فرمێسكی تەنیایی.. سەلام عومەر

پاڵم بە كێلی گۆڕێكەوە داوە كە مێژووی لەدایك بوون و شەهید بوونی لەسەر نووسراوە، ئەو تاقانەیە تەنیا 17 ساڵ ژیاوە، وەلێ بایی سەدەیەك حیكایەتی سەركەوتنی جێهێشتووە، چاوم كەوتۆتە سەر ناوی پشكۆ و هەموو گیانم دەلەرزێ، پشكۆ ئاسا جەرگم داغ دەكاو چززە لە هەستم هەڵدەستێنێ، چیرۆكەكانی منداڵیمان بەهەموو گەمانەكانەوە خۆیان بەیادەوەریمەوە هەڵواسیوە و موچوڕكێك تەواوی دەمارەكانم سڕ دەكا، بەداخەوە بەلاویەتی دۆزیمەوەو لەنێو خوێندا هەڵمگرتەوە، هێشتا برینی رانەكانم ساڕێژ نەبوون، كەچی هەست بە برینی تەنیایی نێو دڵم دەكەم، تەنیایەك پێدەچێ بۆ تاهەتایە فرمێسك ببارێنێ و بەرۆكم بەرنەدات.

ئەوڕۆژەی یەكەم ددانی شیریم لەقی لە ترسان نانم بۆنەخورا، هەر پەنجەم تێوەردەداو هەستم بەخوران دەكرد، كەمێك ئازاری هەبوو وامدەزانی ئیدی هەتاهەتایە كەلێن دەكەوێتە نێو دەممەوە، رێك وەكو ئەو كونوكەلێنانەی دوای گەورەبوونم هەستم پێكرد، ئەو كەلێنانەی هێشتا بۆم پڕنەكراونەوەو دەشێ ئیدیشی بەدوادابێ، داكم زۆر هەوڵیدا نەمتوانی یەك پارووش بجووم، بەبرسیەتی مامەوە هەتا براگەورەكەم هاتەوە، كە دیتی داكم پەرێشانەو منیش برسیمەو ناوێرم نان بخۆم، هاتە لام و پەنجەیەكی لە ددانە لەقیوەكەمدا گوتی: هیچی وای نەماوە رایكێشە دێتە دەرێ، بەوقسەیە هەر زراوم چوو، دەمم داخستەوەو نەمهێشت كەسیدی پەنجەی لێدا، دەمگوت نابێت ددانم بكەوێ ئاخر وەك ئەوانی دی پێمدەڵێن كەلۆس، چەندی پێیان گوتم بابە ئی هەموو كەس وایە قسەی یەكیشیانم وەرنەگرت، چوونكە زۆر دەترسام، تا بابم هاتەوە، بارودۆخەكەیان تێگەیاند و لێمنزیك بۆوەو گوتی: كوڕم وەرە ئەوە كێ پێی گوتووی دەبێت رایكێشی نابێت توشی خوێن بەربوون دەبی، وەرە بەداوێك بۆت لە ددانەكانی دی دەبەستمەوەو دوو رۆژی دی دەچێتەوە جێی خۆی و چادەبێ، بەقسەی خۆش و بەقوربانت بم چۆن دێڵم ئازارت پێبگا دەمی پێكردمەوە، زۆر بەهێواشی و بەبێ ئەوەی هیچ ئازارم هەبێ دەزوویەكی هێنا لە ددانەكەی بەست، ئەوجا گوتی: كوڕم خۆ ئازارت نەبوو؟
گوتم: نا
