بە تیشکی عەشقت ئەدرەوشێمەوە.. شیعری: ستیڤان شەمزینی
“یەک”
تارژەنێکی شێتم
تارژەنێکی شێتم
نۆتەی عەشق بەسەر شاردا دەبەشمەوە
جادووگەرێکی بێ ناونیشانم
جادووی ئەوین لە خەڵکی شار دەکەم
ئەستێرەناسێکی بێ ئۆقرەم
رووناکی لە دڵی ئاسمان دەدزم
دێوانەیەکی دێرینم
دەردەدڵ بۆ دەریایەکی بەساڵاچوو ئەکەم
راهیبێکی بێ پەرستگام
رازەکانم ئەدەم بە دەمی توندترین رەشەباوە
قاوەگرەوەیەکی خوێن ساردم
ناو لەپی شوومی رۆژگار ئەخوێنمەوە
مۆمێکی شەوق کزم
تاریکی شەوەکان تەفسیر ئەکەم
کۆچەرێکی بێ هیوام
لە کڵاورۆژنەی خەمەکانەوە لە ژیان ئەڕوانم
باخەوانێکی ماندووم
تەرمی خۆم لەودیو باخچەکەوە ئەنێژم
سەربازێکی تێکشکاوم
داستانی دۆڕانەکانم بە شیعر ئەهۆنمەوە
درەختێکی لق و پۆ شکاوم
ژانی شکانی پەلوپۆم ئەگێڕمەوە
منداڵێکی زۆر لاسارم
تەنها لە باوەشی ئەشقدا ژیر دەبمەوە
پیاوێکی ئاوریشمیم
لە ئەوینی تۆدا لە دایک ئەبمەوەط
“دوو”
بە تیشکی عەشقت ئەدرەوشێمەوە
عەشقت
رۆحی سرک و پەڕەسێلکەیمی کەوی کرد
پەنجەرەی ژەنگگرتووی دڵی کردمەوە
لە خاچی بێزاریی و تەنهایی دایگرمەتە خوارێ
شاڕێی روونی ژیان و فڕینی بۆ کردمەوە
شیعرەکانی پڕ کردووم لە هیوا و گۆرانی
خەونەکانی لە ئاوی چێژدا تەعمید کردووم
جیای کردمەوە لەو پۆلە پاسارییەی
بێ هیوا رێی تاریکی ئاسمانیان تەی دەکرد
ئەوینت
بەرائەتی لە پەڕەی گوڵ بۆ خواستووم
جوانیش لە درەوشانەوەی مانگی چواردە
شەرابی لە گۆزەی خۆشبەختی بۆ دەرهێناوم
ئومێدیش لە باخچە رەنگاورەنگەکانی فیردەوس
وردە ئەستێرەی لە ئاسمانی دڵما دۆزیەوە
دەنکە مرواریش لە قووڵایی دەریای رۆحما
ئەوینت
زایەڵەیەک بوو عەرشی تەنهایی هەژاندم
تیرۆژێک بوو وێرانەی رۆحی پڕکردم لە تیشک
ئەوینت جادوو بوو
جادوو
“سێ”
چاوەڕوانی
لە گۆشەیەکی تاریکی ژوورەکەم دانیشتووم
سەرم خستۆتە باوەشی مەراقێکەوە
بەردەبارانی رابردوو دەکەم
قومێک لە ژەهری ژیان دەخۆمەوە
لافاوی بێهوودەیی رایماڵیووم
خەیاڵەکانم لە ئەزەلەوە ورد و خاش بوون
حنجەی ئازارە نەبڕاوەکانم دەکەم
دەلاقەیەک بۆ هەناسەدان شک نابەم
هەنووکە چاوەڕێت دەکەم
وەک وەرزێکی نوێی عەشق بێی
تەپوتۆزی ئەو غوربەتە لە رۆحم بتەکێنی
کانیاوی فرمێسکەکانم کوێر بکەیتەوە
لە رەنگی پەلکەزێڕینەم هەڵکێشی
گۆرانییەکی تازەم فێر بکەیت
ئاوازێکی نوێ لەسەر دڵم بژەنی
بە رەیحانەی رۆحت سواغم بدەی
چاوەڕێم بێی
ئاخر دڵم مینا فوارە عەشقی تۆی لێ دەڕژێ
دەزانی، زۆر دەمێکە چاوەڕێم؟
11-11-2015
ئەڵمانیا – شتاینهاگن
شیعری: ستیڤان شەمزینی
