Skip to Content

خەرمانێک لە عەشق “شیعری لیریک”.. ستیڤان شەمزینی

خەرمانێک لە عەشق “شیعری لیریک”.. ستیڤان شەمزینی

Closed
by February 16, 2021 General, Poems

دەمم لە نێو شیرینی دەمی تۆدا بۆ ئەبەد ئەتوێتەوە
رۆحم چرۆیەکی وشکە لە باخی مەمکتا ئەڕوێتەوە
کاتێک دێیتە باوەشم گیانی مردووم زیندوو ئەبێتەوە
هەستی خامۆشم وەک ژیلەمۆ سەرلەنوێ ئەگەشێتەوە
دەستی لەرزۆکم لەناو دەستی تۆدا هێزی بۆ ئەگەڕێتەوە
چرای کوژاوەی دڵم بە خوێنی عەشقت هەڵئەکرێتەوە


چاو ببڕە چاوی تارم بە تیشکی گلێنەت رۆشن دەبێتەوە
وەرە جەستەی گەرمت با لە لەشی ساردم نەبێتەوە
رێژنەی ماچت بەسەر لێوی وشکما بە لێزمە ببارێنە
ئازیزم، رۆحی شەیدام لە نێو مێرگی سینگتا بڕوێنە
بە یەک نیگای جادوویت خەیاڵی شیعرم ببزوێنە
جوانیت ئەبێ بە قەسیدە، خەیاڵیشت ئەکەم بە وێنە


خەونەکانت بخە واقیعی منەوە، ئەتگەیەنمە بەهەشت
خەیاڵت بهێنە بۆ ناو دڵی منی ئیمپراتۆری هەست
بە خوێنی قەسیدە، درێژترین داستانت بۆ ئەنووسمەوە
هەستت بڕژە ناو هەستم، بۆ ئەبەد بمێنە لە تەنیشتمەوە
پەیمانێکت پێ ئەدەم ژیانم بۆ تۆ، مەرگم بۆ خۆم
تۆش پەیمانێک بدە و بڵێ بۆ هەمیشە من بۆ تۆم


لە رۆحما تۆ ئەژیت و منیش تنۆکێکم لە باران
تۆ فریشتەی زەویت و منیش ئەستێرەی ئاسمان
جوانیت هێندە ناوازەیە دەستەوەستانە زمان
وەک تابلۆیەک پڕت کردووم لە خەیاڵ و رامان
هیچ ناوێک بۆ تۆ شک نابەم، فریشتەی جوان!
خۆت ون مەکە، تۆ بۆ من بووی بە هەموو ژیان


ئۆکتۆبەری 2016
ئەڵمانیا – کۆڵن

شیعری: ستیڤان شەمزینی

Previous
Next