گوتی: باشە دەمت زیاتر لێككەوە تا بەوانی دیەوە ببەستمەوە، هەر كە دەمم لێككردەوە بابم بەهەموو هێزی ددانەكەی راكێشاو دەریهێنا، منیش ئازارم هەبوو بەڵام زۆر كەم، لە چریكەمداو دەرپەڕیم، داكم و خوشكم و برایەكەم و بابم لەجیاتی ئەوەی خەمی منیان بێت پێدەكەنین، زۆرم پێ سەیر بوو! خوێن بەدەممەوە بوو ئەوانیش لەخۆچووبوون لە پێكەنینان، داوەكەی بەدەست بابمەوە بوو هێشتا ددانەكەی پێوەبوو هات و گوتی: كوڕم مەگریە ئەوە ددانی شیریە ئی هەموومان كەوتوەو ئی تۆش دەكەوێ و ئی نوێ دێتەوە، ددانەكەی دامەوەو گوتی: بڕۆ لەبن گڵی بنێ رۆژی قیامەتێ دەیانەوێتەوە، داكیشم هەمان قسەی دووبارە كردەوە، ئەمیش پێم گوتن: باشە ئەگەر ددانی نوێ لەجێی بێتەوە ئەو ددانە وردیلەم بۆ چییە، یان شۆخیم لەگەڵ دەكەن و ئیدی ئەو كەلێنە هەتاهەتایە لەنێو دەمم دەبێت، ئەوانیش دڵنیایان كردمەوە كە ئیدی دێتەوەو بڕۆ بیشارەوە، منیش چووم لەنێو كەلێنی دیوارێكی گڵدا شاردمەوە، زۆر ئازارم نەبوو بۆیە هەر ئەوكات داكم چێشتی بۆ تێكردم و گوتی: بەئاوی گۆشتی بیخۆ و تا ئێوارەش شتی رەق مەخۆ، زۆرم پێ سەیر بوو بۆشاییەك كەوتبۆ نێو دەمم، پێیان دەگوتم كەلۆس، خۆ تەنیا یەك ددانم كەتبوو كەچی هەستم بە بۆشاییەكی زۆر دەكرد، بە زمانیشم كە لە قۆڵتایی پوكم دەدا هەستم بە شتێكی تیژ دەكرد و داكم دەیگوت ئەوە ددانە نوێیەكەیە سەری دەرهێناوە، ئەوجار بەهۆی ئەم بۆشاییەوە لە قسەكردندا وشەی سینم بۆ نەدەهات وامدەزانی كەلۆس یانی فسە زمان، زۆری پێنەچوو ددانەكەم هاتەوەو چابوومەوە،

ساڵیك تێپەڕی ماڵێك هاتنە جیرانمان كوڕێكی هاوتەمەنی منیان هەبوو، دنیایەك دڵمان بەیەكتری خۆش بوو، چوونكە هەم منی لە تەنیایی رزگار كردو هەم خۆشی، ئەو كوڕە كە زۆر ناسك بوو تاقانەی داكوبابی بوو بۆیە زۆریان ناز دابوویە و هەمیشە چاودێریان دەكرد.
رۆژێك بەتەنێ لە كۆڵانێ گەمەمان دەكرد، هەلوكێن یەك لەو گەمانە بوو كە خومان پێوە گرتبوو، لەنێو گەماندا بووین كە من دارێكی درێژم بەدەستەوە بوو لەو دارە گچكەم دا كە لەسەر بەردێك دامنابوو، برادەرەكەم دەبوو پێشئەوەی دارە گچكەكە بگاتە زەوی ئەو لێیداتەوە كەچی خلیسكاو هەردوو ناو لەپی دەستی رووشا، دارەكەی خۆشی لەدەست بەربۆوە، زیقەی لێهەستاو داكی هاتە دەرێ، كەدیتی ئەمن بەرامبەری وەك پاڵەوان راوەستاوم و ئارەقەش بەنێوچەوانمدا دێتە خوارێ بەبێ ئەوەی پرسیار لە هۆكارەكەی بكات لە من توڕە بوو و منداڵەكەشی بردەوە ژوورێ، هێندەی پێنەچوو منداڵی تاین هاتەوە كۆڵانێ و دەستمان بەگەمان كردەوە.
