Skip to Content

خەزانی ساتەوەختێ.. شیعر/ کاوە عوسمان عومەر

خەزانی ساتەوەختێ.. شیعر/ کاوە عوسمان عومەر

Closed
by February 11, 2021 Poems

( )


چیتر دەست و پەنجە
وەریوەکانی دارستان
نایژاکێنێ
پرچی زەردو
هەڵبزرکاوی
بروسکەیەک
کام گڕکانی
چارەنوسە
نایسوتێنێ
ڕۆحی پەپولەیەک
کام پەڕی
گوڵە نێرگزی ژوانە
هەوری شەڕانگێز
نایوەرێنێ
مەرگی هەر لقە
دارێ
مەرگەساتی
یادەوەری
درەختێکە
چاوەڕێیە
سەمفۆنیای نمە
بیلاوێنێ
بۆچی چراکانی..
ساتی پڕڕەنگینی
کێڵگە فیردەوسیەکان
لە ئاوێنەی
جوانی نیگایەکا
تا هەتا هەتا
نادرەوشێنەوە؟
کێیە خەونی
ئەستێرەکان
لە پریاسکەی
گەردونێکی
تێکەڵ لە خەون
و تەم
و خەم
و خۆشی و
ئازار
کۆئەکاتەوە؟
ئای ! چی نوسراوێکی..
پەرش و بڵاون
تارماییەکان
لە پەرتوکێکی
هەڵوەشاوو
بێ ناونیشانی..
بوون
هەر تارماییەک
لە قەفەزی
دڵێک لە ئاسن و
خەڵووز و
خەیاڵا،،
دیل
هەر تارماییەک
جیهانێک
لە ئاوێنەی شکاو
مۆمی کوژاو
خەونی کوژراو
دڵی هەڵواسراو
هەڵگرتوە
هەر تارماییەک
بۆ هەڵهاتن
لەتەزینی
نێو شەختەی گەردوون
هانای بۆ باوەشی
بەستووی
نێو ئامێزێ
لە شەختە
بردوە
پارچەیەک
لە ئەوی نامۆ
لە دورخەی چاوی
ئەوی ترا
وون
پارچەیەک
لە ئەمی سەراب
لە وڵاتی بێ نەخشەی
ڕۆحی ئەوا
وون
هەموو تارماییەکان
نیگاکانیان
بە قولاپی کاتی..
لەدەستچوو
هەڵواسرا
هەموو تارماییەکان
لەسەر شانۆی
چاوەڕوانی ئەوانی ترا..
خەیاڵبردوو
………………………………………………………………..
وێنەکە تابلۆیەکی نیگارکێشی فەڕەنسی
Claude Monet
Red Water Lilies

Previous
Next