گوزەرێک بە ئەوینی تۆدا.. قەسیدەی: ستیڤان شەمزینی
چ بەختەوەرییەکی غەریبە
هیچ چرکەیەک لە من تێناپەڕێ
بێ ئەوەی دڵم هەزار جار
وێردی ناوی تۆ نەکات؟!
چ کەوتنە خوارەوەیەکە
بۆ ناو زۆنگی چاوەکانت و
سەفەری بەردەوامی من
لەنێو وشە ناسکەکاندا
هەر بۆ ئەوەی شیعرێک بچنم و
بیکەمە گەردانەی ملت؟!
چ یارییەکی مەحاڵە
ئەو گەمەیەی دەستم داوەتێ
کە ئەمەوێ دووباڵت بۆ پەیدا بکەم و
بە رەنگاو رەنگیی شیعر بینەخشێنم،
تاکو بەرەو بەهەشتی عەشق پێی بفڕی؟؟
چ جوانییەکە
کاتێ گوێ لە دڵی خەمبارت ئەگرم و
حوزنە کپبووەکانی لە دێڕی قەسیدەکاندا
ئەهێنمە پەیڤین و
لەئاوی شیرینی زەردەخەنەیان هەڵدەکێشم؟
چ موعجیزەیەکە
کە تۆ چاوت دادەخەیت و
منیش بە مەڵهەمی سۆز
زامەکانت دەرمان ئەکەم و
هەناسەیەک لە خۆشەویستی
ئەخەمە سییەکانتەوە،
تەنێ لەبەرئەوەی بزانی
هەناسەی عیشق چەندێ سووکە؟
ئای چ شەوێکی شەوقدار بوو
ئەو شەوەی لە نێوان ژنێکی رەنجاو و
شاعیرێکی نامۆدا
کە هەر ورشەی گەڵا و
گڤەی رەشەبا بێداربوون و
یەکەمین بۆن و بەرامەی پەیمانبەستن دنیای گرتەوە؟!
چ گمە گمێکی خۆشە
وەک دوو کۆتری ماندوو
بە زمانی دڵ و نیگا
قسەمان لەگەڵ یەکتر ئەکرد و
بە کۆپلە هۆنراوەیەک
بەسەر یەکدا ئەتواینەوە؟!
چ داستانێکی پڕ جۆش و هەیجانە
ئەو دەمەی بیر لە حکایەتی خۆم و
چیرۆکی تۆ ئەکەمەوە
کە چۆن لە دێڕێک شیعردا
بە یەکتر گەیشتین؟!
چ دۆزینەوەیەکی کۆڵۆمبۆسانە بوو
تۆم لە هەیوانی ژانێکی بێ کۆتاییدا دۆزییەوە و
خوێنم خستەوە
نێو دەمارە سستبووەکانی هەستت؟!
چ لێوانلێوێک بوو لە شەپۆلی چێژ
کە دەستم ئەهێنا بەسەر دڵتا و
دەستەمۆم ئەکرد،
تۆش دەستت ئەگرت
بەسەر لافاوی هەڵچووی دەروونما؟!
چ بەهارێکی مەکرباز بوو
ئەو بەهارەی بە دوو چاوی پڕ بارانەوە
کەوتمە سەیر کردنت و
پایزیشم بۆ کردییە
فەسڵی سەوز بوونەوە و
وەک گوڵە بەیبوونێک
لە مندا شکۆفەت کردەوە؟!
چ سەرچڵییەکی بوو یاخیبوونمان
کە وەک دوو ئاسکە کێوی
بازمان بەسەر لوتکەکاندا ئەدا و
وەک چەم و کانیاو
بە هاژەوە ئەڕژاینە ناو یەکترەوە؟!
چ زەمەنێک بوو، چ کاتێک بوو
لەگەڵ تۆدا
هەستم بە تێپەڕینی کات نەئەکرد و
وا تێئەگەم کاروانی زەمەن
لەو کاتژمێرەوە وەستاوە
کە دەستی سڕم
خستە دەستی گەرمی عەشقی تۆوە؟!
چ تێڕامانێکی سیحراویی بوو
ئەو شەوانەی بەدیار تەماشاکردنی وێنەکانتەوە
خەو دەچووە چاوم و
شەکەتی رۆح و بێ وزەیی ژیانتم ئەزبەر ئەکرد؟!
چ سەوداسەرییەکی کەموێنە بوو
ئەو چرکەیەی خۆم خاڵی کردەوە
لە خودی خۆم و
خۆم تەژی کرد لە تۆ
بووم بە خودی تۆ؟!
چ رستەیەکی ئاڵۆشاویی بوو
کە نووسیم ئەمەوێ عەشقی من
زیندووت بکاتەوە،
بەڵام زۆر ئەترسم
بەرگەی نەگری و هەڵتپڕوکێنێ؟!
چ جیاکردنەوەیەکی سەیر بوو
کە تۆم لە هەموو خەڵک جیاکردەوە و
دڵی خۆم پێبەخشیت
تاجی هەموو شیعر و
هەستەکانی خۆمم لەسەر نایت؟!
بەهاری 2017
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
