Skip to Content

ئینجانەی خەونەکانم.. شەماڵ بارەوانی

ئینجانەی خەونەکانم.. شەماڵ بارەوانی

Closed
by June 27, 2021 General, Poems

وەرە چیتر با لەدووریت
دڵی ئینجانەی خەونەکانم
درز نەبات
و
شوشەی ڕۆحم هاڕەنەکات

وەرە
پەرتی قژی هۆنراوەکانم کۆکەرەوە
و
ڕەگی قەتماغەی فرمێسکەکانم هەڵکەنە

وەره
هەوری حوزن
لە ئاسمانی دیدەم ڕابماڵە
و
پاڵتۆی شەکەتی
لەدامێنی هەناسەکانم
دابکەنە

وەرە جانتایەک
دڵخۆشی بێنە
لەبنمیچی نیگەرانییەکانم
ببەستە
و
دڵۆپ دڵۆپ ئارامیت
بڕژێنه ناو پەرداخی عەزابم

وەرە
سەرابی
تەمەنم بێ دەنگ کەو
و
گۆپاڵی بێ تاقەتیم
سیخناخ کە لەهیوا

وەرە
قردێلەی ئستاتیکا
بدە لە بەرۆکی وشەکانم
و
بێ نازی شەقامی حەزم
بکوژێنەوە

وەرە
پەنجەی نوسینم
خاڵی کەوە لەعەبەسیەت
و
گۆزەی ڕستەکانم
پڕکە لە ئەنەرژی

وەرە
هیلاکی دیواری دەروونم لابەرە
و
تۆزی سەر پەنجەرەی
چاوەڕوانیم
بسڕەوە

وەرە
حەوشەی ئازارەکانم
لێوان لێوکە
لە بزە
و
پەردەی گریانم بدڕێنە

وەرە
تابلۆی مەراقم تەژیکە لەئیرۆتیک
و
ماچی ویساڵ
لەسەر ترۆپکی تەنیاییم داگیرسێنە

وەرە
ئیفلاس بە خەمەکانم بکەو
و
لەکۆچەی بێزاری دەرم بێنە

وەرە
زەمهەریری
جەستەی دێڕەکانم
خاوکەرەوە
و
لەئامێزی خۆزگەکانت
بمڕوێنە.

شەماڵ بارەوانی

Previous
Next