كۆڵان ئەو شوێنەی لە قوتابخنەكەی ماڵێ و لە مامۆستایانیش زیاتر لێی سوودمەند بووم، كۆڵانێك كە دەڕژێتە نێو یادەوەریمەوە گریانم دێ، یاریەكانی ئەوكاتم بیر دێتەوەو تەزوویەك لە بنی پێمەوە دێت و لە تەپڵی سەرم دەردەچێ، هەموو منداڵەكان بەیەكەوە وەك یەك خێزان خۆشیمان لە چوونە كۆڵان وەردەگرت، نازانم بۆ ماڵەوە ببوە زیندان هەر كە دەچووینە كۆڵان وەك ئازاد بوبین وابوو، باڵەفڕەمان دەكردو زۆر جاران هەر لەخۆوە دەمان چریكاند، كۆڵانێك پڕ لە درەخت و دەنگی چۆلەكەكان ئارامی دەكردینەوە، مریشك و كەڵەبابەكانی وێ ببوونە هاوڕێمان لێمان نەدەترسان بە ئارەزووی خۆیان چینەیان دەكرد، هەروەك ئێمەش سەربەستانە گەمانمان دەكرد، هێشتا قوتابخانەمان نەدیبوو بۆیە ماڵەوەمان بەزیندان دادەناو كۆڵانیش ئازادی، كوێرایم دایە زۆر زوو گەورە بووین.
بابێینەوە سەر چیرۆكەكەی خۆمان، زستان داهات و هێشتا لەگەڵ ئەو برادەرەم لە كۆڵانێ گەمانمان دەكرد، بیرمە بەفر چۆكێك كەوتبوو، لە كۆڵانێ شەڕە بەفرێك بوو ئەوسەری دیار نەبوو، لە سەربانەكان كوڕانی گەڕەك لەگەڵ جیرانەكان شەڕە تۆپەڵیان دەكرد، تۆپەڵە بەفر بەبناگوێماندا ویزەی دەهات، كچەكان دەهاتن و بەفرو دۆشاویان دەخوارد سەرنجیشیان دەچۆ سەر كوڕە دڵخوازەكانیان، ئەوانیش زۆر جاران دەیانكردنە نیشانەو زیقەیەكی ناسك ئۆخژنی دەدایە لاوەكان، خۆ هەندێجاریش لەجیاتی تۆپەڵە بەفر نیگایان لەیەكتری دەگرت و ئەو نیگایانە جەستەی لاوەكانی دەكردە پشكۆ، ئێمەی منداڵیش بەهۆی راكە راكی نێو بەفر بەو سەرمایە عارەقەمان كردبوو، وەلێ دەست و لاقمان تەزی بوو، من و برادەرەكەشم شەڕەبەفرمان دەكرد بەڵام تۆپەڵەكانی ئێمە هەم گچكە هەم شل بوون چونكە دەستمان تەزی بوو نەماندەتوانی بەباشی بیگوشین، لەوكاتەدا تۆپەڵێك هات و بەبنا گوێی برادەرەكەم كەوت و زیقەی گەیشتەوە ماڵێ، باب و داكی هاتن و كە دیتیان ئەوە من تۆپەڵێك بەفرم بەدەستەوەیەو بەرامبەری راوەستاوم، ئارەقەش بە تەوێڵمدا دێتە خوارێ، وایانزانی من لێمداوە چەندی گوتم من نەبووم، كەچی ئەوان زۆر لێم توڕە بوون و بردیانەوە ماڵێ و ئەوەندەنا شكاتیشیان لێكردم، ئەو رۆژە ئەو منداڵە هەر نەهاتەوە كۆڵانێ، دواتریش كە دیتمەوە ئەو دەیزانی من نەبووم بۆیە یەكسەر هاتەوە لام و دەستمان بەگەمان كردەوە.
گەمانێك لە نێو كۆڵان و كۆڵانێك خۆشترین شوێنی منداڵی، لەوێ شتی نوێ فێردەبووین و لەپاڵ وشەی نوێدا جنێوی نوێ و شەڕە گەڕەك و بەرد هاویشتن و دارلاستیق و قۆچەقانی و دەرچوون و دوور كەوتنەوە لەماڵێ، دەچووینە رۆخی كۆڵانەكانی دی و منداڵی نوێمان دەدی، دەچووینە رۆخی بازاڕ و نەماندەوێرا بچینە ناوی لەبەر بزر بوون، خێرا بە رۆژانەكەمان چەند كەلایەكمان دەكڕی زوو دەگەڕاینەوەو خەریكی كەلایەن دەبووین، جیهانی ئەوكاتی منداڵی پڕ بوو لە سادەیی لە خۆشەویستی و دوور بوو لە كینەو ئیرەیی.
