگە ئێستا بەهار
بەدەستوخەتی سەوزی خۆی
ناومان لە لیستی شکۆفەدا بسڕێتەوە
لەوانەشە پایز
بە گۆچانی زەردی دەستییەوە
بە پاندانێکی ئاڵتوونی
واژۆی وەرینمان بکات
ئێمە دەبێت خۆمان بناسێنین
خەڵکی ئەم مەملەکەتە
بێز لە غەوارە دەکەنەوە
دەبێت بە ریتمێکی لەسەرخۆ
پێیان بڵێین
ئێمە دوو ون بووین
شوێنەواری زامی برینێکی بێدەنگ و
دوو شەپۆلی دەست بەستراوین
دوو کاتژمێری لەکار کەوتووین
نازانین هەنووکە سەعات چەندە
بە کاتی خۆشەویستی
نازانین نهۆ مانگی چەندە
لە ساڵی قاتوقڕی زەردەخەنە؟!!
ئێمە دوو رێبواری تینووین
نازانین ملی رێمان بۆ کوێ گرتۆتەبەر
نازانین لەسەر چ ئەتڵەسێک
نیشتمانی ئاو بدۆزینەوە؟!
دوو ئاسکەکێوی هەڵاتووین
لە خێڵی ئافات
بەدوای کتێبێکی گەشبیندا دەگەڕێین
نازانین لە باستیلی کام کتێبخانەدا
کۆت و زنجیر لە ملی کراوە؟!
دوو چۆلەکەی نەخوێندەوارین
ناتوانین پەڕاوی خۆشبەختی و
رووخساری ئارامیی بخوێنینەوە
دوو پەڕەسێلکەین
تووشی ئەلزەهایمەر بووین
فڕینمان بیر چۆتەوە
بیرمان نایەتەوە ئەوە کێ بوو
یەکەم جار ژەهری کردە
شەربەتی گۆرانییە شادومانەکەمانەوە؟!
بەبیرمان نایەتەوە
لە خەونی کام ئاسماندا وێڵ بووین
لەکام شاری بێکەسدا گیرساوینەتەوە؟
دوو قەڵەمی سەرکزین
پێکەنینمان پێوە نایەت
لەوەتی فاممان کردۆتەوە
دەستی رەشی چارەنووس
تەنیاییمان پێ دەنووسێتەوە
دوو رووباری وڵاتێکی ونین
بەلەمی شکست پێماندا تێدەپەڕێت
ناو جەرگمان تەژیە
لەو ماسییە بێزارانەی
خەتمی کوێرەوەرییان کردووە
کاتێکیش
دەست لە ملی یەکتر دەکەین
نابینە دەریا، پێناکەنین
ئاه غەریبی قووتمان دەدا
دوو گەدای مەملەکەتی برینین
رۆژێک نەگبەتی مارەمان دەکات
رۆژێکی تر ژیان تەلاقمان دەدات
لە خۆمان تێناگەین
تێناگەین لە خۆمان
دڵی کام پەڵەهەورمان شکاندووە
وشکەساڵیی رۆحی گرتووین؟
چ مۆمێکمان زویر کردووە
پەلکەزێڕینە خۆیمان لێ دەشارێتەوە؟
دوو عاشقی دەرۆزەکەرین
لەوەتی دوو گوێمان رواوە
لەبەردەم مزگەوتی موحیبەت
دەسڕی عەشقمان راخستووە
وێنەگرێک بەلاماندا تێدەپەڕێت
دەست دەخاتە گیرفانی شەرواڵەکەی
بۆ ئەوەی
پارەیەکی ئاسن هەڵبداتە بەردەممان
گیرفانی ئەو وەک سکی ئێمە خاڵییە
ناچار وێنەیەکمان دەگرێت
هەموو ئازارەکانمانی تێدا دەردەکەوێت
خۆمان لە فۆتۆکەدا دەناسینەوە
ئای، ئەوە من و تۆین
لەسەر شۆستەی شارێکی نەناس
باوەشمان بەناو قەدی یەکتردا کردووە
سەرما کەسیرەی کردووین و
لەبەر دڵی یەکتردا
خۆمان گەرم دەکەینەوە
