دوای من و تۆ … شیعری: نەوزاد بەندی

دوای من و تۆ
زۆر کورسی خاڵیی مانەوە ..

زۆر کوپ تۆز گرتنی ..

زۆر ڕێگا ،
لە چاوەڕوانی دوو جێ پێدا ،
ڕیشیان سپی بوو ..

زۆر سەعات ،
له داخا وەستان ..

زۆر شەماڵ ،
گەرم داهاتن ..

زۆر چرۆ لە بەهار یاخی بوون و
لە پاییزێکی دوورە دەستا ،
هەڵوەرین ..

دوای من و تۆ ،
شیعریش تاقەتی گەڕان و ..
تەماشاکردنی
خۆر ئاوابوونی نەما ..
خۆریش بە بیجامەیەکەوە ،
خۆی وونکرد لەناو باوێشک و
تۆز و تەما …

دوای من و تۆ
ئامرازی واوی پەیوەندی
سەری لێشێوا و
نەیزانی ئیشی چی بکا ..
چووە لیستی بندیوار و
هەرچیەکی هەبوو فرۆشتی
کردیە دەستی دوو قاچاخچی ،
تا بیخەنە نێوانیان و
لەم خاکی بێ من و تۆییەی
دوور خەنەوە ..

دوای من و تۆ
بۆ یەکەمجار لە مێژووی دەم و لێوەکان ،
پێکەنین ڤیزەی گریانی وەرگرت …
ئازادی عەریزەیەکی دا ،
بۆ دابینکردنی دوو مەتر
لە زیندانا …
ئاشتی چووە خولی کۆنفۆ و
گوڵ دوو سەد دۆلاری دا
بە خولێکی دوو هەفتەیی ،
بە ناوی :
چۆن چۆنی خۆت ئەکەی بە دڕک ..

Nawzad Bandy