گۆچان … سەلام عومەر
گۆچانەكەی بابم
كە ئی باپیرم بوو
كەوتۆتە ناو دەستی من و
رەمدەژێنێ
هێند دەجوڵێ
جەستەو دەست و
روحی نامۆم دەلەرزێنێ
دەیهاوێمە نێو نوێنەكان
دیوەكان و…..
تەواوی پەنجەرەكان و
بنمیچی خانوەكەشم دەبزوێنێ
ئەو گۆچانە
ئی باپیری باپیرم بوو
لە شانەدەر دۆزیانەوە
كە دەشیبەمەوە ناو چیا
تاشەو تاوێر
بەسەر یەكدا دادەخزێنێ
هێڵە كۆنكرێتیەكانی تخوب
ستوونە سەرابیەكان
دادەڕزێنێ.
گۆچانەكەی بابم
هاتۆتە نێو دەستی من و….
كەوی نابێ
ئارام ناگرێ
راناوەستێ
گۆچانەكەم
نەقەت دەبێتە ئی من و
نە دەبێتە قۆچان و
ناشچێتە نێو هیچ گرێبەستێ.
Salam Omar
ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.
