دەروازەیەک بەرەو گزنگ … شیعر/ کاوە عوسمان عەمەر

خولیای گژو گیایەکی مەست
،،بۆ تاڤگە تیشکێک
،،،لە گزنگێکەوە
….هەمیشە دەروازەی
ئەبەدیەت و خۆ بیرچوونە
لەسیحری بوون

…………….

،،کە لێرە نەبووی
..ویستم خۆرێک
لە جیاتی مۆم ، داگیرسێنم
…نەمزانی
،،ژوور چۆڵ
،، بەڵام ڕوناک
..هەیوانەکە پربوو
لە تریفە مانگی تۆ
…………

گوڵە هەنارەکان
خەندەی لێوی ئاڵت
،، ئەنوسنەوە، کە تۆ لێرە نیت
،،خەوەکان گالیسکەی کریستاڵین
…ناگەنە جێ، ئەسپی سپی
… بیرچونەوەش، چیاو مێرگی ئەرخوانی
…ژوانیان برد، شەلالی
،،،ڕیگاکانیش
،،،بە برینی ئەو پەنجەرانەوە ئەبەستینەوە
،،کە تا ئەبەد چاوەوانمانن
،،،باران تەنافی وشە سەرگەردانەکانە
،،ماڵێک لە تەمی بیرچوونەوە
… پڕ لە حەسرەتی
،،بایەکی لاسار و بێ ئۆقرە
،،وەک بڵێی سۆراخی تۆ بکا
…حەزێک بۆ ئاوێزان بوون
،،،بە جەستەی فڕیوی با
..هەردەم ئۆقیانووسی دڵ
شوێن و کات
،، نازانێ بۆ هەڵچوون
و هەڵدێر و تێکشکان
………………..
،،پێشتر
..من ئاو بووم
،،تۆش نمە
…باهۆزی جەنگ هات
من لم، تۆ لم،
ئەوانیش بیابان
……………
..گزنگ بە پەنجەی
،،سروشت
،،ئاسمانێکی بە ڕەنگی کڵپەو گڕ
،،بۆ خۆی کێشا
،، سەوڵی وشە
،،بەلەمێ شیعر
،، نیگایەکیش
،،پەلکە زێڕینەی هەڵکێشاوەتە
،، ، سەرتارای زەریایەک
تاکە دەروازەیە بۆ دەرچوون
……………..
زەردەی ئێوارە
… بێ دەنگی لەگەڵ دواهەمین
چۆلەکە
گەیاندەوە
،،کۆلانەی خەو
باڵە ڕەشەکانی شەو
،،لەسەر ڕۆخی ئێستا گیرسایەوە
،،تۆزێکی ترنابا
،،ڕۆحە شەکەت و ماندوەکان
..بەرەو ئەندێشەی
،، بێئاگایی لە گەردونێکا ئەبا
وەک کاتژمێرێکی مەزنە،،
،،،گەردوونی بێئاگا
…چرکەکانی
تنۆکە خونجەی قەترانی…
دڵە تەنیاکان ئەگرێ

وێنەکە کارێکی هونەری فۆتۆگرافەری ئیسپانی
(Enrique Lopez Garre)
بە سوپاسەوە لە پەیجی فەرمی خۆی وەرگیراوە
.

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.