ترامپ ده‌ڵێ په‌كه‌كه خراپتره له داعش. منیش ده‌ڵێم ئه‌و هه‌ڵه‌یه هه‌روه‌ها من توركم.
نووسینی: توونه به‌كله‌ڤیك *…….
وه‌رگێڕانی: گۆران عه‌بدوڵڵا …….
من توركم و خه‌ڵكی ئیدرنه ( Edirne )م. ژیانی خۆم ته‌رخان كرد بۆ سیاسه‌تی وڵاته‌كه‌م. بۆ چه‌ندین ساڵ خزمه‌تمكرد له حكومه‌ته‌كه‌ی ڕه‌جه‌ب ته‌یب ئه‌ردۆگان، بڕوام وابوو پارتی داد و گه‌شه ده‌توانێت گه‌شه‌ی ئابوری و ڕیفۆرمی سیاسی وه‌دیبێنێت.
له‌گه‌ڵ ئه‌وه‌شدا ئه‌م حكومه‌ته شێوازێك له سیاسه‌تی پیاده‌كرد من ناتوانم لێخۆشبم. ئه‌ردۆگان هێزی خۆی ده‌سه‌پێنێت له ڕێی زوڵم و زۆرو هه‌روه‌ها له‌سه‌ر حیسابی خه‌ڵكی ساده. ئه‌و كارناكات بۆ به‌رژه‌وه‌ندی خه‌ڵكی توركیا، ته‌نانه‌ت بۆ حكومه‌تی توركیاش – به‌ڵكوو ته‌نها بۆ خۆی. ئه‌و گۆڕانكارییانه‌ی كه بڕوام هه‌بوو چه‌ند ساڵ له‌مه‌وپێش ڕووبدات، به ڕه‌فتار و هه‌ڵسوكه‌وته‌كانی هه‌مووی له گۆڕنان.
له‌مه ئاشكراتر ده‌بێت چی بێت هه‌ستان به هێرشێكی توندو تیژی بێ مانا بۆ سه‌ر باكوری ڕۆژهه‌ڵاتی سوریا. له‌به‌رانبه‌ر ئابورییه‌كی داڕما و ئۆپزسیۆنێكی شێلگیردا، ئه‌ردۆگان له ڕێی شه‌ڕه‌وه ده‌یه‌وێت ده‌سه‌ڵاتی خۆی بسه‌پێنێت. سوپای توركیا هیچ پێشڕه‌وییه‌كی نه‌كردووه، ئه‌وه‌نه‌بێت سه‌دان كه‌س له خه‌ڵكی سیڤیل كوژران و به‌هه‌زارانیش ئاواره‌بوون به هۆكاری بۆمبابارانی كوێرانه‌وه. هه‌موو ئه‌وانه‌ی به‌رهه‌ڵستكاری سیاسه‌ته‌كانیان ده‌كرد له توركیا خرانه زیندانه‌وه ته‌نها به هۆكاری ئه‌وه‌ی وتیان ئه‌م شه‌ڕه بۆ! ئاكامه‌كانی ئه‌م شه‌ڕه هه‌ڕه‌شه‌یه بۆ سه‌ر ئاشتی و سه‌قامگیری و دیموكراتی له ناوچه‌كه‌دا بۆ ده‌یان ساڵی داهاتوو.
هه‌میشه بڕوام وابووه‌و به‌لامه‌وه گرنگ بووه به ئاشكرا دژ به‌م دوژمنكارییه قسه‌بكه‌م. له‌ساڵی ٢٠١٨ له ئه‌نقه‌ره‌وه بۆ دیاربه‌كر زیاتر له هه‌زار كیلۆمه‌ترم به پێ بڕی داواكاربووین كێشه‌ی ده‌وڵه‌ت و گه‌لی كورد به ئاشتیانه چاره‌سه‌بكرێت. به‌پشت به‌ستن به‌و ئه‌زموونه پێم وایه ده‌توانم كاری زۆرتر بكه‌م بۆ تێكشكاندنی ئه‌و گریمانانه‌ی كه ئه‌م شه‌ڕه خۆی له‌سه‌ر بنیات ده‌نێت.
من توركم. فه‌رمانبه‌رێكی ده‌وڵه‌تی بووم. بڕوام وایه پارتی كرێكارانی كوردستان PKK كه له لایه‌ن سه‌رۆك ترامپ ه‌وه وا پێناسه‌ی كرد كه له داعش خراپترن، منیش ده‌ڵێم ئه‌وان ڕێكخراوه‌یه‌كی تیرۆریست نین.
بۆ ده‌یان ساڵ سه‌ركرده توركه‌كان وه‌ك هه‌ڕه‌شه‌یه‌ك PKK تیرۆریسته یان به كار هێنا وه‌ك بیانوویه‌ك بۆ هه‌موو كاره وه‌حشیانه‌كانی ده‌وڵه‌ت دژ به خه‌ڵك، هه‌موو ئه‌و پێشێلكاریەکیان کرد دژ به مافی مرۆڤ و یاسا نێوده‌وڵه‌تێكان. وامان بیر ده‌كرده‌وه هه‌موو كورد هه‌ڕه‌شه‌ن به‌هۆی PKK ه‌وه، به بێ ئه‌و شتێك نابێت ناوی كێشه‌ی كورد بێت.
