ئەرجەنتین و هەشبە سەری مرۆڤی كورد!.. سەدیق سەعید ڕواندزی
تا ئێستا، هەموو ئەوانەی خولیایەكی گەورەیان بۆ وەرزش هەیە و بۆ ڕۆنالدۆ و میسی دەگرین و گەر ئەرجەنتین بدۆڕێت، دەڵێن قورم بەسەری بووە، پرسیاری ئەوەیان لە خۆیان كردووە دەرەنجامی ئەو هەموو لێهاتوویەی میسی و ڕۆنالدۆ لە داهاتوودا لەوەرزشدا چی دەبێت؟ گەر وەرزشوانێك ئەفسانە و ئەستێرەی تۆپی بێت، دەتوانێت خزمەتێك بە مرۆڤایەتی بكات؟ یان ئەو لە سەر ساویلكەیی جەماوەرەوە دەبێتە ئەستێرەو تەنها ئەڵماسەكەی دەستی بایی پەنجا ملیۆن دۆلار دەبێت؟ لە ڕاستیدا، وەرزش تاكە كایە و بواری ژیانە، كە مرۆڤ ناگەیەنێتە هیچ، وەرزش تاكە خولیایە، كە مرۆڤەكان لەوسەری بەدەستی بە تاڵ تێیدا دێنە دەرەوە، من زۆرجار دەڵێم لە كۆمەڵگەی ئێمە هێندەی سەرسامی میسی و ڕۆنالدۆ و بەرشە و ڕیالن، گەر كتێبێمان بخوێنبووایەوەو ئاشنای كولتووری خوێنەوە بووینایە، ئێستا لە ژاپۆن پێشكەوتووتر دەبووین. مەبەستەكە لێرە، هەواداریی نییە كە مرۆڤ ئازادە لەوەی هەواداریی كام یاریزان و تیپە، بەڵكو مەبەستەكە قووڵتر ڕوانینە. گەر پزیشكێك بگاتە لوتكە و هێندە شارەزاو لێهاتووبێت لە كایە زانستییەكەی، بێگومان خزمەتەكانی گەورەتردەبن بۆ نەخۆش و مرۆڤایەتی، گەر مامۆستایەك لە پیشەكەیدا هێندە پەرەوەردەیی و پێشبكەوێت، دەتوانێت كاریگەریەتی زیاتر لەسەر نەوەكان دابنێت، گەر ئەندازیارێك لە كارەكەیدا پێشبكەوێت، ئەوا دیزایین نەخشەی داهێنەرتر و جوانتر و نوێتر دروست دەكات. گەر فیتەرێك شارەزایی لە چاككردنەوەی ئوتومبێل زۆرتر بێت پیشەمەندتر دەبێت، وەستایەكی چاككردنەوەی ئامێرە ئەلكترۆنییەكانیش بەهەمان شێوە، بەڵام گەر وەرزشوانێك بگاتە لووتكە، دەتوانێت چی بكات بۆ مرۆڤایەتی؟ پێش كریستیانۆ و میسی، ئێمە زیكۆ، بیلێیە،غولێت، پیكنپاوەر، ڕۆماریۆ، بیكهام، ئەحمەد ڕازی، عەلی دای و چەندانی ترمان هەبوون، ئێستا ئەمانە لە كوێن؟ ناویان لە كولەكەی تەڕیش ماوە؟ بیرم نایەت یاریەكی وەرزشی، بێ شەر ِ و جوێن و پەلامار كۆتایی هاتبێت، زێدان كە ئەفسانەبوو، بەكەلە لە سنگی یاریزانێكی دا، مارادۆنا، بە هۆی تلیاكەوە مرد، وەرزش تاكە خولیایە مرۆڤ ناگەیەنێتە هیچ، كەچی گاڵتە جاریەكە لەوەدایە، كچێكی جوانی كورد كەدڵی سەد كوڕی كوردی جوان و قارەمان و مێرخاسی شكاندووەو لەوانەیە ڕەفزی پێ دابێت، دێت بۆ میسی و دۆڕانی ئەرجەنتین دەگریت. دە هێندە بگریێ كە نەك جارێك، تا هەزاران جار هەشت بەسەر دەبیت !تۆ بۆچی بۆ پێشمەرگەیەكی قارەمان ناگریی كە بەرگریی لە خۆت و شكۆو خاك و نیشتمانەكەت دەكا، چیت داوە لەوڵاتێك كە شەش هەزار میل لێتەوە دوورەو هەر نازانێ كورد كێیەو كوردستان لەكوێیە؟
سەدیق سەعید ڕواندزی
Sadiq Said Rwandze
سەدیق سەعید ڕواندزی، لە ساڵی 1972 لە شارۆچکەی ڕواندز لە دایکبووە. خوێندنی سەرەتایی و دواناوەندی هەر لەو شارە و ساڵی 1993 _1994، بەشی کوردی _ پەیمانگای مەڵبەندی مامۆستایانی لە هەولێر تەواو کردووە. هەر لە ڕواندز دەژیت و خولیایەکی گەورەی بۆ کتێب و خوێندنەوە هەیە و زۆرجاریش وەک خوێنەرێک سەرنجەکانی لە بارەی پرس و بابەتە ئەدەبی و ڕۆشنبیرییەکان و کتێب و تێکست دەخاتە ڕوو.
