چەند تیرۆژە چیرۆکێک/ نەوزاد بەندی

             ــ1ــ

         قەراغ شار

له کۆڵانێکی قەراغ شار ، دوو هۆدە و هەیوانێکی کڕی ، وەک بڵێی خۆی لە کرێچێتیی شاردەوە ..

دراوسێی لای ڕاستی سواڵکەر بوو ، یەکێک بوو لە وەزعباشەکان ..

دراوسێی لای چەپی توجار بوو ، ڕۆژێ ڕێی پێگرت ، لێی پرسی :

ـــ( تۆ چ کارەی ؟ )

ـــ(لە خەستەخانەم )

ـــ( ئێ ئێ ..کەواتە ئەتوانی شرینقە بوەشێنی ؟ )

ئەگەر بڵێ من ئیش لەسەر چاندنی بەکتریا ئەکەم ، ڕەنگە بتەقێتەوە بەسەریدا و بڵێ : کە ماموابێ تۆ میقرۆبات قەڵەو ئەکەیت و خەڵک نەخۆش ئەخەی ؟؟

ئینجا وەرە تێی گەیەنە ..

ـــ( نا نا .. لە خەستەخانە بلیت بڕم .. )

  ‌          ـــ2ـــ

             مەڕ

تازە بەفرگرەی ئەلەکتریکیی هاتبووە شارەوە ، خەڵکەکە وا لێی تێگەیشتبوون کە ئەبێ مەڕێک و دوو سندوق تەماتە و بامێ و ..سێ چوار سەروپێی تێ بکرێت بۆ زستان ..واتا ئەبێ پڕ بکرێ ..

باوکی ئەمیش لەبەرئەوەی ڕەفیق کەم نەبێ ، دوو مەڕی قسری کڕی و لە حەوشە بەستنیەوە ، هەتا بە زووترین کات سەریانبڕێ و داخڵی پیرە بەفرگریان بکات ..

ئەو عەسرە ئەم هەر خۆی لە ماڵەوە بوو ..دەور و خولی مەڕەکانی دا ، پەتی یەکێکیانی کردەوە ، هەتا وەک فیلمەکان پیاسەیەکی لەگەڵدا بکا .. مەڕ هار بوو ، وەک سوێسکە فرتەی بۆ کرد و لە کۆڵان هەڵیتیزاند ..

ئەمیش مێرمناڵێکی یانزە ساڵان ، هەر ئەوەندەی پێکرا وەک تێسکەی تفەنگ ڕایکردە کۆڵان ، لەو سەری کۆڵان ، مەڕەکە ڕاوەستابوو ، کە ئەمی بینی ، بە چوارناڵە ، لە چاو ونبوو ..  وەک تۆما هۆک ، دوای کەوت .. لە پشت ماڵی ئازاد شەوقی شێوەکار ، پارچە زەمینێکی بەتاڵ هەبوو ، مەڕەکە لەوێ گیری خوارد . . ئەملاولای لێگرت .. مەڕەکە چاوی تێ بڕی ،وەک ئەوەی پێی بڵێ : وازم لێ بێنە ، تەحەمولی ناو بەفرگرە ناکەم ..!

سوودی نەبوو ، شۆقێکی گرت .. بە دەستەکەی تریشی پەتەکە …مەڕە خۆی توند کرد ، ناچار ڕایکێشا ..

لە ژێر لێویشەوە پۆزشی بۆ دێنایەوە  : ( وەڵاهی نەتبەمەوە ، شکم نییە باوکم سەرم ئەبڕێ .. گۆشتیشم ناخورێ .. بەس نییە تۆ گۆشتت ئەخورێ ؟ هیچ نییە ، با هەتا زستان لەناو بەفرگرەدا لێی بخەوی ! )

              ــ3ــ

             خزم

نزیکەی شەش سەعات بوو بە یەکتری ناساندبوون ..ئەمیان لە بنەماڵەی خێزانەکەی بوو ..ئەوەی تریان لە بنەماڵەی خۆی بوو …ئێستایش لە پرسەکەدا ،  لە تەنیشت یەکەوە ڕاوەستاون و جار جار قسە ئەکەن ..دڵنیایە کە باسی ئەم ئەکەن ، چونکە تاکە شت کە هەردووکیان بیناسن  ، ئەمە .. واتا تاکە کۆلکەی هاوبەشی نێوانیان ، ئەمە ..بێجگە لەم ، ئەبێ باسی چی بکەن؟ بە تایبەت جار و بار نیگایەکیان ئەگرتە ئەم ..بەو پێیەی نیگاکانیان توند بوو ، پێدەچوو زۆر خراپ باسی ئەم بکەن ..یەک دوو جار ویستی هەستێت و بڕوات داکۆکیی لە خۆی بکات ،بەڵام سودی نەبوو ، چونکە پێ دەچوو چرکە بە چرکە زیاتر باسی ئەم  بکەن  ، بە جۆرێ کاربگاتە ئەوەی قسەی ڕەق و جنێویشی پێبدەن .. هەر بۆیە باشتر وابوو دان بەخۆیدا بگرێ ..بەڵکو بەخۆیاندا بچنەوە ..بەڵام لەوە نەدەچوو سودی هەبێ ..چونکە تا دەهات زیاتر قسەیان (ڕەنگە )دەربارەی ئەم ئەکرد و ..لەوە ئەچوو نیازیان وا بێ  تەنانەت  لێیشی بدەن ..!