Skip to Content

شیعر/ یادێک لە زیندووان .. سروشت نەوزاد

شیعر/ یادێک لە زیندووان .. سروشت نەوزاد

Closed
by November 24, 2020 General, Poems

چاو تەمی خۆی بەجێهێشت و
باڵندەکانم ناسین
دەمزانی ئاسمان قەفەزی بچوکی خەونە
کاتیش لەم دەوروبەرە تێپەڕی و
بەسەر لقی درەختێک نەنیشتەوە
__

زمان کە بیر دەخواتەوە
پرسیار لە قوڕ دەئافرێنێ
زیندوان نیشانەی زیندوانن
شەپۆلیش ڕۆحی تەزیوی دەریایە و
ئازادی ئایا باڵی فڕیوی کام کەنارە؟

                                     ____

(أ)
بە دووی گۆرانی دڵخوازم کەوتم و
ئاو لەسەر ڕێگام بوو
گۆرانی چاوانی ڕوونی کردنەوە
دیقەتی چووە سەر باخچە
باخچەش بستێک خاکی تەڕ بوو
جلی شێداری لەبەر با هەڵخست
با بە هێمنی دەهات
ڕوناکی مانگ بەنێو لقە بەرزەکاندا
ڕووناکی مانگ مانگی چیم بوو؟
با بە دڵنیاییەوە دەهات
باڵندەکان بەسەر لقە بەرزەکاندا
درەختەکان درەختی چی بوون؟
ئاگریش کە پێڵاوی ڕازاوەم بوون:
شەقام من بووم
پیاسەی دڵتەنگی بەر کافێکان من بووم
منم بەدووی گۆرانی دڵخوازم دەکەوم
ئاو لەسەرڕێگامە و
پەرژینی دوو دڵ لە تەماشام درەختی بەردارن
وەک پەڵە هەوری قاچاغ
سەما لە ئاسمانی گیانم پەنجەرەیە

(ب)
کەشتیوانەکان دۆستم نەبوون
لە ئاوم دەڕوانی و
ساڵەکانم دەکشانە ژێر خۆڵی خۆیان
دۆستایەتیم تەنیا خۆی بوو
بە دووی گۆرانی دڵخوازم کەوتم و
گەشتی درێژم پرچی سپی کۆکردنەوە
با لەسەر ڕێگام بوو
لە ئاوم دەڕوانی و ئاسمانم دەبینین
کۆلارەکانیش خەونی زڕاو بوون
هۆگری دڕاویان بردە نێو دەریا!
ئەی دەریا
لە کام گۆرانی سەما دەبەیتە نێو ڕەگ؟
خاک لەسەر ڕێگامە و
باران بۆ کێڵگەی میوەکان
بەبێ باران پەخش دەبێت!
زەویش هەسارەی گڕکانە
دیکتاتۆران ڕاوچی دێرین
قولاپ لە یەخەی مانگ دادەنێن…
ئەی دەریا
لە کام ئاهەنگ گۆرانی دەبەیتە نێو ڕەگ؟
خۆڵ لەسەر ڕێگامە و
ئاگریش باوەشی گەرمی ڕسکاوە
شمشێری دێرینی بردەوە ناو کات
ئەی با
لەکام کۆڵان ڕسکانی سەمایت؟
پیاسەم لافاوی ساردی ڕێگایە و
هێندەی بەڕەی درێژو دورت پێت ڕاکێشان…
ئەی هەوای چۆڵ و تاریکم
باران دێت و منیش لێرە دەمێنمەوە
ڕەگم لەژێر خاکی دڕە و
ئۆتۆمبیل لە سەرم ڕواوە.

(پ)
شەقام دەیناسیمەوە
شار وەک چۆن کۆڵانەکانی دەناسێتەوە
دەمناسییەوە، هەوام دەناسییەوە
پەککەوتەکان وەک چۆن کورسیەکانی
قاوشی هەناوییان دەناسییەوە…
ماڵی خۆمم نەناسییەوە
بە ماڵی خۆم ڕانەهاتم
ڕووت لە باوەشیا پاڵکەوتم و
ڕووی وەرگێڕا
بە شاری خۆم ڕانەهاتم
ڕووت لە باوەشیا گەڕام و
ڕووی وەرگێڕا
بە خۆڵی خۆم ڕانەهاتم
ڕووت لە ژێریا ڕاکشام و
ڕووی وەرگێڕا
بە ئەوینم ڕانەهاتیت
ڕووت لە باوەشما گریایت و
ڕووم وەرگێڕا

(ت)
دەشتاییەکان گەورە بوون
ڕێبواران بەڕێگای دۆستایەتی بادا ڕۆیشتن و
بتەکانیان نەشکاندن ئەوان کە خودایا دەناسی…
خۆڵیش بەدحاڵیبوونێک بوو
کۆشکی زێڕینی پیشاندان
ئەی گەڕاڵە شیک پۆشەکان
کڵپەی ناختان تۆڕی دەریایە
بە کام کەشتی ماسی ڕاو ناکەن؟
بتەکانتان لە ڕێگایە و
لە چیرۆکی کام بستەخاک، پیاسەی ئاگر
لە نێو چاوە قوڵەکانتان ناخوێنینەوە؟
ئەوینی تەڕ لە ڕێگایە و
تینوویەکی ڕووت و ڕەجاڵ بە ناو قوڕدا هەنگاو بنێ
ئەوین دەبینێ
ئەوین عابای خۆی وەدەرنێ و
تینویەکی ڕووت و ڕەجاڵ بە ناو قوڕدا هەنگاو بنێ
بەڵام ئایا چی دەبینێ؟

(أ، ب، پ، ت)
ڕستەم بە شیعر دادەگیرسێ و
وشەش تەمی خۆی جێدێڵێت
هەوا تەنگە
خاک دەناسم
با پێڵاومەو
ئاویش گومان
ئاو دەناسم، هۆگری گەرمم باوەشی ڕژاوە، لە نێوان سەمای خامۆش و گۆرانی گەرمی دڵخوازم،
شەپۆلان ڕۆحی تەزیوی دەریان.
دڵنیایش گیانی پەرتی نێو دەریایە، ئاو دەناسم، لە نێوان گۆرانی خامۆش وسەمای دڵخوازم،
ئازادی ئایا باڵی فڕیوی کام کەنارن؟

Previous
Next