Skip to Content

شەڕە وەرگێڕان … موحەممەد گەڵاڵەیی

شەڕە وەرگێڕان … موحەممەد گەڵاڵەیی

Closed
by ئه‌یلول 11, 2020 General, Opinion


لە کوردستان و لەماوەی کەمتر لە سێ مانگ دا، کتێبەکەی (جۆن بۆڵتن: ژووری ڕووداوەکان) ڕاوێژکاری پێشووی ئاسایشی نەتەوەیی ئەمەریکا لەلایەن سێ وەرگێڕ یان سێ گروپ لە وەرگێڕان بۆ زمانی کوردی وەرگێڕدراوە، ھەڵبەتە جێگەی دەستخۆشییە، بەڵام لە رەخنەگرتنێکی بەویژدانانە بۆ ئەم پرۆسەی وەرگێڕانی یەک کتێب لەلایەن سێ دامەزراوە یان دەزگای چاپ و پەخش دەربازی نابێت.
لەسەرەتادا؛ دەمەوێت ئەوە بڵێم: ھەر کەسێک و دامەزراوەیەک ئازادە چ کارێک بکات و چۆن بیر دەکاتەوە و چ نووسینێک لە زمانەکانی تر وەردەگێڕێ..؟ بەتایبەتی لە وەرگێڕانی یەک کتێب بۆ دوو تا سێ جار لەلایەن سێ دامەزراوەی جیاوە.
بەڵام بۆ ئەم بارودۆخەی ئێمەی کورد قسەی جیاوازتری دەوێت و ھەڵیشدەگرێت لەسەری بوەستین، بۆیە ئەم زیانانەی ھەیە.
یەکەم: بەھەدەرانی کات.
دووەم: بەھەدەرانی سەرمایە(پارە).
سێیەم: بەھەدەردانی توانست و توانای وەرگێڕان.
چوارەم: ھەڵاوساندنی بازاڕ بە یەک کتێب لەلای سێ وەرگێڕی جیاواز یان سێ گروپ لە وەرگێڕانی ئازیز.
بۆیە دەکرا ئەم ھەمو توانستە بۆ کتێبی زانستی یان لێکۆڵینەوەی جددی لە زمانەکانی تر خرابایە مەیدانی کارکردنەوە، باشتر جێگەی دەگرت، وا باشترە دامەزراوەکانی چاپ و پەخشکردن پەیوەندییەکی دۆستانەیان ھەبێت، کاری جددی و ھاوبەش بکەن.
بۆ زانیاری خوێنەران؛ ھەر ئەم کتێبەی جۆن بۆڵتن لە وڵاتی لوبنان بۆ سەر زمانی عەرەبی وەرگێڕدراوە بۆ ٢٢ دەوڵەتی عەرەبی و ئەوانەی بە عەرەبی دەخوێننەوە، لەلایەن (شرکة المطبوعات للتوزیع و النشر). تا ئێستا ئەمەیە، جا دواتر نازانم چ دامەزراوەیەکی تر بۆ زمانی عەرەبی وەریدەگێڕێ، بەڵام دامەزراوەی المطبوعات لەناوی جیھانی عەرەب دا، جێگەیەکی سەنگین و دیاری ھەیە بۆ ڕووماڵکردن و بڵاوکردنەوەی کتێب لە جیھانی عەرەب دا زۆر بەھێزە، قازانجێکی زۆر دەکات.
بەڵام براینە ئەم سێ کتێبە کە بۆ زمانی کوردی کرمانجی ناوەڕاست وەرگێڕدراوە، تەنھا لە شارەکانی: ھەولێر، سلێمانی، ھەڵەبجە، کەلار، سۆران، ڕانییە و بەشێک لە بادینان دەخوێندرێتەوە، ئەگەریش ڕێگەی پێ بدرێت بۆ خۆرھەڵاتی کوردستان بنێردرێت ئەوا لە شارەکانی: مەھاباد، سنە، سەقز، مەریوان دەخوێندرێتەوە.
