کاتێ لەگەڵ خۆما قسه ئەکەم.. نەوزاد بەندی

ئازار وایە ،
کەم کەم لەگەڵیدا ڕادێی ..
وای لێ دێ ،
ڕۆژێ دیار نەبێ ،
سەد شوێن بە دوایا ئەگەڕێی ..!
………..
………..

٭ ٭ ٭

کە باڵندەیەک ئازاد ئەکەیت ،
بە هەر ئاڕاستەیەکدا بێ ، هەڵئەفڕێ ..
چونکە بە هەموو ئاڕاستەکانا ،
ئازادیی هەر ئازادییە .

٭ ٭ ٭

قسەی خۆش بۆ مناڵەکانتان نەکەن ،
کە چوونە دەرەوە ،
حەرامزادەیەک بە قسەیەکی خۆش ،
هەڵیانئەفریوێنێ !

٭ ٭ ٭

ژیان گۆڕانێکی بەردەوامە
لەناو بەردەوامییەکی جێگیردا ،
لەبەر ئەوە لە تەمەنێکی دیاریکراو زیاتر ، مانەوە تیایدا کارەساتە ..

٭ ٭ ٭

ئەوانەی مردن ،
چییان زەرەر کرد ؟

٭ ٭ ٭

هەوڵ بە ئەو کارانە بتوانیت کە ناتوانیت ، بۆ ئەوەی ئەو کارانە بتوانیت کە ئەتوانیت .

٭ ٭ ٭

گوڵ لە ماڵەکەی خۆتا بڕوێنی ، ماڵدارییە ..
گوڵ له دەرەوەی ماڵەکەی خۆت بڕوێنی ، نیشتمانپەروەرییە ..
ماڵەکەی خۆت پاک بکەیتەوە و
دەرەوەی ماڵەکەی خۆت پیس بکەی ، بێ ڕەوشتییە .

٭ ٭ ٭

شێر شێرە و
کەڵەشێریش کەڵەشێر ..
کە شێر نەبووی ،
کەڵەشێر مەبە ..

٭ ٭ ٭
ئەوەی پەروەردە نەکرابێ ،
قات و بۆینباخ و پلە و پۆست ،
هیچی فێر ناکەن ..
تەنها گەمژەییەکانی تۆختر و ئاشکراتر ئەکەن ..

٭ ٭ ٭

خۆپیشاندان بە بەختەوەر ،
لوتکەی گەمژەییە ..
تەنها مناڵەکان بەختەوەرن
کە هێشتا نەیانزانیوە دنیا چ ماڵێکە ..

٭ ٭ ٭

دەسەڵاتێ نەتوانێ گەنجەکانی دامەزرێنێ ، گەنجینەکانی دزراون ..

٭ ٭ ٭

ژیان گەڕانە به دوای مردندا ،
هەندێک بە دەوڵەمەندیی بە دوایدا ئەگەڕێن و
هەندێکی تریش بە هەژاریی ..
هیچیشیان نازانن بە دوای چیدا ئەگەڕێن ..

٭ ٭ ٭

هەندێ جار گەمژەیەک دێتە ناو ژیانتەوە ..
هەوڵ بدە بە کەمترین زیان ، لێی دەرچیت ..

٭ ٭ ٭

ئاگاداری ووشەکانت نەبیت ،
دەمت لە بەرچاوی خەڵک ، ئەبێ بە مەنهۆڵ ..

٭ ٭ ٭

به منداڵیی ،
لە هەر کوێ خەومان بهاتایە ئەخەوتین ..
کە گەورە بووین ،
لە هەر کوێ خەم هەبووایه ئەمانخوارد ..

٭ ٭ ٭

مەرگی زۆر کەسمان بینی ،
کە هەزاران کەس پاسەوانیان بوون ..
ئێمە کە تەنها سێبەرەکانمان پاسەوانمانن ..

٭ ٭ ٭

هەتا هەڵوێستەکانت زیاتر دژ بن بە خواستی خەڵک ،
پێویستت بە پاسەوانی زیاترە بۆ ئەوەی لە لەوەڕ بەردەوام بیت ..

٭ ٭ ٭

سەرۆکی پەرلەمانێک 40 پاسەوانی هەبێ ،
میللەتەکەی گورگن ..

