تیرۆژە ووتار.. نەوزاد بەندی

ــ تیرۆژ ـ

تیرۆژ بریتییە لە چەپکە تیشکێک لە دیوێکی ڕوناکەوە بۆ دیوێکی تاریک له ڕێگای کونێکەوە.. وەک جێگای فیشەکێک بە دەرگایەکەوە ..جێگای نوکە چەقۆیەک بە ڕەشماڵێکەوە ..
بەو پێیە تیرۆژ لەچاو خۆردا، زۆر بچوکە، بۆیە کاتی خۆی ئەم ووشەیەم بە چیرۆکەوە لکاند، بوو بە تیرۆژە چیرۆک و پێش زیاتر لە چارەکە سەدەیەک لە پاشکۆی ئەدەب و هونەری چەند ڕۆژنامەیەکی ناخۆدا، چەند کۆمەڵەیەکم لێ بڵاوکردنەوە، بریتی بوون لە چیرۆکی زۆر کورت .. ئەوە بوو لە یەکێک لەو ڕۆژنامانەدا تەوەرێکیان سەبارەت بە تیرۆژە چیرۆک ڕاگەیاند و لەگەڵ چەندەها چیرۆکنووسدا گفتوگۆیان ئەنجام دا، کەچی منیان بوارد و دیالۆگیان لە تەکدا ساز نەدام ئەوە لە کاتێکدا بوو کە زاراوەی تیرۆژە چیرۆک، خۆم دامهێنابوو، کەچی ڕای بێجگە لە خۆمیان وەردەگرت سەبارەت بەو فۆرمە چیرۆکە !!

ــ ڕەسم بڵاو بکەنەوە نەک بەرهەم ــ

بە ڕاستی تەماشایەکی پێگە و تۆڕە ئەدەبی و هونەریی و کۆمەڵایەتیی و تەنانەت سیاسییەکانیش بکەن، کاردانەوەیەکی زۆر شەرمەندانەی خەڵک ئەبینیت بەرامبەر بە بەرهەمی نووسەر و بیریاران ..چەندین لاپەڕەی دوور و درێژ سەبارەت بە دیاردەیەک نووسراوە، کۆمێنتێکی بە خوێنەرێک پێ نەنووسراوە ..ژمارەیەکی زۆر کەم تەنها کلیکێکیان لەسەر کردووە، کەچی ئەگەر وێنەیەکی نووسەر و بیریارەکەی لەگەڵدا بێ، ژمارەیەکی زۆر باری سەرنج و قسەی خۆش و گفت و گۆ کۆدەکاتەوە .. هەر بۆیە ئەگەر ئەتانەوێت کۆمەڵگا بەختەوەر بێت، لە جیاتی نوسین و داهێنان، وێنەی خۆتان بڵاو بکەنەوە.. ئاخر سیاسیەکان لە خۆڕا وێنە و پەیکەری خۆیان بڵاوناکەنەوە، ئەوان شارەزاترن لە کەیف و میزاجی خەڵک و ئەزانن چۆن دڵخۆش و کەیفسازیان بکەن.

ــ هەرە گولێ ـــ

ئینجا وەرە تەماشا بکە، گۆرانیبێژ هەیە بیست سی ساڵە گۆرانی ئەڵێت، هێشتا پەنجا کەسی لەدەور کۆنەبوونەتەوە، کەچی گۆرانی هەرە گولێ بە زیرەکی دەسکرد دروست دەکرێ و هەموو دنیا داگیر دەکات و بە ملیۆنەها خەڵک لە دەوری کۆ دەبنەوە، تەنانەت هەندێ خەڵکی دڵتەڕ حەز لە کچەکەی دەکەن کە بە زیرەکیی دەسکرد دروستکراوە ..
ئەم حاڵەتە کارێک دەکات زۆربەی کایەکانی نوسین و بیرکردنەوە و بەهرە و داهێنان بکەونە ژێر پرسیارەوە ..واتا قوڕەکە زۆر خەستە و ..ئەڵێن دوای چارەکە سەدەیەک لە ئێستاوە، ئیتر مرۆڤ پەراوێز ئەخرێت و بۆی نییە هیچ جۆرە چالاکیی و جوڵەیەکی لە هیچ بوارێکدا هەبێ..

