تۆ بەڵێنی ژوانێک بدە … شیعری: ستیڤان شەمزینی
بەڵێنی یەک ژوانم لێت ئەوێ
تاکو لەئێوارەیەکی نارنجیدا
بە دەم رێگایەکی نەبڕاوەوە
مژدەی هەڵاتن بدەین بە گوێی غروبا
دڵی دەریا لە شەپۆلەکاندا بدۆزینەوە
خەونێک لەگەڵ واقیع ئاشت بکەینەوە
ئاڕاستەی بەلەمە جارۆگەدارەکان بگۆڕین
لە رۆحی تاشەبەرد قومێ لە ئاوی ئەشق هەڵهێنجین
نەوڕەسەکان بکەین بە پاسەوانی جێژوان
کۆترەکان نامەی ئەوینمان بگەینە دڵی خودا
تۆ بەڵێنی ژوانێک بدە
تاکو ئەستێرەیەک لە ئاسمانا زیاتر بدرەوشێتەوە
درەختێکی زەردهەڵگەڕاو دەستی لە خەزان بێتەوە
شاخێک چاوێکی شەرمنانە لە شاخێکی تر دابگرێ
لاولاوێک غیرەت بکا یاخی بێ و باخ جێبهێڵێ
هەورێک لە کاتی خۆی پەلە بکا و زووتر ببارێ
ئاسمان چاوی خۆی داخا و خێرا خۆر هەڵبێ
سپێدە بە پەلە خۆی کۆبکاتەوە بەرەو ئێرە بێ
تۆ بەڵێنی ژوانێک بدە
با دەستی وڕێنەکانم بگرم بۆ سەر رووباری شێتی
دەستی شێتییەکانم بگرم بۆ ئۆقیانووسی دڵ
دەستی دڵم بگرم رووەو ئاوی ئاموونی تۆ
با دەستی خەیاڵم بگرم رووەو واقیعی تۆ
دەستی واقیعی تۆ بگرم رووەو چارەنووسی خۆم
دەستی چارەنووسیشم بگرم بۆ تونی بابای دڵی تۆ
با دەستی خۆزگەکانم بگرم بەرەو لای تۆ
دەستی تۆش بگرم بەرەو دڵی کون کونی خۆم
دەستی دڵیشم بگرم بۆ دەریای بێ بنی دڵی تۆ
تۆ بەڵێنی ژوانێک بدە
من حکایەتێک لە ئەوینی تۆ دادەتاشم
سەدای تاکو چین و سەمەرقەند بڕوا
بە لەززەتی ماچێکت ئاشنا ئەکەم
وەک چیرۆکی هەزار شەو و شەوێک کۆتایی نەیێ
لە جەنگەڵی ئەقڵ بۆ هەمیشە رزگارت ئەکەم
ئەبمە چاوساغت بۆ دۆزینەوەی ئیمپراتۆریای دڵ
تۆ بەڵێنی ژوانێک بدە
با من لە دەنگی تۆ ئاوازێکی قەرەجانە دروست بکەم
لە هەناسە نەرمەکانت تەونێک لە شیعری تەڕ بچنم
لە پێکەنینە خەمبارەکەت شارێک لە خامۆشی رۆنێم
بە ئاوی سازگاری چاوەکانت مەزرای رۆحم ئاو بدەم
لە هەنسکی شەوانت دووزلەیەک بۆ خەمباریی بژەنم
لە شادییەکانی رۆژانت جیهانێک لە خەندە بخوڵقێنم
تۆ بەڵێی ژوانێک بدە
با گووڵە قەرسیلەکان لە بەردەمماندا شکۆفە بکەن
رووناکی لەنێوان دڵ و رۆحی شەیدامان بدرەوشێتەوە
رووبارەکان ئاڕاستەی رۆشتنیان بیر بچێتەوە
لولەی تقەنگی سەربازەکان گوڵی سووری تیا بڕوێ
رەشەبای تووڕە ماندووێتی دەرچێ، ساتێ بنوێ
هێمنیش بەیانییەکی بێدەنگ، توند لە ئامێز بگرێ
تۆ بەڵێنی ژوانێک بدە
با دنیای من رەنگی وەنەوشەیی ناخت بگرێ
خەیاڵم وەک ئەسپسوارێ بۆ بەرزایی دڵت سەرکەوێ
ژیانم لە مەراق و بێهودەیی و تێکشکان داشۆرێ
پەپولەی شیعرم لەسەر رەیحانەی دڵت بۆ ئەبەد بنوێ
ئەوسا بە ئارامی و بێ چرپە بڕۆ
بەڵام ئاگات لێ بێ، پەپولەی شیعرم هەڵنەفڕێ
تۆ بەڵێنی ژوانێک بدە و
تەنیا بەڵێنی یەک ژوانم ئەوێ
