پاشماوەکانی جەنگ … شیعر: کاوە عوسمان عومەر

کەس قفڵی دەرگا ئاسنەکان
ناکاتەوە، ئەو کچانەی لەچاوەڕوانی
شنەبایەکی ئاسودەیی
ڕۆحیان سپی بوو،
بێ دەنگیش زمانێکە بۆ خۆی
هەر چۆن بەرد
لە ژێر بارانا
نۆتای عیشقی خۆی هەیە بۆ نمە
ئاواش کچانی دوای جەنگیش
لە بێدەنگیدا، ،،
لە سروتی چاوەڕوانی
خۆشەویستی ناکامی جەنگاوەرە دۆڕاوەکانن
دەنگی یەکەم—-
میحرابی نزرگەی خۆرمان لەدەستدا
بۆ بەیداخی خێڵەکانی لم،
دەنگی دوەم—–
خۆزگە زەمەنی بەرائەتی یەکەم
پێش لەدەستدانی باڵەکانمان ئەهاتەوە
دەنگی سێیەم—
تۆ بۆ خۆت لە نزرگەی خۆتا،،
ئاسودەبە ئازیز
منیش لە دورخەی خۆما خۆشبەختم
دەنگی چوارەم—–
بەدبەختی…
ئەوەیە هەموو ڕۆژێک،
تۆ بێیت بۆ باران
کەس چنگێک نەکاتە دەستەوە
دەنگی پێنجەم—-
ئاسودەیی….
تیاڕامانە لە ناو چەقی قەرەباڵغی شار
لە گەشانەوەی زیونی مانگێک

لەنێو دوو دەستی ئەفسوونی چیا

كچانی دوای جەنگ
کوڕانی دوای کۆچ
جگە لە گیای ئەرخەوانی نێو دڵیان
و مێرگی چاوە تەماویەکانیان
چیتریان ماوە،،
لەم قەراغ ڕوبارە لیخنەی حەسرەت
بروسکەیەکیش..
لە قەڵەمی شیعر
مەگەر بۆتکەمە پردی سیڕاتی عیشقێک
بەڵام ئەو لە شەقامەکەدا
بێ ووتەیەک وەستابوو
وەک بڵێی ڕاڕابێ
لە بێ دەنگی ئاسمان
لە و قامچیە بێ ڕەحمانەی..
مرۆڤە گورگەکان،،
لە ژنە هەژارو
منداڵە سوڵکەرو
پەکەوتەی جەنگە
بێ شومارەکانیان ئەدا
حەزی شەوێکێش..
لای ڕێبوارێ،،
بۆ هاتنی ئەو
ئارەزووی شنەبایەکیش
کە ئەبینێ،،
ئۆرکۆدیۆنی شەپۆلەکان
هەزاران ڕشتە ڕۆمانی سەفەر
لەسەر ڕۆخی پێڵوی
چاوی ئافرەتێک لە تەم،،
لە توخمی پەپوولە،،
ئەنەخشێنێ،،
بەڵام وەک دەریاوانێکی بێ کەنار
و وڵات و ماڵ و پەناگە
هیچ شتێک تۆ ناوەستێنێ..
لە ڕاوی ماسیە پەمەیەکانی خەونێ
بەڵام پردێ بەرەو فیردەوسی ڕۆح
پڕ لە نەورەسی شادومانیە
کەچی مرۆڤە باڵکراوەکان
لە ژووری مەرگگرتووی تاریکیا
دێوجامەیان بۆ مەلەکانی خەفەت هەڵداوە
لە هەموو شوێنێک ڕاوە رۆحە
توانەوەیە
لەخاچدانە
ژەهراویبوونە
چما لەم دوا ساتە تەلیسماویەی ژیان
ئیتر بە شیعر نەدوێین
گەر ئەمە دوا ساتمان بێ
من بڕیارم داوە
لەم کۆتایی هاتنی گەردوونە
بە ئازادانە بچمە ژێر
بارانێکی بێگەرد و درەوشاوە..
لە گوڵە نێرگزی شینی شیعر و
ئاورینگی لێوی ئافرەتێکی وون
بێشەرمانە بەرگی هەور لەبەرئەکەم!
هیچ شتێ ناموەستێنێ
بە پێخاوسی بچمەوە،،
بەردەم نزرگە شوشەیەکەی سادەیی یەکەم
پێش ڕزینی سێوە سپیەکانی گوناح و سزا
چاو بەسەر دنیایەکی ترا ئەکەمەوە
کەس لە بەرزاییەوە،،
قامچی لە پشتی ئەوی تری مرۆڤ نەدا
نیگام بە دەروازەی..
دنیایەکی ترا ئەکەمەوە،،
کەس لەسەر نانێ
مرۆڤێکی تر بە شەقامەکانا..
وەک ئاژەڵ نەڕەتێنێ
بەردەرگاکانیش هەر قەنارەن
ئێوارانیش چەتەکانی شار پشوو نادەن
حەز لە لێوی کچانی ڕەشپۆشی..
دوای جەنگەکان ئەدزن
ڕازە بچووکەکانیشیان خراوەتە قەفەزەوە
لە بێدەنگی ئاسمانا
هاتینە بەردەم تریفەی
مانگی زیوینی ئازادی
ویستمان جارێکی تر
ئەستێرەکان بە بەرۆکی شەوی
ئەرخەوانی خۆشبەختیدا هەڵواسین
کە چی بایەقوشەکانی دوای جەنگ
شنەباشیان دزی،
ڕێبوارێکین ئێستا
کاتێ ئێمە بوین ،،
خاوەنی ڕاستەقینەی مەمەلکەتی ئاو
کوپێ کانی ئێوارەی..
شارێکی وونم پێویستە
بەڵام نە تارمایەکان..
ئێستا بونەوەری ڕاستین،،
نە پاشماوەکانی جەنگ
ڕۆحیان تیا ماوە خەندەیکیش بکێشن..
ئێسک و پروسکی ڕوخامی وەریوی شارێکیش
لە خەو و ئەفسانە
کراوەتە مۆڵگەی کەنیزەکردنی
جەستە ی پەپولە مەست کراوەکان
دار سنەوبەرە خوێن لێتکاوەکان
ئازاریان تێکەڵە
بە گازی ژەهرینی ماشینە شیعر کوژەکان
کۆمپیوتەرەکانیش
داڵاشی سەر بێستانی مێشکن
لە باڵەخانەی چەتەکانی شار
داڵاشەکان ئەفڕن
لە نیوە شەویشا،،
سۆمای دایکە نەنوستوەکان ئەدزن
کە هیچ مۆڵگەیەک بۆ خۆحەشاردان نامێنێ
باشترە بچینەوە ئەشکەوتە سەرەتاکانی
یەکەم ڕۆژ فێری سەمای ئاگرو تیشک
عیشقی سروشت و
شەوو دەریاو ئەستێرەکان بوین
پێویستە بچینەوە،،
بۆ لای ڕم و قەڵغانەکانی خۆپارێزی
لەگەڵ درەوشانەوەی سەرلەنوێی دڵمان
دێڕ بە دێڕ
پەخشانی کۆچی هاوڕێ..
سەرنگومکراوەکان
بەسەر پەڕەی هەڵواسراوی ..
کەناری غوربەت هەڵئەواسین
گێژەنە لم بوو دوێنێ
گیانی ئێمەی فەنا کرد،،
هەزاران جاری تریش
لێرەش
لە وڵاتی پەرتبوونا
چوارمێخە کراین

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.