بەهار هات و لەگەڵ ئەو برادەرەم خەریكی گەمان بووین و ئەو زۆر جاران رادەوەستا و هەر دەستی لە دەمی دەنا، تا پێیگوتم: نازانم بۆ ددانێكم شل شلە هەر دێت و دەچێ، منیش كەدەستم دایە وەك ددانەكەی پاری من دەلەقی یەكسەر رێگەكەی بابم بەبیر هاتەوە ئەو چی گوت و چۆنی كرد منیش وامكرد، هەر كە دانەكەم راكێشاو دەرم هێنا، چریكەیەكی لێدا دارتێلەكانی لەراندەوە، بەگریان و راكردن چۆوە ماڵێ، كردیە هەرایەك ئەمنی شۆك كرد، هێشتا داو و ددانەكەم بەدەستەوە بوو كە داكی و بابی گەیشتنە سەرم پێموابوو دەستخۆشیم لێدەكەن و وەكو داكم و كەسەكانم پێدەكەنن، كەچی پێچەوانەی ئەوان بەجۆرێك لێم توڕەبوون زراوم چوو، ئاخر ئەوان كەدیمەنی پەتێك و ددانێكی پێوەهەڵواسراویان بەدەستمەوە دیت، ئاگر لەنێوچەوانیان باری، ئەمجارەیان نەك هەر لێم توڕە بوون زللەیەكیان لە بناگوێم داو دەستیان گرتم و بەو دیمەنەوە ئەمنیان بردە بەردەمی داكم، ئەویش گوتی: بەقوربانی كوڕەكەتانی دەكەم منداڵە نەیزانیوە و ئیدی ئەوقسانەی بۆ كردن و بەڕێی كردن، ئەوەی راستی بێت داكم هیچ لیم توڕە نەبوو دەیزانی ئاوەكە خۆیا رشتووینە و منیش چوومەتە ناوی، ئەوجار كارێكی هێندە خراپم نەكردووە، منیش تێمابووم باشە خۆ داكوبابی من كە ددانیان دەرهێنام پێدەكەنین كەچی داكوبابی ئەوان توڕەن زۆر توڕەن، هەر لەكن داكم بەكوڕەكەیان گوت نابێت تاهەتایە لەگەڵ ئەو قوڕمساغەی گەمان بكەی، ئەوەندەنا پێموابێ هەر لەبەر من بوو هێندەی پێنەچوو خانوەكەیان فرۆشت و لە گەڕەكێكی دی خانوویان كڕی، ئیدی ئەوان خاوێنترین پەیوەندیان لێكدابڕی و منیشیان تەنیا كرد.
ئێ منیش زۆر بە غەمباری ددانەكەی ئەویشم بردە تەنیشت ددانەكەی خۆم و لە كەلێنی دیوارە گڵینەكە شاردمەوە، تا ئەگەر لە قیامەتیش داوایان لێكردینەوە بەیەكەوە بچین و ددانەكان بێنینەوە.

