پەلی دارە شەڕەنگێزەکان.. شیعر/ کاوە عوسمان عومەر
گەر ڕێیەک
بەرەو دەریاچەی ڕەوشەنی
ڕوخسارت نەبێ
پلیکانە مرواریەکانی
مانگێکی ڕەشی قەترانی
دەروازەمە بێ
مەلەکوتی ئاسودەییم
وەرزێکی ترەبێ
لە نامۆییەکی قەشەنگ، و کەنارێکی
تر لە خەیاڵ، بەرەو
کۆشکە مەڕمەڕیەکانی سپێدەیەک
کە نووری پرشنگدارتر
لە ڕوخساری خواوەندەکان بێ! ئیتر
تۆیەک کە لە بونێکی تری
چیتر مەڕۆ، بە هەڵاتنی
دوو خۆری نیگاتە
تروسکەی
درەوشاوەی دەروازەی
کوچە سەرسوڕهێنەرەکانی
نێو نمەی بێگەردی بوونمە بێ
وونبوونی کتوپڕتە
تۆوی ڕاڕایی
لە خودی خۆم
لە بێستانی ڕۆحا دەڕوێنێ
چیتر مەڕۆ
هەر جێیەک دوای رۆشتنتە
بۆگوڵاوی
گوڵە لەیلەکی ڕوووت ئەپرژێنێ
ئیتر دەزانم
ئاوازی ئەم ئۆرکسترای
غوربەتە تا مەرگی
قەشنگی سەر کەناری زەردەپەڕێکا
لە خوێنی ڕەنگپژانا
کۆتایی نابێ
دەزانم لەوانەیە حەقیقەت
لە سەرهەڵگرتنی ئەبەدیما بێ
دەزانم، ئاسوودەیی تەنیایی من
لە دورخەی تەمهەڵچنی
نێو بێستانی پایزێ
لە سیحری چاو پڕ
فرمێسکی دێوانەییم ئەبێ
شیعر/ کاوە عوسمان عومەر
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