وا باش بو ئەم کتێبە وەرگێڕدرابا بۆ سێ دیالێکتی سەرەکی لەناو کورد دا، کە زۆرترین سوود و دەنگدانەوەی دەبو، ئەو دەزگایانەی بەم کارەش ھەستاون سوودمەندی سەرمایەی زیاتر دەبون.
یەکەم: بۆ کرمانجی ناوەڕاست.
دووەم: بۆ کرمانجی ژووروو بەپیتی لاتینی یان عەرەبی.
سێییەم: بۆ زازاکی یان لوڕی.
بەڵام گرنگە ئەمە لەلایەن وەزارەتی ڕۆشنبیری بکرێتە مەرجی پێشوەختە بۆ دەزگاکانی چاپ و پەخش، کە وەرگێڕانی یەک کتێب لەلایەن چەندین دامەزراوەی چاپ و پەخش قەدەغە نییە، بەڵام ھەر یەکێکیان بۆ دیالێکتێک وەربگێڕێت و پاڵپشتی مادی و مەعنەویان بکات..
ئەمەش چەند سوودێکی ھەیە:
یەکەم: زمانی کوردی بەھێزتر دەکات و خوێنەری زیاتر دەبن.
دووەم: سەرمایە لە پارچەکانی تری کوردستان بەگەڕ دەخرێ لە ڕووی مرۆییی(وەرگێڕەکان) و ھەمیش لەڕووی ماددی و قازانج بۆ دامەزراوەکانی چاپ و پەخش زیاتر دەبێت نەک کەمتر.
سێیەم: کتێبی کوردی بەو واقیعەی ھەیە کە بەسەر کوردستان دا فەرزکراوە، خوێنەری زۆر کەمە، بەڵام ئەگەر کتێبێک بەسێ دیالێکت بێت یان وەربگێڕدرێت خوێنەری زیاتر دەبێت.
چوارەم: کتێبی کوردی لە قەیرانی کەمی خوێنەر رزگاری دەبێت.
پێنجەم: ئێمە میللەتێکی پەنچا ملیۆنین، توخوا شەرم نییە، تیراژی کتێبەکانمان ٥٠٠-١٠٠٠ دانە بێت، ئەویش ھەمو نافرۆشێت و وەرگێڕ و نووسەرەکانمان لە ھەژارترین نووسەران و وەرگێڕەکانی دونیان. لەبەرئەوەی کتێب لەھەر پارچەیەکی کوردستان بە یەک دیالێکت چاپ و بڵاودەکرێتەوە.
ئەگەر بۆ سێ دیالێکتی سەرەکی بێت بازاڕگەرێکی باشی ھەبێت، نوسەر و وەرگێڕەکان باشتر داھێنان دەکەن و سەرمایەکی باشیان دەبێت، ژیانێکی شایستەیان دەبێت.
لەکۆتایشدا من لەم شەڕی وەرگێڕانە زەرەرمەندبوم، ئەو کتێبەی کە لە شاری سلێمانی چاپ کرا، لەڕووی چاپ و کوالێتی کە بەرھەمی خۆماڵییە زۆر چاک و نایابە دەستخۆشی لەخاوەنی چاپخانەکە دەکەم، بەڵام زمانی وەرگێڕان و دارشتنەوەی لە ڕووی زمانەوانی زۆر رەکیک و خراپە، بەداخەوە کەوەک سەبقی تەرجەمەکردن ھەڵڵایەکی گەورەی نایەوە، پاش ئەوەی دوو بەشم لێی خوێندەوە کتێبەکەم بەلاوە نا و لێیگەڕام، چونکە بەڕاستی خوڵقی خوێندنەوەی تێکدام..!
منیش ١٠،٠٠٠ ھەزارەکەم لێ ڕۆیشت..! نازانم قانونێک ھەیە بۆ پارێزگاریکردن لە مافی خوێنەر وەک قانونەکانی مافی بەکاربەر و نەخۆش..
بەخوای گەورەتان دەسپێرم و بەھیوای کاری ناوازەتر.

Previous
Next
Kurdish