جێهشتنی منداڵی وەك جێهێشتنی ئەو كەسە نزیكانەیە كە كۆچی هەتایی دەكەن و هەرگیز نایانبینیەوە، مەگەر بەسەر یادەوەریەكانیاندابچینەوە، منداڵی ئەو چیرۆكانەن كە وەك خواردن گەشە بە هزر و جەستە دەدەن، دەبنە كەرەستەی گەورە بوون و ئایندەت بۆ سانا دەكەن، زوو تێدەپەڕن وەلێ بۆ هەتاهەتایە كاریگەری خۆیان لەسەرت جێدەهێڵن، كەمێك گەورەتر بووین و چووینە قوتابخانە، لەوێ راستە زۆر شت فێر بووین، وەلێ لە زیندان دەچوو، هەر مامۆستایەك دەهاتە پۆل دارێكی بەدەستەوە بوو، بەزۆر وانەكانیان فێر دەكردین، جا حەزت لێباو نەبا دەبوو لەبەری كەی، ئەمن سەرم سووڕمابوو باشە خۆ ئایەت و ئینشای عەرەبی هیچی تیئَنەدەگەیشتین بۆ دەبوو لەبەری كەین؟ خۆ ئەگەر نەشمان زانیبا داركاری دەكراین، ئەوەندەنا قوتابیەك لە پۆلدا هەڵەی كردبا و مامۆستا نەیزانیبا كێیە هەموومانی داركاری دەكرد، زیرەك و تەمبەڵەكان هەژارو دەوڵەمەندەكان، عەجول و ئارامەكان، لە قوتابخانەكانی ئەوكاتدا ئێسكەكانمان ئی كەسەكانمان و گۆشتمان ئی مامۆستا بوو، بۆیە زۆر زوو لە قوتابخانە بێزار دەبووین و سەد خۆزگەمان بە ماڵەوە دەخواست، كە پێشتر بەزیندانمان دادەناو راماندەكردە كۆڵان، بەڵێ گەمانی منداڵی كە خۆشترین ساتەوەختی ژیانە جێمان هێشت، بەڵام فێرە گەمانی راستەقینە بووین، ئەو گەمانە مەترسیدارانەی ژیانمانی لەسەر بەند بوو، جگە لە وانەكانی قوتابخانە دەبوو وانەی نیشتمانی و خۆشەویستی خاك لەوانی دی وەرگرین و هەر لەبەر كردن نەبوو دەبوو جێبەجێیان كەین، نەوەیەك بووین ئەركمان تا بڵێی قورس بوو.
گەورە بووین و گەیشتینە قۆناغی ناوەندی، ئەو منداڵەی دەساڵ لەمەوبەر جیرانمان بوو و لەبەر منی بێخەتا ماڵیان گواستەوە، بەیەك گەیشتینەوە، ئاخر ئەو وەك من گەورە ببوو، دەیتوانی راست و چەپی خۆی لێك جیا بكاتەوە، ئەو منداڵە كە بەگەنجی دیتمەوە، كەوتینە یەك پۆل و تەنانەت دواتر لە سەر یەك كورسیش دادەنیشتین، ئەو ناوی پشكۆ بوو، سەرەتا كە یەكتریمان دیت من بەترسەوە تەماشام دەكرد و بەراستی هەستم بەتاوان دەكرد، كەچی ئەو هات و تۆقەیەكی گەرمی لەگەڵ كردم و گوتی: دەزانم لەهیچ كام لەو گەمانەی منی تێدا بریندار بووم تۆ خەتات نەبوو، كەچی چەندی بە داكوبابم دەگوت دەیانگوت نا ئەتۆ خوت بە كۆڵانەوە گرتووە هەردەتەوێ بچیەوە وێ بۆیە بەرگری لێدەكەی.
دەی كەوتینە تەنیشت یەك و رۆژێك بردمەوە گەڕەكەكەی خۆمان و هەموو یادەوەریەكانی منداڵی بیر هاتەوە، شوێنی ددانەكەشم پیشاندا و زۆر پێكەنی، قۆڵی لە قۆڵم كرد و منی بردەوە ماڵی خۆیان و بە داكوبابی ناساندمەوەو سوێندی بۆ خواردن كە ئەمن هیچ خەتایەكم نەبووە، باوەڕیان كردو هەردووكیا ماچیان كردم، هەواڵی ماڵباتەكەیان پرسی و بەڵێنی سەردانیشیان دا.
