نامه‌كانی ئیشق هه‌موو به‌یانییه‌ك -3-… سه‌ردار جاف
6 – به‌یانییه‌ك گوڵه‌كان یه‌كدی ده‌دوێنن، باغه‌وان له سۆراغی گوله‌باغێكی بۆنداردا ، حه‌زی منیش عه‌وداڵی گوڵه شلێرێ له شلێری پێنجوین جوانتر و سروشتتر و فێنكتر و ناسكتر و ڕه‌ونه‌قتر، وه‌لێ هه‌موو ئه‌و جوانیانه ناگه‌نه بستێك له باڵای شۆڕه بێیه‌كه‌ی گوێ چه‌می ئه‌وینم، ئه‌و شۆڕه ژنه‌ی مێخه‌كی ناگاتێ، به‌یانییه‌ك ته‌می كزه‌ی جه‌رگم بڕوێنێته‌وه خۆری جوانی سه‌ره‌تاتكێی ڕێی كانی و نێو ڕه‌زان بۆ یه‌ك بڵێینه‌وه، په‌خش بین به سه‌ر جیهانا كیژان و كوڕان كورد به‌ر له‌وانی دی له به‌رۆكی ڕێی ئه‌وینی خۆیانمان بده‌ن، له به‌یانییه‌كدا سه‌دام نه‌ی بێ، قاله‌مه‌ڕه به شمشاڵی بلورینی ئاوازی ژیانێكی ده‌سله‌ملانێمان و به په‌نجه‌كانی بۆ بكاته گۆرانی، له نێو سروشت و چه‌م و دۆڵی ڕاوگان و گۆخڵانا سه‌دا بداته‌وه، دڵان به كامی خۆیان ئاسووده بن، ژیان به نوێبوونه‌وه ختوكه بدرێ ، چاوه‌كان به ڕوونی ڕوو له ئاسۆ بن، ئیشقی ئێمه‌یش جوانتر له جاران له قه‌ڵبه‌زه‌ی تاڤگه‌ی خۆیدا بێ گوڵه‌كه‌م له گوڵ گوڵتر .
7 – نازانم ئه‌م به‌یانییه له میلۆدیم یا میوانخانه‌ی بابان، لێوانلێو پڕم له قاوه ، تاڵی قۆرخی كردووم، لێوه هه‌نگوینییه‌كانی سێبووریت نه‌باتیم ده‌داتێ و تاڵی مه‌حوو ده‌كاته‌وه، ئه‌و ئیشقه له دوندی ژیلوانه‌وه بۆ چاڵه‌وا و دۆڵی جافایه‌تی شۆڕ ده‌بێته‌وه رووه‌و باكوور ملی هه‌نجیره ده‌گرێ تا له ده‌م زێی دوكان دڵی به كوڵ و سوتاومان فێنك دابێنێ، دڵێك بۆ خه‌می یه‌ك نه‌بێ ژیانی لێته‌حریمه وه‌ك ماره بڕینی خوشك و برا، راسته به‌یانییه‌كی غوباراوی دوای تۆ هه‌ڵده‌گیرسێ و ئافاتێك ده‌نێته‌وه و منی سه‌ره‌ڕۆ خۆمی ده‌ده‌مه به‌ر و تا توونی بابام به‌رێ، هه‌ر كات ئومێدی هاتنه‌وه‌ت نه‌بوو، ئه‌وه به‌خت و چاره‌مه، ده‌نا تۆ هه‌ر لای من باڵا ده‌كه‌ی باڵا گوڵه‌كه‌م ، له گوڵ گوڵتر .
ئه‌ڵمانیا
25 و 27 / 2 / 2019