ئه‌وه‌ی كه نامانده‌زانی ئه‌وه بوو كاتێك ئه‌م بزووتنه‌وه‌یه درووست بوو به ملیۆنه‌ها ژن و پیاو و مناڵی ئه‌م گه‌له به هۆكاری سیاسه‌ته‌كانی ده‌وڵه‌ت خاوه‌نی ناسنامه‌ی تایبه‌تی خۆیان نه‌بوون. هه‌رگیز فێری ئه‌وه نه‌بووین بۆچی خه‌باتی چه‌كدارییان ده‌ستی پێكرد؟ ڕابه‌ره سیاسێكانیان بۆچی خرانه زیندانه‌وه و ئازاردران؟ بڕیاری دامه‌زراندنی ڕێكخراوه‌ی سیاسی به دڵنیاییه‌وه ئه‌وكاته درا كه ده‌یان ساڵ بوو ده‌وڵه‌ت به‌وپه‌ری توندوو تیژییه‌وه سه‌ركوتی ده‌كردن. ئێمه هه‌رگیز دان به‌وه‌دا نانێین هه‌موو ئه‌و هه‌وڵانه‌ی كه ده‌یه‌وێت له ڕێی هێزه‌وه خه‌ونی كورد پێشێل بكات، هه‌موو ئه‌وه وا ده‌كات هێز و پشتیوانیان زیاتربێت نه‌ك كه‌متر.
حكومه‌ته یه‌ك له دووای یه‌كه‌كانی تورك هەمیشە ڕێگا چاره‌ی سه‌ربازییان هه‌ڵبژاردووە له‌گه‌ڵ ترساندنی خه‌ڵك، چونكه نایانه‌وێت دان به هێزه سیاسییه‌كانی تردا بنێن، بۆیه ئه‌و ململانێیه هه‌رده‌بێ رووبدات.
پیاو و ژنه گه‌نجه‌كان ماڵه‌كانیان جێناهێڵن بۆ شه‌ڕێكی وه‌حشیانه‌ی دوورو درێژ ئه‌گه‌ر بڕوا بكه‌ن بژارده‌یه‌كی تریان هه‌یه. ئه‌و كاتانه بژارده‌ی شه‌ڕ هه‌ڵده‌بژێرن كاتێك به‌به‌ر چاویانه‌وه لادێكانیان ده‌سوتێنرێت، نوێنه‌ره هه‌ڵبژێردراوه‌كانیان لاده‌برێن یان ده‌خرێنه زیندانه‌وه، زمان و كه‌لتوریان لێ قه‌ده‌غه ده‌كرێت. ئه‌وه ته‌نها ده‌وڵه‌ته هه‌ڵده‌ستێ به‌م كارانه، زیندانیكردنی هه‌زارانیان به ناوی پروپاگه‌نده‌ی تیرۆره‌وه، ئه‌م ڕه‌فتارانه باشترین خزمه‌ت به PKK ده‌كات بۆ په‌یوه‌ست بوونی خه‌ڵك پێیانه‌وه.
له‌به‌رانبه‌ردا، لایه‌نه‌كه‌ی تر خوازیاری چاره‌سه‌ركردنی كێشه‌كان بووه له ڕێی ئاشتییه‌وه. له پێش نه‌وه‌ته‌كانه‌وه تاوەکوو ئێستا چه‌ندین جار ئاگربه‌ستیان ڕاگه‌یاندووه و به‌رده‌وام داوای دیالۆگیان له حكومه‌ته‌كه‌مان كردووه. سه‌ركرده‌كانیان ڕۆشنن داوای چی ده‌كه‌ن، كێشه‌كه له‌به‌ر چاوه ماف و دان پێدانانه ئه‌مه‌ش به هێزی سه‌ربازی چاره‌سه‌ر ناكرێت.
پێیان وتین لێیان بترسێین و ڕقمان لێیان بێت چونكه ئه‌وان جوداخوازن. ئێستا به دڵنیاییه‌وه وه‌ك توركێك ده‌توانم بڵێم، ئه‌وه سیاسه‌ته‌كانی ده‌وڵه‌ته بوونه‌ته سه‌رچاوه‌ی ڕق و جیاوازی له نێوانی خه‌ڵكی ناوچه‌كه‌مان. ئامانجی بزوتنه‌وه‌ی كوردی كه چڕبۆته‌وه له پلۆرالیزم و لامه‌ركه‌زیه‌ت ته‌نها ئومێده كه بتوانێت ئه‌م وڵاته له‌گه‌ڵ یه‌كتر كۆبكاته‌وه.
