بۆ سلێمانی.. سه‌لام عومه‌ر
ده‌چمه سه‌ر لوتكه‌ی گۆیژه‌و
شاخی ره‌نگاوره‌نگی گۆیژه ده‌ڵێمه‌وه،
له‌لای سه‌را….
سروودێك بۆ شێخ مه‌حمود،
له سه‌ربانی حه‌سیب ساڵح
خوایه وه‌ته‌ن،
له‌ناو شه‌عب ئه‌حمه‌د شه‌ماڵ
له شه‌قامی سالمیش كه‌ریم كابان،
له توی مه‌لیك عوسمان عه‌لی و
له‌ناو تیپی پێشڕه‌ویشدا
شانۆی چه‌خماخه ببینم.
حه‌زم لێیه…….
له لۆقنته‌یه‌كی ئه‌م شاره
له‌جیات شه‌كر
یه‌ك دوو كفته‌ی سلێمانی بشكێنم
له‌جیات سیاسه‌ت
له‌جیات نوقورچ له‌یه‌ك گرتن
ئاوی نۆكاوێكی پڕ ئێسك هه‌ڵقوڕێنم.
زۆر حه‌زده‌كه‌م به‌جلی كوردی
بچمه‌وه وێ و
كه‌سێ به‌من نه‌ڵێ گوندی
به‌توانج پێمنه‌ڵێن خێڵه‌كی و
هه‌رگیز نابیته ئه‌فه‌ندی.
چیبكه‌م ئێجگار حه‌زم لێیه
بچمه‌وه شاری سلێمانی
شاری بێكه‌س و گۆران
ئی قانع و بێسارانی.
حه‌زم لێیه بچمه‌وه وێ….
بۆ هه‌میشه
قڵیشانه‌وه‌ی بازاڕ و
مانگرتن و
مرۆڤی پڕچه‌ك نه‌بینم
بچمه‌وه وێ…..
هه‌ر له شه‌قامی ئۆرزی
یه‌ك دوو خاتوونی ناسكۆڵه‌و
جوان ببینم.
Salam Omar
ژیاننامە )سەلام عومەر كەریم( *لە ساڵی 1967 لە قەڵادزێ لەدایك بووە .. 1986 ماڵیان دەچێتە هەولێر.. 1998هاوسەرگیری كردو ە.. 1984 وە چیرۆك و شیعر و بابەتی وەرزشی و فۆلكلۆری لە زۆرینەی رۆژنامە و گۆڤارەكانی ئەوكات بڵاوكردۆتەوە. دەستەی دامەزرێنەری تەلەفزیۆنی ئازادی بووە لەساڵی 1994.. ئەندامی یەكیەتی نووسەرانی كوردە *ئەندامی سەندیكای رۆژنامەنووسانی كوردستانە **سەدان وتاری سیاسی لە رۆژنامەو گۆڤارەكاندا بڵاوكردۆتەوە لە ساڵانی هەشتاكانەوە لە چەندین كۆڕی شیعری بەشدار بووە *لە ساڵی 2000 سەرنووسەری ئەدەب و هونەری رێگەی كوردستان بووە كەرۆژنامەیەكی سەربەخۆ بوو *سەرنووسەری ماڵپەڕی رێگەی كوردستانە * 10 كتێبی چاپكراوی هەیە لە رۆمان و شیعر و چیرۆك +چەند شیعرێکی کراوەتە گۆڕانی و سروود، شیعرێکیشی لە پڕۆگرامی خوێندنی قۆناغی بنەڕەتی دەخوێندرێ * لە ساڵی 1993 وە لە راگەیاندنی حزبی شیوعی كوردستان كار دەكات و تا ئێستا بەردەوامە.
