مارشی بێھودەیی.. ستیڤان شەمزینی
چەند رووگرژە چرکەکانی تەمەنم
شێوەی دەچێتەوە سەر ژەنەراڵێکی بەزیو
بە لەشکرێکی ھەڵاتووەوە
چەند تفتە پێکی ئەم شەربەتەی وجود
رووخساری لە چوالەیەکی تاڵ دەچێت
لە نێو زاری شیعرێکی منداڵکاردا
چەند ئازاربەخشە ئەم رۆژە چاوەڕوانەی
خۆر لە دەمی کەلەوە ئاوا دەبێت
بە عاجزیی و بەدزیی منەوە ھەڵدێتەوە
چەند سەختە ژانی ھەناسەدان
ھەر دەڵێی ھەوا ئاگرە و ھەڵیدەمژم
ھەر دەڵێی بای دۆزەخە
لە ھەناوما گڤەی دێت
چەند قورسە مرۆڤبوون
بۆ ئەوانەی
لە زمانی خۆشەویستی تێدەگەن
بۆ من کە میھر دەچێنم و
کینە دەمدورێتەوە
چەند بێمانایە گەمەی ژیان
وەک رێکردن وایە
بەسەر شەقامێکی چەقۆڕێژدا
کێ دەتوانێ
بەبێ برینی گەورە گەورە
بەسەریدا تێپەڕێ؟
چەند تەمومژە ئەم سەر زەوییە
لە شوێنێک دەچێت
بۆ کەرنەڤاڵی خوێنی رژاو و
فەزایەک بۆ لە خاچدانی تروسکەی خەیاڵ
چەند ناسازە ئەم دەنگە نوساوەی مێژوو
ناو سکی تەژیە لە زامی قووڵ قووڵ
لە سوێندی درۆی ھەزاران سیاسەتمەدار
چەند قورسە جانتای پڕی بیرەوەریی
لە ئانی پەڕینەوە بەرەو ئێستا
لە شانت دەکەوێتە خوارەوە و
خۆی دەخاتە باوەشی رەشەبا
ھەرچی نھێنی ئابڕووبەرە
دەکەوێتە سەرەتاتکێ
چەند ئاسانە سەربڕینی ئیسماعیلەکان
بە کێردی ژەنگاویی ئایدۆلۆژیا
بە شمشێری سندان لێداوی سیاسەت
چەند تاریک و نادیارە ئاسۆ
لەنێو دوکەڵی درۆدا چاو چاو نابینێ
ھەر ئیبلیسە دەستی ناوەتە بینی رۆشنایی
چەند چۆڵە ویژدانی دۆڕاوی مرۆڤایەتی
کەس نییە لەسەر کێلی گۆڕێک بنووسێت
ئەم مردووە ژیان بە دڵڕەقی خۆی کوشتی
چەند بێزارکەرە دەنگی واعیز و مەلاکان
لەوەتی ھەن
حەڵوای ژەھرمان دەرخوارد دەدەن
تەنافی سێدارە بۆ ئازادییمان دەچنن
چەند وێرانە ئەم شارە ئاوەدانە
چۆلەیەک نابینی
باسی خۆشەویستی بکا
باخەوانێک بەدی ناکەیت
گوڵێکی تەنھا ئاو بدا
کەناسێک نابینیت
خاشاکی رق گسک بدات
چەند بەستەزمانە
باڵندەی باڵکراوی پێکەنین
لە ھیچ شوێنێک خۆی بۆ نادۆزرێتەوە
کەسێکی راستگۆمان تێدا نییە
پێی بڵێ
گەورەم تۆ مردوویت
گۆڕستانەکان بۆ خۆت بگەڕێ
چەند دووبارەیە حکایەتەکانی شەھرەزاد
چیتر توانای راگرتنیان جەنگیان نییە
بە شەھرەزادەکان بڵێن
مەرکانەی خۆشەویستی
بەشی لێو تەڕکردنێک
ئاوی تێدا نەماوە
چەند کابووساوییە ئەو خەونانە
ناتوانن ماچێکی کاڵ
لە خۆیاندا جێ بکەنەوە
ناتوانن سینگی ھێشوویەک تیشک
بە خۆیانەوە بگوشن
ناتوانن پرسیارێکی غەریب
لە ھیچ موسافیرێک بکەن
ناتوانن چاویلکەیەک
بخەنە چاوی ھیچ رێبوارێکی چاوکزەوە
چەند دۆزەخە ئەم ژیانە
چەند خۆڵاوییە تەمەنم
عومرم دارێکی چەند زڕە
بەھێی ژوانێکی تر ناگرێ
چەند وەحشەتناکە داھاتوو
ئەو دەمەی دەبینم
ئایندەم دوو گیانە و
خەریکە کۆرپەیەکی دەبێت
چەند تاڵە ئەم سەرنەویشتە
کە مەحکومم بەوەی
ساواکەم ناوبنێم وەرین
و
ە
ر
ی
ن
٢٨-٨-٢٠١٤
سویسرا – لوزێڕن
