Skip to Content

پردێک بەرەو زەریا … شیعر/ کاوە عوسمان عومەر

پردێک بەرەو زەریا … شیعر/ کاوە عوسمان عومەر

Closed
by تشرینی یه‌كه‌م 24, 2020 General, Poems


ڕێت دا گریانی ئاسمان
وشە ماوەکانی سەر لێوە ساردەکانت بشواتەوە
ئەبێ چەند ساڵی تری بوێ
تا برینی قەدی دارێ تیمار ئەبێ
دوو عاشق پیش پەرتبوونی کاژیرەکان
ناوی خۆیان لەسەر هەڵکۆڵی
ئەی ئەو سەکسیفۆنژەنەی
لە گرمەی هەورەکانا،
ژانی خۆکوشتنی نمەکانی
بۆ چاوانی کز سوتاوی تۆ کردە سۆناتا
ژەهری چاوی ئەستێرە بێدارەکان
ئەکەمە مرەکەبی پێنووسی ڕۆح
تا نامەیەک لە بارانە عێشقت بگاتێ
شەویش نیە مانگێکی سەرخۆش
لە تەم و مژی جازی بێهودەیی ژیانا
نەبێتە هاوڕیم
ئەبێ بۆ قەڵای کریستاڵی شارێک
لە بیرکردنێ بۆ تۆ
چەند قومێ شەرابی شیرینی دۆزەخی بوێ؟!
———————-

هەر مەرگەو ..
گوڵێک ئەبا،
هەر گوڵێک و..
مەرگێ ئەهێنێ
بەڵام گەر مەرگ هەر ئەگات
بۆ ئەوەندە چاوەڕیمان کرد؟
بۆ ئەوەندە چاوەڕێ کەین؟
دڵێ یاخی لە تاریکی
و خوێنی قەترانی دروستبوە،
نیازیەتی لە نیو هەورە بوهەیمیەکانا
خۆی حەشاردا
گەر بوار بوو خانمی لێو لەیلەک
لە هەمان دارستانی سەرابیی ئەوسا،،
یەکتر ئەبینینەوە
هەر لە ژێر هەمان دار چرۆی خۆر
هەمان تاشە بەردی ئاو
هەمان ساتە وەختی ئێوارەیەکی قورمزی
ژوانی مەرگێکی ئاسودە
بەیەکەوە ساز ئەکەین
جەستەمان با سەمفۆنیای..
گڕی پیرۆزی یاخیبوون بێ
لە خواوەندە بەردەکان
پێت ووتم، هەرچی بکەی..
جارێکی تر دەگەڕێیتەوە
بۆ دێڕی یەکەم پرسیار
بۆ هاتین، بۆ لێرە بوین؟
هەرچی نیگایەک بکەی
لە ئاسمانێک..
زەرنیخ و مس و پۆڵا
ڕێت ئەگاتەوە،،
هەمان شاری ئەندێشە
بەڵام من سەکسیفۆنژەنی پازیزم دی
فرمێسکەکانی بەگەڵا ئەرخەوانیەکانی
یادەوەری هەردوکمان سڕی
جەستەی تەڕی ڕۆژەکانم دی
بەسەر هەورە کۆچەرەکانا هەڵواسران
کە شەویش دوای زەمەنێ بەسەر چوو،،
گالیسکەی سەفەری..
تا هەتا هەتای هێنا
من مەست ئەبم
لە تەقینەوە ئەرخوانیەکانی گوڵی دڵی تۆ
تۆ مەست بە
بە ڕۆشتنی کەشتی شینی..
سەرهەڵگرتووی من
بەرەو کۆتا زەریا.

——————————————————————–

وێنەکە کارێکی هونەری فۆتۆگرافەری ئەڵمانی
( Alexander Fradellafra)
بە سوپاسەوە لە پەیجی فەرمی خۆی وەرگیراوە

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish