Skip to Content

سەرەتای بە نەخوێندەوارکردنی کۆمەڵگەی کوردی … شوانە حەسەن ئەبوبەکر

سەرەتای بە نەخوێندەوارکردنی کۆمەڵگەی کوردی … شوانە حەسەن ئەبوبەکر

Closed
by ئه‌یلول 30, 2020 General


یەکێک لەو پرسانەی کەدەسەڵات لەکوردستان چەندین ساڵە کاری جیدی بۆ دەکات بریتیە لەپرسی (بێ ئەهمیەتکردن)، دەسەڵات هەر لەسەرەتا دەستی برد بۆ بێ ئەهمیەتکردنی خۆشەویستی نیشتمان و کوردایەتی لەڕێگەی کوشتنی ئینتمای مرۆڤی کورد، چونکە لەفەرهەنگی حزبی کوردی هەمیشە پێناسەی حزب یەکسان بووە بەپێناسەی کوردایەتی و ڕێکخستنەکانی حزب بریتین لەهاوڵاتیانی ڕەسەن و پلەیەکی کۆمەڵگە، ئەم جیهانبینیە وایکرد کەپرسی هەڵاواردن لەسەر بنەمای ئینتما لەدایک بێت و تێرکردنی بەشێک و برسیکردنی زۆرینەی شەقامی کوردی لێبکەوێتەوە، بێگومان هەر ئەم سیاسەتە ناهاوسەنگەش بوو ئافرەتێکی بارزانی برسی پاشماوەی ئەنفالی ناچارکرد بە (کازمی) بڵێت: (کوردستان ئەمانەتی تۆ بێت)، لەدیدگای ئەم ئافرەتەوە دەسەڵات چەندین ساڵە لەپاراستنی ئەمانەتەکانی ئەم کوردستانە کە (خاک و خەڵک)ە ڕاستگۆ نەبووە، چونکە خەڵکەکەی وا برسی و هەژار خستوەو سنورەکانی نیشتمانیشی ڕۆژ دوای ڕۆژ بەرەو بچوکبونەوەی زیاتر بردوە.
یەکێک لەو خەونانەی تریش کەدەسەڵات لەدوای دووهەزارەوە کاری جیدی بۆکردوە بریتیە لەپرسی بێ ئەهمیەتکردنی (بڕوانامە)، لەڕێگەی دوو ئاقاری جیاواز:
١- هەر لەدوای ساڵی (٢٠٠٠)ەوە ساڵانە خوێندکارێکی زۆر لەزانکۆو پەیمانگاکانی کوردستان دەردەچن، بەڵام ئەم دەرچونە چانسی ئەوەیان پێنادات لەکەرتی (تایبەت و حکومی) دابمەزرێن و مومارەسەی پسپۆڕی خۆیان و خزمەتیش بەکۆمەڵگەی کوردی بکەن، بۆیە بڕوانامەکانیان بەتەنیا بۆتە کاغەزێکی بەژمارەو لەماڵەوە تۆزی لێ نیشتوە، بەداخەوە زۆر جار بینیومانە لەخۆپیشاندانەکاندا خوێندکاران ئەو بڕوانامەیە دەسوتێنن کەزیاتر لە (١٦) ساڵە شەونخونیان بۆی کردوە وەک ئاماژەیەک بۆ بێ بەها بوونی، بەگشتی ئەم حاڵەتەش گەر سەرنج بدەین کاریگەری نەرێنی دروستکردوە و بۆتە خۆرەیەک و حەز و توانای خوێندکاری کوردی بەگشتی بۆ خوێندن و بەدەستهێنانی بڕوانامە کوشتوە.
٢- بڕوانامەدارکردنی کادری حزب فاکتەرێکی ترە بۆ بێ ئەهمیەتکردنی بڕوانامە لەکوردستان، چونکە حزب لەچەند ساڵی ڕابردودا بەلێشاو کادری بێتوانای خۆی نارد بۆ زانکۆکان بەمەبەستی بەدەستهێنانی بڕوانامەی بەکالۆریۆس و ماستەر و دکتۆرا، بۆ ئەوەی دواتر پۆستە باڵاکانی زانکۆ و پەیمانگاکانیان پێپڕبکاتەوەو حزب ئەم ناوەندانە کۆنترۆڵبکات، لەکاتێکدا زۆرینەی ئەمانە لەبەرئەوەی بەرێگە ڕاستەکەدا کەکۆششکردنە نەڕۆیشتن بۆیە بەڕێگە ڕاستەکەشدا ناگەڕێنەوە و فێری پشتبەخۆبەستن نابن، کەواتە بینیومانە ئەوانە زۆرجار خوێندنیش تەواو دەکەن کەچی ناتوانن خاوەنی دوو قسەی مەعریفی و پڕۆژەیەکی ئەکادیمی بن لەپسپۆڕیەکەیان، لاتان سەیرنەبێ ئوستاذی زانکۆ هەبێت لەخوێندنی ئۆنلاینی پار ساڵدا نەیتوانی بێت کۆمپیوتەرەکەی بەباشی لەپڕۆسەکەدا بەکار بهێنێت، خاوەن دکتۆراشم بینیوە تاکو هێشتاش لەخەیاڵی ئەودا دونیا بەوجۆرەیە کە (زینی وەرتێ) بریتی بێت لە سنوری نێوان هەرێم و وڵاتی ئێران.
یەکێک لەو پرسانەی کەدەسەڵات لەم ساڵانەی دوای دەستی بۆبرد خەونی بە نەخوێندەوارکردنی جیلی داهاتووی کۆمەڵگەیە، نەخوێندەواری بەمانا تەقلیدیەکەی کەنەبونی توانای خوێندن و نوسینە بەشێوازێکی دروست، بەنەخوێندەوارکردن دەمێکە خەونی قوڵی دەسەڵاتە بەئامانجی بەڕەعیەتکردنی کۆمەڵگەی کوردی و کوشتنی توانای سۆراخکردن لای جیلی داهاتوو، سەرەتای ئەم بەرنامەیە بەدابڕینی ڕۆحی مامۆستا لەناوەندەکانی خوێندن دەستی پێکرد ئەوکاتەی کەپاشەکەوتکردن و لێدزینی موچەی مامۆستایان کرایە ئەمری واقع و بەئۆنلاینکردنی ناوەندەکانی خوێندنیش پڕۆسەی نەخوێندەوارکردنی تاکی کورد وا تەواو دەکات، لەکاتێکدا سیستمی ئۆنلاین ساڵی ڕابردو بەکەموکورتیەوە لەزانکۆ و پەیمانگا و خوێندنگاکان تاقیکرایەوەو سەرکەوتو نەبوو، بۆیە مەنهەجە خوێندراوەکە بۆ تاقیکردنەوە داخڵنەکرا، تخوا چ ڕەوای حەقە ئەمساڵیش بێئامادەکاری پێشوەخت بۆ خوێندنی ئۆنلاین پڕۆسەیەکی شکستخواردوی ساڵی ڕابردو دوبارە بکەینەوە، گەر تاکە ئامانج لێی بریتی نەبێت لە بەرنامەیەک کە خوێندکاری کورد ساڵێکی بێ بەرهەمی زانستی بخوێنێت و قۆناغی بنەرەتیش ئەوەی فێری بووە لەساڵانی ڕابردو گەر ماندونەبونی کارای ماڵەوەی لەپشت نەبێت ئەوا ئەویشی بیر دەچێتەوەو ئەنجام مرۆڤێکی نەخوێندەوار دەردەچێت.

Previous
Next
Kurdish