Skip to Content

نامه‌كانی ئیشق  هه‌موو به‌یانییه‌ك … سه‌ردار جاف

نامه‌كانی ئیشق هه‌موو به‌یانییه‌ك … سه‌ردار جاف

Closed
by ئازار 15, 2019 General

           بۆ  .........  رۆزه‌ ،  ژنی شۆخ و شه‌نگ و خان و مان.

1 – ئه‌م به‌یانییه‌ روحی چیمه‌نی كیژ و كوڕان بۆنی ئه‌وینی گرتووه‌، ئاوه‌زم سه‌راپا شیلاوی ئیشقی تۆی لێوانلێوه‌، له‌ سه‌ر گوێسه‌بانه‌ی ڤالانتاینه‌وه‌ جریوه‌ی ئه‌وینم نێرگزه‌جاڕێكی یه‌قین و ئه‌به‌دییه‌، په‌نجه‌ ته‌زیوه‌كانت بنێ نێو له‌پمه‌وه‌، با وه‌ك جه‌سته‌ت له‌ ئامێزم گه‌رمیان دابێنم، لێوه‌كانت به‌ قه‌د و قامه‌تی ماچا هه‌ڵزنێنه‌، شنه‌ی سپێده‌ دڵسۆزترین كه‌سی منه‌ به‌وی بسپێره‌ بۆم دێنێ، نه‌كه‌ی ئه‌و ماچه‌ پڕ شیلانه‌ی هه‌نگوینی به‌ بادا ڕه‌وانه‌ بكه‌ی نه‌با ببێته‌ گێژه‌ڵوكه‌ و ئه‌و چاوه‌ ڕه‌شانه‌ی چاوه‌نواڕیم كاڵ بكاته‌وه‌، هێنده‌ ئاشقتم نه‌ك به‌ خه‌یاڵ گه‌ره‌كمه‌ به‌ كرده‌نیش هه‌میشه‌ ده‌ست له‌ملانێم بكه‌ی، غوربه‌تیم به‌ نیگای سۆماكانت ده‌تارێ، چاوه‌ڕوانیم به‌ بزه‌یه‌كت ده‌بێته‌ خانه‌خوێی جه‌ژن و هه‌ڵپه‌ڕكێ داده‌به‌ستێ، به‌ گه‌وره‌یی و جوانی ئه‌م سپێده‌ كاتێ پێڵوی چاوه‌كانت هه‌ڵده‌بڕی و باڵه‌كانت ڕاده‌وه‌شێنی بیری ماچه‌كانی لێوه‌ به‌ ترسه‌كانم بكه‌وه‌، یه‌كه‌مین جێ ژوانی ماچ گه‌واهیمان بۆ ده‌دا، ئه‌و ده‌مه‌ی داچه‌میمه‌وه‌ ده‌سته‌كانتم ماچ كرد ، سه‌راپا هه‌موو له‌زه‌ت و شیله‌ی ئیشقی خۆم به‌ سه‌ر له‌پی ده‌سته‌كانتان باران و شۆڕ بوونه‌وه‌ به‌ سه‌ر په‌نجه‌كانت، ئه‌م به‌یانییه‌ بیری یه‌كه‌م ئاوێزان بوونمان له‌ باڵه‌فڕخانه‌كه‌ بكه‌وه‌، چ هه‌ستێك بوو شاگه‌شكه‌ی كردین، ئه‌م به‌یانییه‌ بیری ئه‌وكه‌ پڕ له‌ گریانه‌كه‌م بكه‌وه‌ كه‌ نه‌م ده‌ویست له‌ من بچی، بیری ئه‌و نامه‌ی ڕۆژی دوایی بكه‌وه‌ سه‌راپا ژینمانی گۆڕی ، ئه‌و ده‌مه‌ په‌نجه‌كانت به‌ تاسوقه‌وه‌ وه‌ك ناخت دوان، گوتیان : )) كه‌ هاتم توند له‌ باوه‌شتم بگره‌ )) به‌یانیت به‌ یادی یه‌كه‌م ئاوێته‌بوونی یه‌كتریمان جوانتر بكه‌ ، به‌یانیت گوڵ گوڵه‌كه‌م ، له‌ گوڵ گوڵتر .
ئه‌ڵمانیا
14 / 2 / 2019

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish