Skip to Content

بێ تۆ … شیعری: ستیڤان شەمزینی

بێ تۆ … شیعری: ستیڤان شەمزینی

Closed
by November 15, 2020 General, Poems

زامێکی قووڵ بە دڵمەوەیە
هەرەسێکی مەزن لە رۆحمایە
خۆر لە ئاسمانی منا هەڵنایەت
مانگ لە شەوانما نادرەوشێتەوە
جەستەم رەنگی خۆڵەمێشی گرتووە
هەناسەم بووە بە جۆگەی ئاگر
لە سینگمەوە زووخاو شەپۆل دەدا
خەیاڵەکانم بوون بە ئەشکەوتێکی بێ شەوق
روانینەکانم تەژی بوون لە تەنهایی
خەندەکانم وەک ریشۆڵە کۆچیان کردووە
رۆژانە لەسەر هەوری یادگارییەکان سەما ئەکەم
بیرکردنەوەکانم تامی دۆزەخیان گرتووە
فنجانی قاوەکەم تەنها و کەساس ماوەتەوە
هەنگاوەکانم هەناسەسوارن و ناگەنە جێ
دەستەکانم بوون بە دوو شمشێر لە هەڵم
بەو جەستە خوێناوییەمەوە
وێستگەی شەمەندەفەرەکان و
هۆڵی فڕۆکەخانەکان و
کوچە و کۆڵانی شارەکان
خۆم و خەمەکانم لە تۆ دەگەڕێین
بەو جەستە لە خاچدراوەوە
بنی دەریا و شەپۆلی ئۆقیانووسەکان
جەمسەری باکوور و باشوور
باخچەکانی خەیاڵ و دوورگەکانی خەون
بە دوای تۆدا دەگەڕێم
خۆم و کۆڵێک خەمی جاویدانی
لە ماڵی پەڕەسێلکەکان و
زادگەی نەوڕەسەکان
لە سەر باڵی پەلکە زێڕینە و
نیشتمانی قەڵبەزە
لە سۆراخی تۆداین
من و ئاوازە غەمگینەکەی دڵم
لە دڵۆپە باران و ریشی سپی بەفر
لە هاژەی چەم و پەلکە گیا
لە چڵە نێرگزی بەهار و
پەروانەکانی ئەم ئاواییە
لە هەواڵت دەپرسین
خۆم و مەراقە گەورەکەی دڵم
شار بە شار
وڵات بە وڵات
کیشوەر بە کیشوەر
بە شوێن تەمی شوێن پێکانتا دێین
بێ ئەوەی بمانگەیەننە هیچ کوێ
دواجار تۆم لە هیچ جێگەیەک نەدۆزیەوە
وەلێ بێ هۆش بووم لەوەی
لە دڵی خۆمدا سەرخەوێکت شکاندووە!!!

Previous
Next