Skip to Content

نەوەی مەلزەمە … کارا فاتیح

نەوەی مەلزەمە … کارا فاتیح

Closed
by شوبات 7, 2017 General

مەلزەمە لە ڕواڵەتدا كورتكردنەوەی مەنهەجی خوێندنە، چڕكردنەوەی پێناسە و ڕاڤە و باسە دوورودرێژەكان و بەرتەسككردنەوەی شەرحی بابەتەكانە لە چەند خاڵێكی هەڵپڕووكاودا، بەڵام جێكەوتنی مەلزەمە و بەردەستبوونی بەو قورسییە لە پرۆسەی خوێندندا بە تایبەت لە زانكۆ و پەیمانگاكان، جۆرێك لە ئایدیۆلۆژیا بەرهەم دەهێنێت، ئایدیۆلۆژیا بە مانا ماركسییەكەی كە بریتییە لە هۆشیارییەكی هەڵە، ئەو نەوەیەیش بە هۆی ئەم مەلزەمانەوە فێر دەبن، دەبنە خاوەنی هۆشیارییەكی هەڵە، كە لێرەدا لە چەند خاڵێكدا ڕوونی دەكەمەوە:

1- مەلزەمە، كورتكردنەوەیە، كورتكردنەوەی چی؟ هی كتێب، كتێبەكانی مەنهەج… چ شتێك لە كورتكردنەوەی كتێبەكان مەترسیدارترە، كتێبەكانی مەنهەج بۆ ئەوە نیین كورت بكرێنەوە، بەڵكو بۆ ئەوەن بكرێنە دەروازە بۆ چوونە ناو كتێبخانە و پێگە ئەلكترۆنییەكانی كتێبەوە. كتێبەكانی مەنهەج نابێت كورت بكرێنەوە، دەبێت ڕێگەی دووردرێژ بۆ زانست و ئایدیاكانی ناوی بكەنەوە. مەلزەمە، كە كتێبەكان كورت دەكاتەوە، هەموو ڕێگەكان كوێَر دەكاتەوە، ڕێگەی چوونە كتێبخانە و پێگە ئەلكترۆنییەكانی كتێب بە یەكجاری قەپات دەكات.

2- كورتكردنەوە كە مەلزەمە دەیكات، لە ڕواڵەتدا بۆ ئاسانكردنی تێگەییشتنە، بەڵام ڕاستییەكەی گوزارشتە لە بەبنبەستگەییشتنی پرۆسەی تێگەییشتن، كە شتەكان كورت دەكەینەوە، واتە وەك خۆیان تێیان ناگەیین، نامانەوێت گەشە بە هزر و بیركردنەوەمان بدەین بەهۆی ئەم كتێبانەوە، بەڵكو ئەوان بە قیاسی مێشك و بیركردنەوەی خۆمان كورت دەكەینەوە، ئایدیاكان لە ناوەڕۆك دەخەین، تەنها فۆڕمێكی دروستكراویان دەهێڵینەوە، جەوهەری زانستەكان دەكوژین، تەنها بە قاوغەكانیانەوە دەگیرسێنەوە، لەم نێوەدا ئەوەی مەلزەمە دەیكات تێگەییشتنێكی ساختەیە، یان بەیانكردنی تێنەگەییشتنە.

3- مەلزەمە كاری كتێب ناكات، بەڵكو كاری كتێب كۆتاییی پێ دەهێنێت، ئەگەر لە ڕێی كتێبەوە جیهان بناسرێت، لە ڕێی مەلزەمەوە تەواو چاو لە بینینی جیهان دادەخرێت، ئەگەر لە ڕێگەی كتێبەوە فیكرمان لە پێناو گۆڕینی واقیع بگۆڕین، ئەوا بە هۆی مەلزەمەوە فیكرمان لە پێناو هێشتنەوەی دۆخی واقیع وەك خۆی جام دەكەین. ئەگەر كتێبەكان ئایدیا و زانست ‌و فیكرەكانت بخەنە بەردەست، مەلزەمەكان، لاشەی ئەو ئایدیا و زانست ‌و فیكرانەت پێ دەدەن، مەلزەمە جێگرەوەی كتێب نییە، بەڵكو ئەتككەری كتێبە.

4- مەلزمە واتە زیاتر سادەكردنەوەی تیۆر و ئایدیاكانی خوێندن، بەڵام ئیشی سادەكردنەوە، كە زۆر كەس بە باشی دەزانێت مەترسیدارە، سادەكردنەوە وای كردوە ڕووبەرێكی زۆر لەم جیهانە بە فەرامۆشكراوی و نەبینراوی بمێنێتەوە، سادەكردنەوە لەوەوە سەرچاوەی گرتوە كە وێنەیەكی ساختە و درۆیینەی ئەم جیهانە لە زەینی خۆماندا دروست دەكەین و وا لە خۆمان و ئەوانی تر دەگەیەنین جیهان هەر ئەمەیە، لەوەیشەوە بە ئاسانی بڕیار لە سەر زانست و دونیا دەدرێت، یەكێك دەڵێت قەومی كورد لە هەموو قەومێكی سەرزەمین عاقڵترە، یەكێكی دینییش دەڵێت، هەموو زانستی دونیا لە قورئاندا باس كراوە. سادەكردنەوە لە ڕێگەی مەلزەمە و هەر شتێكی ترەوە، واتە ناتەوێ ئەو جیهانەی كە ئاڵۆزە، بیبینیت و دەیسڕیتەوە، ئەو زانست و تیۆر و ئایدیایەی كە درككردن پێی ناوێرێ لە بەر چاوت لای دەبەی، هەموو ئەو شتانەی بە ئاسانی دەرك ناكرێن بەو شێوەیەیان لێ دەكرێ، تا بە ئاسانی بچنە ژێر ڕكێفی بڕیار و بیركردنەوە خێرا و سادەكانەوە.

نەوەی ڕازی بە مەلزەمە، نەوەی هۆشیاریی ساختەیە، نەوەیەكە كرۆكی زانست و تیۆرەكان نابینێت و تەنها دڵی بە قاوغەكانی زانست و تیۆر خۆش دەكات، نەوەیەكە لە جێی كرانەوە بەڕووی دونیادا، زیاتر خۆی دادەخات و گۆشەگیر دەبێت.
نەوەی مەلزەمە… نەوەیەكی نەك بێئومێد، بگرە نەوەیەكی ئومێد پێ نەكراو.

Previous
Next
Kurdish