كۆمه‌ڵگه‌ی نێوده‌وڵه‌تی تاوه‌كوو ئێستا به‌شێك بوونه له كێشه نه‌وه‌ك چاره‌سه‌ر. ساڵانێكی زۆر پشتگیری شه‌ڕیان كردووه دژ به كورد، بێ ئه‌وه‌ی پرسیارێك بكه‌ن له‌و باره‌وه. پشتگیری وڵاتان بۆ شه‌ڕی توركیا دژ به خواستی سیاسیانه‌ی كورد، به‌تایبه‌تیش له‌لایه‌ن ئه‌مریكاوه، هیچ نییه جگه له پاڵپشتیكردنی ده‌سه‌ڵاتداران و له به‌رانبه‌ریشدا بێهێزكردنی ئه‌و به‌ره‌یه‌ی كه كار بۆ هێنانه‌دی ئاشتی ده‌كه‌ن. هه‌ر به‌م هۆكاره داوا له حكومه‌تی ئه‌مریكا ده‌كه‌م كه ناوی PKK له لیستی ڕێكخراوه تیرۆریستێكان لابەرێت.
ده‌ستبه‌رداربوون له‌و چوارچێوه ته‌سكبینیانه‌ی دژه تیرۆریزم و سووربون له‌سه‌ر تێگه‌شتنێكی ڕاسته‌قینه بۆ ئه‌م كێشمه‌كێشه، ته‌نها ڕێگه‌یه بۆ گه‌شتن به دیموكراسی و ئاسایش و كۆتایهێنانێكی ڕاسته‌قینه به‌م شه‌ڕه. ئه‌گه‌ر من توانیبێتم گێڕانه‌وه‌كانی ئه‌و كۆمه‌ڵگه‌یه كه تێیدا له دایك بووم، ئه‌و حكومه‌ته‌ی كه كارم له‌گه‌ڵدا كرد سه‌رده‌مانێك ڕه‌تكردبێته‌وه، كه‌واته هۆكارێك نییه ئه‌وانی تر نه‌توانن هه‌مان كاری من بكه‌ن. ئه‌گه‌ر نا هه‌موو خه‌ڵكه‌كه‌م و وڵاته‌كه‌شم له‌وه زیاتر ناتوانن ئه‌و باره هه‌ڵگرن.
Nov 25,2019
- *Tuna Beklevic – نووسه‌ر و چالاكوانێكی به‌ڕه‌گه‌ز تورك ه‌و ئێستا له له واشینتن نیشته‌جێیه.
Goran Abdullah
نووسەر و رۆژنامەنووس نەوزاد مدحت ناسراو بە (گۆران عەبدوڵڵا) لە شاری کەرکوک لە دایک بووە خوێندنی لە( ئامادەیی ثورە) تەواو کردووە، دوواتر لە پەیمانگای هونەری موسڵ بەشی موحاسەبە وەرگیراوە. بەهۆکاری نەچوونە جەیشی شەعبی لە دووا قۆناغ فەسڵکرا. وەک کەسێکی سیاسی و ناڕازی درێژەی بە کاری سیاسی خۆی دا، لە پاش ڕاپەڕین لە شاری هەولێر یەکێک بووە لە دامەزرێنەرانی یەکێتی بێکاران و ئەندامی دەستەی نووسەرانی رۆژنامەی( دەنگی بێکاران) بووە تا ناوەڕاستی ساڵی ١٩٩٥. لە ١٩٩٦ ەوە نیشتە جێی وڵاتی کەنەدایە. لە ١ی حوزەیرانی ٢٠٠٢ وە ماڵپەڕی دەنگەکانی(www.dengekan.com) وەک رۆژنامەیەکی ئەلیکترۆنی رۆژانە دامەزراندووە وە تا ئێستاش بەردەوامە. لە ٢٠٠٥ بەشی وێب پەیج دیزاینی لە (Durham computer & Business college) تەواوکردووە. لە درێژەی کارە رۆژنامەوانێکەیدا سەرباری بڵاوکردنەوەی بابەتە سیاسی و ئەدەبی و کەلتورێکان چەندین مەلەفی جۆراو جۆری کردۆتەوە سەبارەت بە بارودۆخی سیاسی عێراق و کوردستان لە بوارەکانی دیموکراتی، ژنان، گەندەڵی و ئازادیدا وە چەندین چاوپێکەوتن و گفتوگۆو کۆڕی وەک ماڵپەڕی دەنگەکان ئەنجام داوە. وە بەشێک لە لەو چاوپێکەوتنانە لە شێوەی کتێب چاپکراون وەکو: مارکس لەمڕۆدا، بەزمانی کوردی، بزووتنەوەی سۆشیالیستی لە کەنەدا بە زمانی ئینگلیزی سەرباری کاری رۆژنامەوانی بەشداربووە لە دامەزراندنی رێکخراوەی (پەیوەندی کوردی دژی جینۆساید) کە هەستان بە رێکخستنی چەندین بۆنە لە شاری تۆرۆنتۆ و دەوروبەری لە پێناو ناساندنی جینۆسایدی گەلی کورد بە دەوڵەتی کەنەدا.