ـــ قەڵەباڵغیی جوان و قەڵەباڵغیی ناشیرین ـــ

هەموو دیاردەک جوان و ناشیرینیشی هەیە.. ئەو کۆمەڵگایانەی کە تەمەڵ و تەوەزەل لێی دانیشتوون، ئەبنە مۆڵگای دیاردە ناشیرینەکان ..بەو جۆرە ئەبنە زۆنگاوێکی قێزەون ..
قەڵەباڵغیی ناشیرین یەکێکە لەو دیاردە قێزەونانەی لای خۆمان هەیە، کاتێ مرۆڤەکان لە جێگایەک کۆدەبنەوە، دیاردەی ناشیرین سەرهەڵدەدات، چاوتێبرینی یەکتریی و تووڕە بوون و قیژە و فیکە و پاڵپێوەنان و کەوتن و خلیسکان و غەڵبە غەڵب و خۆ بەیەکترە نوساندن و دەستدرێژیی سێکسیی بۆ مێیینەکانی ناو قەڵەباڵغییەکە، ئەم چالاکییە ئاژەڵیی و بەربەریی و ناشیرینانە، هەموویان لە ژێر چەتری قەڵەباڵغیدا ئەکرێن.. واتا خەتای خۆیان نییە و خەتای قەڵەباڵغییەکەیە..!
بەڵام لە کۆمەڵگا پێشکەوتووەکاندا، قەڵەباڵغیی جوان هەیە، لە میترۆدا، لە پێشانگاکاندا، لە یاریگاکاندا هەزاران کەس کۆ دەبنەوە بە بێ ئەوەی کەس له کەس بکەوێ، هەمووان لە سنووری خۆیاندان و سنووری ئەوانی تر ناشکێنن، سواری یەکتریی نابن.. هێمنیی و هاوڕێیی و جوانیی ئەو جۆرە قەڵەباڵغییانە بەڕێوە دەبەن.

ـــ کۆیه ـــ

پیایدا تێپەڕ ببە، نە مناڵێک ئەبینیت بە سکۆتەرێکەوە یان بە پاسکیلێکەوە لە کۆڵانێکدا بێت وبچێت .. نە پیاوێک بە دوو عەلاگەوە لەبەردەم دەرگایەکدا بێ .. نە دوو ژن ئەبییت بە دەم گفت و گۆوە، سەرقاڵی بازاڕکردن بن .. نە چوار خوێندکار ئەبینیت، بە مەلزەمە و قسە و پێکەنینەوە، خۆیان بکەن بە ڕێستۆرانتێکی شاورمه و پیتزادا .. نە کتێبخانەیەک ئەبینی، کۆمەڵێ تایتڵی نالی و مەحوی و ئەحلام مەنسووری لێوە دزه بکات بۆ چاوی پیادەڕەوان ..
وورد تەماشا بکە، نە سکرینێکی گەورەی پڕوپاگەندە .. نە سینەمایەک .. نە شانۆیەک ..نە دوو کوڕیژگە ئەبینیت بە کۆکتێل و توتیی و تەیرلحوبەوە سەرقاڵ بن . .ئاسمانەکەیشی نە کۆلارەیەکی تێدا دەبینیت، نە پۆلێ مراوی کۆچەر.. نە هێلانەی حاجی لەقلەقێ ..نە کۆمەڵێ وەرزشکار ئەبینیت خۆیان بکەن بە جیمێکدا .. نە هەیکەلی تاوەرێک، نە مۆڵێک ..نە بینایەکی جوان ئەبینیت .. نە دەنگی گۆرانییەک، نە هۆرەی غازفرۆشێک ..نە لاواندنەوەی کۆنەفرۆشێک .. نە مەقاماتی پەشمەکفرۆش و عەمبەروەرێت فرۆشێک ئەبیستیت ..نە ژنێک پەردەیەک دابداتەوە نە بۆنی شفتە و تەماتە و باینجانی سوورکراوە لە دەلاقەیەکەوە دێتە ناو کەپوی ڕێبواران ..
نە وەستایەکی ئایزۆگام ئەبینیت بە پەرەمێزێکەوە خەریکی لادیوارێ بێت..
بڕوا ناکەن ؟ بڕۆن خۆتان بە چاوی خۆتان بیبین ..

تیکتۆکاندن
ئەبێ بزانین خوێنەرەکانمان چییان بەسەردا هاتووە و خەریکی چین ..
ڕاستتان پێ بڵێم زۆربەیان لە پێگەکانی ئینیستا و تیکتۆکن، یان خەریکی دێڕێک تەنها دێڕێک شیعرن بە پارچە مۆسیقایەکی ڤیڤاڵدییەوە، یان سەرقاڵی بازاڕ کردنی ئەمەزۆنن، گەنجێک و ژنەکەی، بە کاڵای گەڕاوەی ئەمەزۆن، هەرچی خوێنەرەکانمانە بۆ خۆیانیان بردووە، بە یەڵا جەماعەت ..یەڵا جەماعەت، هەر یەکەیان وەک یانەیەکی وەرزشییان لێ هاتووە، یاریزان و هەواداری خۆیان هەیە.
هەر بۆیە باشتر وایە بە ڕۆمان و قەسیدەکانتانەوە بڕۆنە تیکتۆک و ئینیستاگرامەوە ، هەوڵبدەن هەندێ لە خوێنەرەکانتان بگەڕێننەوە ئەگینا مەگەر خوێنەر بە AI بۆ خۆتان دروستبکەن یان واز لە نوسین بێنن و لەگەڵ دڵخوازەکانتاندا فرۆشگایەکی ئۆنلاینی لێ ڕابکێشن.