Skip to Content

دەقی شعری… کانیاوێک پەیڤی وشک.. موراد عەلی

دەقی شعری… کانیاوێک پەیڤی وشک.. موراد عەلی

Closed
by كانونی یه‌كه‌م 20, 2022 General, Poems


وشەکان لە ناخم ھەڵدێن
خۆیان بە دووکەڵ دەفرۆشن
پەنجەکانم لە جەستەم ڕادەکەن و
لەسەر ملی « با» ڕادەکشێن
ھەموویان بە ڕابردووم دەگۆڕێتەوە ئەویش
کە ڕابردووشم دەگات بە ژوانت، دەمرێت.
٭٭٭٭

دەمگوت: شاعیرانە ژیان، تەنێ بۆ باڵندەکان دەلوێ
بۆچی بریندارت کردم؟
٭٭٭٭

ئارەزووم بوو ببم بە قەرەج
فاڵم بۆ کەسیش نەدەگرتەوە
تەنیا تۆ نەبی!
لەوەشدا درۆم دەکرد…
ھەموو شتێکی خۆمم
بە چارەنووسی خۆت بۆ باس دەکردی.
٭٭٭٭

ئێستا خەریکی تۆڵەکردنەوەم
تۆڵە لەو کاتانە دەکەمەوە
لە خۆمم خیانەت دەکرد
لەگەڵ تۆدا
ھێندەشم بەسە کە لەگەڵ خۆمدا
لەتۆ خیانەت بـکەم.
٭٭٭٭

زووتر دێمە ماڵەوە شەوانی ئێستا
هەمووان پێیان وایە گۆڕاوم
ژیرترم لە جاران
نامەوێ بڵێم:
گیرفانم بەشی شەوی ئەم وێرانە سەرمایەدارییە ناکات!
٭٭٭٭

شەوە،
درەختەکان پـشوویانە و
ئاسمانیش تەنگەنەفەس
چارەسەری ھەموو ئەوانە لای تۆیە
وەرە بەر دەرگـا…
گەر بە قژی تەڕیشەوە بیت!

نوسینی: موراد عەلی

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next