میرات … سەلام عومەر
کورسیەکەی باپیرم ماوە
کە بابم لەسەری دادەنیشت
ئێستا
ئەوان نەماون و
منیش ناوێرم
لەسەر کورسییەک دانیشم
کە بۆ لای وانم دەبا.
٭٭٭٭٭
بابم
پێڵاوە بن قاڵتاغیەکەی
باپیرمی لە پێ دەکرد
تا
دەنگی پێیەکانی باوکی هەر بمێنێ
ئێستا
ناوێرم ئەو پێڵاوانە لەپێکەم
تا
پێم نەڵێن وەزیر
یا پەرلەمانتارو بەرپرس.
٭٭٭٭٭
ناو بالیفەکەی بابم
پڕ لە پارە بوو
لە باپیرمەوە بۆی مابۆوە
ئەویش
هەمووی بۆمە بەجێهێشت
ئێستا ناوێرم دەریانبێنم
تا
پێمنەڵێن دز
Salam Omar
ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.