٭ ٭ ٭

هەتا زیاتر چاوپۆشیی لە زۆردار بکەیت ،
توندتر پێت پیا ئەنێ ..

٭ ٭ ٭

بریندارەکان ئەوانە نین کە خوێنیان لێ ئەچۆڕێ ،
بەڵکو ئەوانەن کە چاوەڕوانن ..

٭ ٭ ٭

ئەوەی دەسەڵاتی ئەوێ
بۆ ڕابواردن و کۆکردنەوەی ماڵ و سامان ،
ئامادەیە نیشتمان لەسەر بچووکترین مێز و
هەرزانترین قوماردا ،
بدۆڕێنێ ..
چونکە نیشتمانی ڕاستەقینەی ئەو ،
خۆی و خێزانەکەیەتی ..

٭ ٭ ٭

هەندێ جار
ڕقت لە خۆت ئەبێتەوە ،
کە ئەبینی ڕۆژ بە ڕۆژ
لە خواستەکانت دوورتر ئەکەویتەوە و ..
لەو شتانەی بێزارت ئەکەن ، نزیکتر ..
٭ ٭ ٭

چێشتخانەیەک بۆگەن بوو ، داخرا ،
زۆربەی چێشتخانەکان لاساییان کردەوە و داخران ..
کەسێ بە ناحەق کوژرا ،
بوو بە مۆدێل و چەندین کەسی تر
بە ناحەق کوژران ..
یەک شەماڵ موفتیمان هەبوو ،
هیچ کەسێ نەبوو جێگاکەی پڕ بکاتەوە ..
یەک ئیبراهیم ئەمین باڵدارمان هەبوو ،
یەکێکی تری نەهاتەوە جێ ..
یەک نەجمەدین مەلامان هەبوو ،
کەس نەیتوانی دانەیەکی تر لە خۆیدا متوربە بکا ..
میللەتێکین یەکسەر فۆتۆ کۆپیی بەدکاریی ئەکەین ،
هەرگیز ناتوانین شوێنپێی زانا و پیاوچاکانمان هەڵبگرین

٭ ٭ ٭

ساڵانە بەرگی کەعبە ،
دووبارە
زیڕپۆش ئەکەن و
خەڵکێکی زۆریش لە برسا ئەمرن ..
لە چ ئایەتێکدا هاتووە ،
خەڵک با له برسا بمرن و
بەرگی کەعبە زێڕ پۆش بێ ؟
ساڵی جارێکیش بگۆڕێ ؟

٭ ٭ ٭

هەتا دوای نیوەڕۆ قسە بۆ کورد مەکەن ،
چونکە تا ئەوکاتە لە سەد کورد ، نەوەد کورد خەوتوون ..

٭ ٭ ٭

لوتکەی شانازیی کورد ئەم شتانەیه :
خزمەتکاری نیپاڵیی ، ئوتومبیلی کیلۆمەتر سفر ، نەشتەرگەری جوانکاریی ، خوێندن بە ئینگڵیزی و تورکی ، ڕەگەزنامەی ووڵاتێکی ئەوروپیی ..

٭ ٭ ٭

له میللەتی ناشیریندا ،
زۆرینه هەوڵی نەشتەرگەریی جوانکاری و بۆیاخ ئەدەن ..

٭ ٭ ٭
هەندێ کورد ، حەز ئەکەن ئیشت تێیان بکەوێ ، بۆ ئەوەی بۆت نەکەن .

٭ ٭ ٭

کوژاندنەوەی گڵۆپەکانی ترافیک بۆ دەسەڵاتدارێک ،
واتا کێ ئەشێلی بیشێلە ،
قوربان ..

٭ ٭ ٭

میللەتێک ؛
( ڕێز لە سەوزەفرۆشێک نەگرێت
چونکە پارەیەکی کەمی لێ ئەسێنێ و ..
ڕێز لە پزیشکێک بگرێت
چونکە پارەیەکی زۆری لێ ئەسێنێ )
بۆ فەوتان باشە ..

٭ ٭ ٭

…………..
…………..

کە دۆزیتەوە ،
پێی ئەڵێی ..
ماڵت ئاوا بێ ، تۆ لە کوێی ؟!!
وا شەتڵەکانت وشک ئەبن ..
هەر دیار نەبووی ..
هەر چاوەڕێ بووم دەرکەوی..
هەر ووتم تۆزێکی تر دێی !

نەوزاد بەندی