Skip to Content

پرسیار بۆ هاتنی گۆدۆ.. جه‌لالی میرزا كه‌ریم

پرسیار بۆ هاتنی گۆدۆ.. جه‌لالی میرزا كه‌ریم

Closed
by May 8, 2021 General, Poems

1
بۆچی؟ ئەبێ. هەموو جارێ
گشت بەهارێ
ساڵ. لە دوای ساڵ،
((ساڵی خۆڵەمێش و زووخاڵ))
لەسای بەڕۆچكەی یادێكا..
((یادێك بێ باڵ))
خۆری تەزیو
بكەین بەسنگی مێژووا
نەء، لەناو گەرووی زامێكا.
((زامێكی تاڵ))
بەستەی ڕزیو
بكەین بەگیانی مردووا.
؟؟؟
بۆچی؟ ئەبێ. كاسەسەری
شەق كراوی
ژێر ئەرخەوانی بێ بەری
بەخوێن تەڕی
تەمەنی خۆزگەی وێڵ بوومان
لەچەرخی تازەی بیستەما
بۆ سێبەری.
گیانی زەردەشتی كوژراومان
بۆ ئاوێستای هەڵواسراوی
ناوخۆری ئاڵای سووتاوی
ئاسمانی بێ سەروشوێنمان
بێتە سەما.
؟؟؟
2
هاوڕێكانم!
بەهاری ئەم كوردستانە
هێشتا تینووی كانییەكە
نەتەقیوە.
دەنگی ژانی ئەم شارانە
چاوەڕێی گۆرانییەكە
هێشتا كاروانی قوربانی
دێڕەكانی.
نەچنیوە.
؟؟؟
3
هاوڕێكانم!
پرسیارمان هەزار و یەك
كوردستانمان
چاوەڕوانی گۆدۆیەكە
چاوەڕوانی مەزدەیەكە
چاوەڕوانی گوللەیەكە
سنگی ڕێگای ئاسمانی ون
هەڵتەكێنێ.
ڕاست كاتەوە
پەیكەری (ڕاستیی) سەروبن.
؟؟؟
4
هاوڕێكانم!
هاتنی گۆدۆی هاوڕێمان
بیری ئەوێ
خوێنی ئەوێ
وتە و كرداری نوێی ئەوێ
قوربانیی (كاروانی وشەی ڕاچەنیو)ی
ئەمڕۆی ئەوێ
شیكردنەوەی (كڵافەیەك
ژانی تووڕە)ی ئێمەی ئەوێ
(ڕۆژژمێری) سووتێنراوی
ئازاری (پێشمەرگە)ی ئەوێ
هەڵهاتنی (خۆرێكی یاخیبووی ئەوێ)
تەڵەی زامی
گیڤارای نوێی. نەك كوردستان
نەك بۆلیڤیا. هەموو جیهان
بەڵكو جیهانی نوێی ئەوێ.

*بڵاوكراوه‌ی ڕوانگه‌، ژماره‌ (2) 1971.

Previous
Next