Skip to Content

بالێک، بەڵام بە زمانی تڕومبێلان.. نووسینی: ئامانج شێروانی

بالێک، بەڵام بە زمانی تڕومبێلان.. نووسینی: ئامانج شێروانی

Closed
by تشرینی یه‌كه‌م 8, 2025 General


لە کۆڵانی ئیسکان بۆ خۆم پیاسەم دەکرد، لەم دوکان ڕادەوەستام شتێکم سەیر دەکرد، لەوەی تر چایەکم دەخواردەوە. لەوەی تەنیشتی تەسبێحەکی بە ئاڵای کوردستانم دەکڕی. لەپڕ شتێکی زەبەلاح لەپشتم قووت بووەوە و بە دەنگێکی تیژی ناخۆش ڕێک وەک نەفخی سووڕ گوێیەکانمی کاس کرد. بەترسەوە ئاوڕێکی دواوەم داوە، چی ببینم!‌ جێبەکی ئێسکگرانی جامڕەش، هەرای لێم دەکرد تا لەپێشی ون بم، بەڵکوو جەنابی لەم سەری کۆڵانەکەوە بچێتە ئەوسەری!

من و هەزارانی وەکوو من ڕۆژانە بەم کۆڵانەدا دەڕۆین، بەڵکوو شتێک بکڕین، شتێک بخۆین یان بخۆینەوە. هەر بابایە و خۆی بەم کۆڵانەدا دەکات و بڕێک پارە دەخاتە بازاڕەوە. کۆڵانی لەم جۆرە بڕبڕەی پشتی ئابووریی شارەکانە. هەندێک جاریش، هەندێکی چی گەلێک جاران، تڕومبێلێک بە وێدا تێپەڕ دەبێت، نە شتێک دەکڕێت، نە بڕێک پارە دەچوێنێت، نە سوودێک دەگەیەنێت. بە هۆڕن و قیڕەقیڕیشی زەندەقی ئەم خەڵکە پیادەیە دەبات. لە کۆڵانێکی وەکوو ئیسکان، تڕومبێلەکان جێیان نابێتەوە، ئەمە بۆ پیادەکانە، بۆ مرۆڤەکانە، نەک تانک و تڕومبێلەکان.

خۆ ئەگەر ئەم ئیسکانە لە شارێکی وەکوو پاریس یان ڕۆما بوایە، ئەوا دەمێک بوو ڕێی تڕومبێلانیان لێ گرتبوو. چەندی زۆرتر مرۆڤ بهێنیتە ئەم کۆڵانە، ئەوەندە زیاتر پارە دەخەیتە نێو بازاڕاوە. ئەوە مرۆڤەکانن کە جموجۆڵی ئابووریی لەگەڵ خۆیان دەهێنن، نەوەک تڕومبێلەکان. ئەم نێو کۆڵانە لەبری ئەوەی قیڕتاوکراو بێت، دەکرێت چەند کۆشک و دوکانێکی چکۆڵەی تری لێ قیت بکرێتەوە، تا هێشتا زیاتریش جممەی بێت!

ئای ئەگەر من شارەوانی پیرە هەولێرێ بوومایە، ئیسکان و بن قەڵاتم دەکردە بەهەشتی پیادان و تڕومبێلەکانیشم لێ پاس دەکردن.

Previous
Next
Kurdish
Powered by TranslatePress