عـەدۆ.. فازیل شــەوڕۆ

حەفتا و دوو فریشتەی چاو ڕەشی
بسک ڕەشی گەنم ڕەنگ
سەریان لە دەرگای بەهەشت دەرهێناوە و
یەک کۆڕاڵ
بە هاژەی بولبول و
چەهچەهەی سۆلاڤ و
بە زایەڵەی خودا
بانگ دەکەن:
عــەدۆۆۆۆۆۆ … عــەدۆۆۆۆۆۆ … عــەدۆۆۆۆۆۆ …
عـەدۆ، هەر خەریکی پاککردنەوەی
بەر دەرگای بەهەشتە
بە برژانگان گەسکی دەدا
بە فرمێسکان دەیڕشینی
بە ئاهی سەردی گولاوپژێنی دەکا
حەفتا و دوو فریشتە
یەک کۆڕاڵ
بە ڕێژنەی شەماڵ و
بە شنەی باران و
نەغمەی خودا
بانگ دەکەن:
عــەدۆۆۆۆۆۆ … عــەدۆۆۆۆۆۆ … عــەدۆۆۆۆۆۆ …
عـەدۆ دەستێکی لەسەر دەرگای بەهەشتە و
دەستێکی لە سەر شۆستەکەی ئاکرێ
عـەدۆ دەڵێ
من بچمە بەهەشتێ
ئەدی کێ
گەسکان لە ئاکرێ دەدا؟

عەدۆ ئەو کەناسەی شاری (ئاکرێ)یە کە لە کاتی پاککردنەوەی شەقامی ئەو شارە، ئۆتۆمبیل لێیداو کوشتی. (١٩/١١/٢٠٢٠)

فازیل شــەوڕۆ

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.