لەبیرم چوو ئەوەتان پێبڵێم كە گەیشتینە قۆناغی ناوەندی لەجیاتی گەمان لەپاڵ خوێندن خەریكی سیاسەت بووین، ئەوكاتی رێكخراوەكانی شاخ رەگیان گەیشتبووە هەموو ماڵێك، هەموو قوتابخانەو پۆلێك، وەك قەڵەم و دەفتەر ببوونە پێداویستی، خۆ نەماندەزانی سیاسەت چییە كەچی دەمانكرد، چەندی داگیركەرەكان فشاریان لەسەرمان زیاتر با ئێمەش زیاتر دەچووینە نێو قوڵایی ئەو سیاسەتەوەی تێی نەدەگەیشتین، دەماندی لە ماڵەوەو لە قوتابخانەش هەر باس باسی بێگانەكان و چوونە شاخ بوو، تا رەگی ئەو سیاسەتە لەنێو خێزانەكان بڵاو بۆوە و گەیشتە نێو دەمارەكانمان، كچ و ژنەكانیش بەشدار بوون و كۆبوونەوەیان پێدەكرا، ئابوونەیان دەدا و كاغەزوماغەزیان پێدەگواستنەوە، ئەوەندەنا سیاسەت چۆ سەرتر و هزریشی داگیر كردین.
من و ئەو هاوڕێیەی منداڵیش تووشی سیاسەت بووین و لەبری گەمان بە كەلا و دارلاستیق و هەلوكێن، رۆژانە دەمانخوێند و شەوانەش لە كۆڵانەكان لەنێو بازاڕ و شوێنە مەترسیدارەكان چەك و نارنجۆكی راستەقینەمان بەكار دەهێنا، رەگی سیاسەت بەجۆرێك گەیشتبووە نێو خوێنمانەوە شەوانە دەكوڵی و دەبوو ساردی كەینەوە.
شەوێك لەو شەوە تاریك و تنۆكانە بەبێ چەك، بۆ چوساغی و رێ پاكردنەوە لەگەڵ ئەو برادەرە بۆ هێنانی پێشمەرگە بۆ نێو شار گەیشتینە شوێنی دیاری كراو، لەوێ پێیان گوتین كەس راینەگرتن؟
ئێمەش گوتمان نا كەسمان نەدی.
تومەز ئەوان دەیانزانی بۆسەی دووژمن هەیە بۆیە ئێمەیان بەناوەراستی شەقام بەڕێكرد و خۆشیان بە پەنای دیوارەكانەوە و دوور لە یەكتری بەدوومانەوە بوون، لەپڕ گوێم لە قیفێك بوو، ئێمەش فێر كرابووین لەوكاتانەدا نەجوڵێین، راوەستاین و هێشتا دەستمان بەرز نەكردبۆوە بوو بە تەقە رێك هەردووكمان خۆمان بەزەویدادا، بەچاوی خۆم دیتم چەند فیشەكێكی ئاگردار بەنێو ئێمەدا تێپەری، تەقە لە هەموو لایەكەوە وەك رێژنە باران دەباری، ویزەی گوللەكان بەسەر سەرمانەوە دەتگوت هێلانە زەردەواڵەن، هەرایەك بوو نەبێتەوە، پێشمەرگەكان بۆسەكەی دووژمنیان شكاند و چەند لاشەیەكیشیان لێبەجیما، هاتنە سەر ئێمەو تەماشایان كرد برادەرەكەم زۆر بەسەختی بریندارە و منیش فیشەكێك سەرچیغ رانی رووشاندووم، رێك لەمساتەدا هەموو بیرەوەری منداڵیم هاتەوە یاد، گریان ئەوكی گرتم و ئەگەر لەبەر پێشمەرگەكان نەبا بەجۆرێك دەگریام هەموو شارم ئاگادار دەكردەوە.
