خەونە بێ ئەدرەسەکان.. ستیڤان شەمزینی
دنیای من بێ تۆ ھێندە ئاڵۆزە
ژیان خۆی تێدا ناناسێتەوە
مردن خەریکی تەفسیرکردنێتی
من دڵۆپێک خەندەی تەڕم
بۆ سەر لێوی وشکھەڵاتووت
من پشکۆی داگیرساوی پێکەنینم
بۆ دیلانێی دڵی تەنگت
ژیانم لاشەیەکە لە کفنی مەرگدا
مەرگم بەرگی ژیانی کردۆتە بەر
سەیرە لە مردن و ژیاندا
چاوم بەرەو لای تۆ دەفڕێت!!
لە ژێر زەمینی ژیانەوە ھەناسە دەدەم
لە بەرزایی مردنەوە دەڕوانم
بەدەم ژیانەوە مردم
لە باوەشی عەشقدا زیندوو بوومەوە
ھەمیشە نوێژم بۆ ژیان کردووە
بە کۆڵانەکانی عەشقدا
لە دەست مردن رامکردووە
لە کاتی نوێژ و راکردندا
کڕنووشم بۆ ھەتاوە ژنێک بردووە
خەونی ئاڵی خۆشەویستیم
بە کێردی مەرگ سەر بڕدرا
بە سەری بڕاوەوە
خەونێکی تر بە تۆوە دەبینم
چاوم
لە تۆزی مەنفا پاک دەکەمەوە
نیشتمان لەبەر ھەتاو ھەڵدەخەم
خۆیشم بەسەر تەنافی تۆوە
وەک کۆترێکی غەریب ھەڵدەنیشم
چوونکە ھەژارم خەونیش نابینم
دراو چەند ساڵە
تەوقەی لەگەڵ نەکردووم
بەو ھەموو گەداییەوە
دڵم بۆتە باخ و
ژنێک
ھەر رۆژەی گوڵێکی تێدا دەڕوێنێ
رووباری “راین” لە من دەچێت
پێچەوانەی ھەموو کەس رێ دەکەم
خەڵکیش پێچەوانەی من بیردەکەنەوە
من و خەڵک
لە ھیچ کوێ ناگەینە یەکتر
ئەوان
لە گازینۆکانی ھەوەسبازیی کەوتوون
منیش لە خانەقاکانی عەشق
بە ھاتنی سەری ساڵەکان
خۆشحاڵ نیم
ساڵێک لە تەمەنی عەشقمان
کەم دەبێتەوە
ساڵێکیش دەخەینە
ناو عەلاگەی خاشاکەوە
ھەموو سەری ساڵێک
کزە لە دڵمەوە دێت
بۆ ئەوانەی بەناو ساڵێکدا تێپەڕیون
بێ ئەوەی دەستنوێژی
خۆشەویستیان ھەڵگرتبێت
ستیڤان شەمزینی
