Skip to Content

چیتر لە خۆم ناچم.. شیعری: ستیڤان شەمزینی

چیتر لە خۆم ناچم.. شیعری: ستیڤان شەمزینی

Closed
by September 4, 2021 General, Poems

گوێ رابگرە، ئەو هاڕەیە
شکانی روانینە شوشەییەکانی منە
لەم وەرزە بەردینەی گوماندا
گوێ رابگرە، ئەو ناڵەیە
کەوتنەوە خوارەوەی چاوی منە
بۆ ناو گلێنە ئاگراوییەکانی یار
گوێ رابگرە، ئەو نرکەیە
دوا هەناسە شیرینەکانی منە
لەم کۆڵانە تاڵەی وجوددا
گوێ رابگرە، ئەو هاوارە
سەدای خنکاوی گوڵەکانی منە
لە نێو ئینجانەکانی گوناهدا
گوێ رابگرە، ئەو چرپەیە
وەسێتنامەی نامرادی منە
لەم مەزادخانەیەی نیشتماندا
گوێ بگرە، دەنگی ئەو گەردەلولە
شەپۆلی ئەشکی داگیرساوی منە
لەم چاخە قەترانییەی پێکەنیندا
بیر بکەوە، پێشتر چۆن بووم؟
کاسە بەتاڵەکانی بیناییم
پڕ دەکردەوە لە شەرابی نیگا
دەمی شەوم دەکردەوە و
قەترە قەترە تیشکی سپێدەم پێدەدا
لێوی وشکی پیرەداری زەمەنم
بە ماچە حەرامەکانی ژیان تەڕ دەکرد
مەرکانە تینووەکانی مەراقم
پڕ دەکردەوە لە ئاوی سازگاری ئومێد
گیرفانە تەسکەکانی دوێنێم
پڕ پڕ دەکرد لە شیلکی ئەمڕۆ
مەزرا سوتماکەکانی دڵم
بە باراناوی عاتیفە دەژیاندەوە
زیندانە نوتەکەکانی فەنتازیام
پڕ دەکرد لە پەپولەی ئازاد
کەلاوە وێرانەکانی دابڕانم
بە ژوانێکی تر ئاوەدان دەکردەوە
تێکەڵی ئەو لافاوانە ئەبووم
رێیەکیان لە چاوەکانی تۆ و
رێیەکیان لە ئارەزووەکانی من بوو
کتێبەکانی چارەنووسم ئەخوێندەوە
پەڕەیەکیان دەچووەوە سەر زەردەخەنە و
پەڕەکانی تریش سەر حەسرەتی هەڵوەرین
پەنجەرە روونەکانی مێژووم ئەکردەوە
ماڵئاواییم لە دوێنێی خۆشنودی ئەکرد و
خۆم بۆ سەفەری ئەمڕۆ ئامادە ئەکرد
سەفەرێک بۆ مەملەکەتی خورپە و
بەرەو دوورگە سەرابییەکانی عەشق
بیر بکەوە پێشتر من چی بووم؟
لە دارستانی کپیدا، تەور بووم
لە دەریای ئەویندا، کەشتی بووم
لە جەنگەڵی گڕدا، ئاو بووم
لە زریانی تاریکیدا، مۆم بووم
لە بیابانی دڕکەزیدا، گوڵ بووم
لە قووڵایی ئاسماندا، ئەستێرە بووم
لە بەستەڵەکی هەستدا، ئاگر بووم
لە چاوەڕوانیدا، کورتترین رێ بووم
لە ماچدا، شیلەی سەر لێو بووم
لە باوەشدا، گەرمی لەش بووم
لە لێکئاڵاندا، حەزێکی شێت بووم
لە قەفەزی تاریکیدا، مانگەشەو بووم
لە چیای بێهودەییدا، هەڵۆی ئومێد بووم
لە کۆشکی شیعردا، ساقی بووم
ئێستا وەرە سەیرم بکە
وەک کارمامزێک هەموو رۆژێک
لە شاخەکانی تۆوە هەڵدەدێرێم
بەرەو دۆڵە خەزانییەکانی پەژارە
وەک پیرە بازێکی ناو غوبار
چاوی فڕینم کوێر بۆتەوە و
کەوتوومەتە نێو مێرگی مەمکەکانت
کە وەک خونچە گوڵ شکۆفەیان کردووە
وەک سەربازێکی مەیدانی جەنگ
هەموو ئازادیی خۆمم خستە
قەفەزی تیشکاویی دڵی تۆوە
وەک نێچیرێکی بێ چارە
قاچم کەوتە ناو داوی عەشقت و
رۆژژمێری درەوشانەوەم
لە ناو دەمارەکانی دیرۆکدا
بوونەتە سوتووی بەر رەشەبا
وەک باڵندەیەکی تەزیو
لە نێو بەفرستانی غوربەتدا هەڵدەلەرزم و
لە نێو کورەی چاوە بڵێسەدارەکانتدا
پەروانەئاسا هەڵدەکڕوزێم
وەک ئەو کچە دڵشکاوانەی
لە بەردەم ئاوێنەکانی ناپاکیدا
بۆ پاکیزەیی عەشق دەگرین
شیوەن ئەگێڕم
بەسەر تەرمی خۆمدا
لەو کاتەی وتم سەفەرێکم لەبەرە
سەفەرێک بۆ ئاسمانە باراناوییەکانی ئەوین
سەفەرێک بەرەو ونبوونی خۆم
لە رێگا پێچاوپێچەکانی دڵی تۆدا
من تێر تێر ئەگریم
بۆ ژینی تاڵی ئارامی پێشووم و
رۆژانی شیرینی بێ ئۆقرەی ئێستام
لەگەڵ تۆ
ئیدی من چیتر لە خۆم ناچم
نە ئەو نەورەسەی جارانم
ئاسمان پڕ بکەم لە بۆنی هێمنی و
نە ئەو کۆترە شینکەیەی پێشووم
بەسەر قوبە بەرزەکانەوە ستران بچڕم
من ئەمێستا کوڕی رەهێڵەم و
باوکی هەموو تۆفانەکانی سروشت
ئەمێستا برازای گەردەلوولم و
مامی هەموو رەشەباکانی کەون
ئەمێستا نەوەی باپیرە هەورم و
باوە گەورەی گشت بارانەکانی عەشق
ئەمێستا هیچ لە پێشووی خۆم ناچم
من زۆر گۆڕاوم، زۆر زۆر.

Previous
Next