خەڵكی گەڕەك كە زانیان بۆسەكە تێكشكاوەو پێشمەرگەكان بانگی یەكتری دەكەن، تەواوی ماڵەكان رووناك بوونەوە، هەر لە بەردەرگای ماڵێك نازانم چۆن بوو بەڵام دەزانم جێبێكیان هێناو برادەرەكەم و من و دوو پێشمەرگەی برینداریان سوار كردو ئێمەیان بردە ماڵێكی نهێنی كە لە دەستە چەپی شار بوو، لەوێ خەریكی تیمار كردن بوون، پێشمەرگەیەك و برادەرەكەم شەهید بوون و رانی منیشیان پێچایەوە، لەوكاتەیدا شەرمم شكا و لەسەر برادەرەكەم زۆر بەكوڵ دەگریام، بیرم لە رابردوو دەكردەوەو ئازاری هەموو دنیا لەنێو دەمارەكانمدا قوڵپی دەدا، خۆزگەم دەخواست من بوومایەو ئەو تاقانەیە نەبا، رەنگی سپی سپی ببوو روومەتەكانیم دەلستەوەو هەرچیم دەكرد چاویم پێدانەدەخرا، هەستم بەتەنیاییەكی سەخت كرد، وەك ئەو رۆژەی ماڵی برادەرەكەم باری كرد و بەتەنیا مامەوە، هەستمدەكرد گوللەكان زۆر نامەرد بوون ئەوی پێكاوەو خۆیان لەمن پاراستووە، رێك لەوكاتانەدا بوو بابی بەچەك و تاقم تفەنگەوە گەیشتە سەر لاشەی كوڕە شەهیدەكەی و یەكەم كەس كە دیتی وەك برا بۆ كوڕەكەی دەگری من بووم، منیش بە دەموچاوێكی گریاناوی، بە تەوێڵێكی خوێناوی لەجیاتی ئارەقە فرمێسكی خوێنینم دەڕشت، چاوەڕێی ئەوە بووم بەهەموو هێزی هەروەك دەساڵ لەمەوبەر یەك زللەم لێدات و كەفوكوڵی خۆی بەمنداڕێژێ، كەچی باوەشی لێدام و گوتی:
كوڕم خۆ تۆ باشی؟
باوەشێكی گەرمی لێدام و لەجیاتی زللە هەردوو روومەتی ماچ كردم، هەستم بە فرمێسكەكانی كرد كە بەلاملمدا دێنە خوارێ، باوەشێك زۆر لە ئی بابم گەرمتر، زۆر لەئی داكم بەسۆزتر.
ئیدی منیش لەنێو تەنیایی خۆمدا خەریكی توانەوە بووم، شەرمم دەكرد من زیندووم و برادەرەكەم شەهید، هەستمدەكرد دەمارەكانم تیك دەئاڵێن و چیدی ناتوانم خۆم بەپێوە بگرم، خوێن و خەم بەسەرمدا زاڵ بوون و هۆشم لە خۆم نەما، كەچاوم كردەوە رۆژ ببۆوە و كەسەكانم لەسەرم بوون، كە تەواو هەموو روداوەكانم بیر هاتەوە هەستامەوەو بابم تەواوی رووداوەكانی بۆ باس كردم.
هەر ئەو رۆژە بۆ ئەوەی كەس هەست بە بزر بوونم نەكا چوومە قوتابخانە هەر كە خۆم بە پۆلەكەمدا كرد دیتم هەموان دوو دوو لەسەر كورسیەكانیان دانیشتبوون تەنیا جێگەی پشكۆ چۆڵ بوو، قوڵپی گریان ئەوكی گرتم و بەبێ ئیزن هەستام و رۆیشتم، پێش ئەوەی بگەمەوە ماڵێ هەر لە كۆڵانەوە فرمێسكی تەنیایی رژان و غەمێكی قوڵ ناوەوەی هەڵتەكاندم، هەتا ئێستاشی لەگەڵدابێ ئەو فرمێسكانە كە ناومناون (فرمێسكی تەنیای ) زۆر جاران لەخۆیانەوە دێنە خوارێ، هەر منداڵێك ببینم كەلایەن دەكا، یان هەلوكێن و قەراقەرایەن فرمێسكەكان دەڕژێن، خۆ كە بەفر دەبارێ ئەمن هەر لە ژوورێ نایەمەدەرێ و هەر منداڵێكیشم بڵێ ددانم دەلەقێ گوێی خۆم دەگرم و ئەوناوە جێدێڵم.
ئێستا تاقە یادگاری پشكۆ لەلای من ددانە وردیلەكەیەتی كە بەتەنیشت ددانەكە منەوە خەوتوەو زوو زوو سەردانی دەكەم.

Salam Omar

ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.