هایکۆ.. سمکۆ ئەحمەد ڕەشید

1
قەسیدەی چاوەکانت،
بۆ نابینایێ خوێندمەوە
بوو بە کراسەکەی یوسف
2
بیرم لە یەختەکان و
شەپۆلەکانی دەریا نەدەکردەوە
نیشتیمانم بای
3
سپێدەیەکی تاریک
بەکۆتا دێت گەشتە غەمگینەکەم
بە کاتی تەنیایی.
4
لە دیوارێکی لاچەپی نیشتیمان
بە ناوێکی خوازراوەوە
دەنووسم ئازادی.
5
ئیدی سەقفەکە دڵۆپە ناکا
ئاسمان کراسی هەورەکانی گوشیی
ئاوارەکان بزە دەکەن.
6
لە ژوورێکی تاکەکەسیی
لەسەر ڕیتمی مردن
ڕۆژێکی دیکەی ژیانم گوزەشت.
7
خۆرئاوابوو،
ئەو سپێدەیەی
ڕۆیشتی.
8
تۆ ژمارەکەت داخراوە
من بۆ ئەبەد
دەرگاکەم.
9
ژیان
هەموو ڕەنگەکانی بیدعەن
ڕەش نەبێ!
10
دەچم دەمرم،
تکایە کەس بانگم نەکات
هەستە شەڕە.
11
سفرەی جێماو،
پەڕ و باڵی جوجەڵەیەکی سپی
بەربانگی پشیلەیەکی ڕەش!
12
سەرم لە شانی هەور دەخشێ
لەوسەری زەوی
دیارم.
13
شەڕ کەی دەستی پێکرد؟
ئەوەیان دەزانم
کەی کۆتایی دێت؟
ئەوەیان بۆ نەوەکانم جێدەهێڵم.
14
جەنگ هەڵیکرد
خانووەکەم بە خۆڕایی فرۆشت
بە مارمێلکەکان
15
پێکێک ژەهرە
بە تامی هەنگوین
چاوەڕوانیت.
16
پەڕەیەکی سپی
نەخشەی نیشتیمانم لەسەر کێشا
سوور هەڵگەڕا
17
تۆزی بۆردومانەکە نیشتەوە
تاکە پێڵاوێکی بەتاڵ
گریاندمی.
18
تۆ هیچ مەڵێ
هێندە بە بێدەنگ گریاوم
لە زمانی هەموو ئاماژەیەک دەگەم.
19
بەبەر دەمی گوڵێکدا تێپەڕیم
لە ڕکاتی یەکەمینا سەلامی دایەوە
پەپولەیەک
20
بەزیندوویی
مانگیان خستە تابوتەوە
هەورە تەڵخەکان
21
نەبا زەوقی مردنی هەڵسێ
چنگ چنگ ڤیاگرای ژیان قووت دەدا
مرۆڤ
22
ئاوێنەیەکی شکاو
کەی دێیت؟
پارچەکانم کۆکەیتەوە
23
دڵم خێراتر لێدەدا
دڵنیام شوێنێکی دێشێ
نیشتیمان
24
تاسەیەکی فێنک،
لەسەر پشتی شەقام ـ
سێبەری شاخ.
25
،مێزێکی چۆڵ
دوو قاوەی سارد
.پژمینی بۆمبێک

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.