نۆتای سەفەر … شیعر /کاوە عوسمان عومەر

لەگەڵ گەیشتن بە ئاسۆی هەورێ،،
پەپولەکانی دڵ دەربازکە،،
ئەی گەڕیدەی ،
لە کات و شوێنی ترا….
شیمانەیە یەکتر ببینینەوە،
گەڕانەوە نیە جارێکی تر،،،
لەم سەمەرەی گەردوونە،،
چەندیش ئەستەمە..
پلیکانە ئەفسونیەکانی فیردەوسی وون، ،،
لە دەروازە قورمزیەکانی دۆزەخ جیاکەینەوە،،
گەڕانەوە نیە، ئەی گەڕیدە ،
بە هەڵدێرە نسرمەکانی نامۆبوون،،
نۆتای سەفەر،،،
لە گیتاری سنگی خۆتا،،،
لە هەموو شتێ زیاتر،،
لە کەنارەکانی ئاسوودەیی نزیکت ئەخا،،
تۆ عاشق بە سەرهەڵگرتنی خۆتی،،
بەرەو ئاسمانێ،،
وەک کتێبێکی ئەفسوناوی،،
پەڕەکانی بە وشەی ئاوی ڕۆحت نوسراوە،،
باڵای سەوزی درەختی شیعریشت،،
هێندەی قەڵای بارانی بوون،،
سەمەرەیە
……………..
ئەوانەی لە پڕێکا،،
بوونە پاشماوەی جەنگەکان،
لە بێهودەیی دەرچەیەکدا،
لە گۆڕستانی..
خەوەکانی خۆیاندا جێمان،
فریاش نەکەوتن،،،
باڵە قرتاوەکانی ..
ئازیزەکانیان کۆکەنەوە،،
پەیکەرە شکاوەکانی ڕابردووش،،
گەلەری بوونی پڕکردوە،،
بە پەلە پروسکێ گۆزەی شکاوی جەستەیان..
خزاندە ڕوباری وشەو..
ووردە مرواری بیرەوەری ژوانێ،،
ڕەنگە هەر ڕوی نەدابێ
…….
کاروانی کۆچەریەکانی…
وڵاتێک، جگە لە دارستانە..
رەشەکانی گریان،،
هییچی تری نیە،،،
بۆ ئەو کەشتیانەی…
لە گەرداوی خەما سەرنگووم بوو،،
کێ شەپۆلەکانی کۆکردەوە،،
دوای مەرگی ماسیە پەمەییەکانی کات؟
کێ کاسی شەرابی خۆشبەختی
ڕشت، دوای هاتنی دەمامک ڕەشەکانی بیابان؟
…………………
تابلۆیەک بە ڕەنگی چاوەڕوانی کێشرا،،،
بە دیواری ڕۆژە مسینەکانی …
جەنگه خۆڵەمێشیەکانا هەڵواسرا،،،
چاوی ڕێگا،،
زەڕەبینی ڵێڵی هاوینێکی تاهەتاهەتایە،،
بە دوای دروسبوونەوەی …
تنۆکە بارانە سپیەکانی بێهودەیی
…….
شەو سیحرە
کتێک….
پەنجەی پیانۆکان،،
مەلە دیلەکانی بێستانی دڵ دەرباز ئەکەن
……………….
جانتاکان پڕ کرانەوە …
لە پاڕجەکانی شار،،
کۆچەرەکان بێ ئاگادارکرنەوەی خۆر،،
خۆیان دایە دەست گێژاوی مەنفا،،
پاشماوەی جەنگەکان،،
هێشتا لە نێو ئۆقیانووسی ڕۆحی..
مرۆڤە پەرتبوەکانە،،
…………………
چەترم مۆسیقای بیرکردنتە،،
کاتژمێرەکان پاش و پێشکەوتن،،
ڕاستیەکانیش،،
لە شوێن و جێی تران،،
هەر کە ڕۆخی ڕوبارەکانی وڵاتیان..
ڵێڵ و ژەهراوی کرد،.
شاخ و گەردی نێو چاوی..
منداڵەکانی ئاویشیان..
کردە ئەتوونی خوێن و پارە
………………….
گڕە بای بێهودەیی..
کاغەزی جەستەی..
پیاوەلمەکانی..
کەنار شارێکی لە ئەفسانەو درۆی..
خواوەندە دڵڕەقەکەکان بڕی…
کورسیەکان ئێسک و بروسکی ئێستان،،
کراسی کاتژمێرە وەستاوەکانیش..
بەسەر تەنافی نائومێدیەوە جێما،،
بە ترسیشەوە ژنە تەنیاکان،،
قەڵایەکی ئەرخەوانیان،،
لە چاوەڕوانی هەڵجنی،،
سەیرە تا ئێستا ماون، هەناسە ئەدەن،،
بە چی زمانێک ،
دوای جەنگە زۆرەکان..
ئێمە قسە دەکەین؟

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.