ئێش.. شیعری فه‌رهاد که‌ریم
هه‌ر رۆژێ شوێنێکم دێشێ
رۆژێ دڵ و
رۆژێ سی و
رۆژێ پێ
رۆژێ په‌نجه و ده‌مار و گوێ
رۆژێ لووت و زمان و چاو و بژانگ و برۆ
تارمایی و بزه و فرمێسک و پژمینم دێشێ
له بینین و گۆتن و بیستن و هه‌ست وچێژ گه‌رێ
رۆژێ قژ و پێست و خوێنم
رۆژێکیش هه‌موویان پێکه‌وه دێشێ
ده‌زانم گیان کێشان نزیک بووه
رۆژێ مردنم
رۆژێ ژیانم دێشێ
ئێشێکی گه‌وره که‌وتۆته نێوان مردن و ژیان
ژیانم دێشی و مردنم ژان ده‌کا
هه‌ناسه و روانین و بیرکردنه‌وه و بیستن و بینینم
ده‌نگم مێشکم مووم دێشێ
پشو و شادی و ماندو و خه‌مم
گۆتن و زمانم دێشێ
لاوازی و جووڵه و هێز وخوێنم
تاریک و روونیم ئێشم دێشێ
ووشه‌م له رسته‌دا دێشێ
بیر له زمان ناکه‌مه‌وه ده‌ربڕیینم دێشێ
ر‌ابردووم فه‌رمۆشکردووه و ئێستام دێشێ
ئێش ده‌گاته به‌یانی
له دوارۆژ گه‌ڕێ هه‌موو شتێ پڕ ئێش بووه
باو باران و ته‌م و هه‌ور و شنه‌با
مرۆڤ و ماسی و باڵنده و ئاژه‌ڵ
نان و خۆر و ده‌وروبه‌ر
ئێشێکی زیندوو که‌وتۆته ناو ئێش
ئێشم دێشێ
مرۆڤ بوونه‌وه‌رێکی سه‌یره
تاریکی شه‌و جوانه
مرۆڤ رووناکییه‌کی تاریکه
ئه‌ستێره‌کان نزیک بوونایه پڕ تاریکی مرۆڤ ده‌بوون
له ناو تاریکی مرۆڤ بینین ده‌که‌وێته گۆڕ
شه‌و پشوودانی گیان و سروشته
روناکی فڕێمه‌ده ناو شه‌و
شه‌و خاوێنه مرۆڤ
روناکییت تاریکه خه‌وی ده‌زڕێت شه‌و
رۆژ ئاوێنه‌ی رووناکییه
تاریکه رووناکییت، رووناکییت تاریکه مرۆڤ
رۆژ به‌و هه‌موو رووناکییه‌وه رۆشن ناکا ناخت مرۆڤ
له ناو تاریکییت وه‌ره ده‌رێ
شه‌ونیگه‌رانه به‌و هه‌موو تاریکیه‌ی فڕێتداوه‌ته ناو رۆژ
له ناو شه‌وی رۆژ و له ناو رۆژی شه‌ودا خه‌وتوویت مرۆڤ
خه‌وت خستۆته بینینی رۆژ و بیستنی شه‌و
ئه‌ستێره‌کان نزیک بوونایه کۆر ده‌بوون
به کۆریی له ناو ده‌نگی شه‌و و جووڵه‌ی رۆژدایت
ده‌ست به چاوته‌وه بگریت ئاوێنه‌یه ده‌ستت
په‌نجه‌کان ناناسته‌‌وه
په‌نجه‌کانت لێده‌بێت به سێداره
رۆژی بینین و شه‌وی بیستنت له سێداره ده‌ده‌یت
شه‌و له رۆژ داده‌گیرسێنی و له رۆژ شه‌و
ده‌بینه منداڵی سوتان و مردن
بوونه‌وه‌رێکی سه‌یره به سوتان و مردن ده‌ژی مرۆڤ
له ناو شه‌و و رۆژی خۆمدام مردووه ژیان
گۆڕه و نه‌خۆشخانه‌یه زه‌وی بۆ مردن مرۆڤ
