Skip to Content

وەرزە سەوزەکانی ئەوین- وەرزی سێیەم.. شیعر: ستیڤان شەمزینی

وەرزە سەوزەکانی ئەوین- وەرزی سێیەم.. شیعر: ستیڤان شەمزینی

Closed
by September 19, 2021 General, Poems

پێش جەنگ “کەناریی”
لەسەر منارەی دڵم ئەیخوێند و
موناجاتی عەشقێکی سەرمەدیی ئەکرد
پاش جەنگ کوندەپەپوو
لەسەر کەلاوەی رۆحم ئەیخوێند و
خوێنی رژاوی گوڵە ئاشقەکانی ئەژمارد


لە سەمای یەکەم بە یەکگەیشتندا پێتوتم
ناوت ئەنێم ئینجانەی گوڵە مۆرە شەکەتەکان
لە دوا سەمای یەکتر جێهێشتنا پێتوتم
ناوت ئەنێم دوایین دڵۆپە خوێنی عەشقێکی ناکام


ئەمەوێت شیعرێکت بۆ بنووسم
تاکو ئێستا هیچ قەڵەمێک نەینووسیبێ و
هیچ زارێکیش دەرینەبڕیبێ
ئەمەوێت سووتانێک بۆت بسووتێم
تاکوو ئێستا هیچ دارستانێک ئاگری وەها
لە لەشی سەوزی بەرنەبووبێ


وێڵم بە دوای
ئەو ژنە یاقووتییەی پرچی پەلکەزێڕینە و
زەردەخەنەکەی پڕ لە شەپۆلی رەنگە
وێڵم بە دوای
ئەو ژنە تریفەییەی چاوەکانی دەریا و
هەستەکانی پڕ لە گوڵی نیلوفەرە


گوێیەکانم سەڕاوێژن لە سۆزی دەنگت و
چاوە دەریاییەکانم لێوانلێون
لە روانینە خەمۆکەکانت
دەستەکانم تەڕتەڕن بە تاڤگەی ئەسرینت
دڵ و رۆحیشم
لە مێژە چزاون بە پشکۆی ئەوینت


بمخوێنەوە وەک دارسنەوبەرێک
لە کاتی خۆکوشتندا و
بمچڕە، زۆر خێرا بمچڕە
وەک سترانێکی رەشبین
ئەتخوێنمەوە وەک پاڵەوانی
چیرۆکێکی غەمناک و
ئەتژەنم، توند ئەتژەنم
وەک “ساز”ێکی زۆر کەساس


لە حەزرەتی ئاو بپرسە
من کوڕی کام هەسارەم و
لە جەنراڵ زریان بپرسە
من لە کوێوە هاتووم؟
لە ئاسمانی موحیبەت پرسیار بکە
کەی دەبارێم و
لە بێستانی هەستت
بپرسە کەی لەتۆدا خۆش ئەکەمەوە؟


سروشتم وایە لە کۆتاییەوە
دەگەڕێمەوە بۆ سەرەتا و
لە سەرەتاکانیشەوە دێمەوە نێو کۆتایی
زۆر سەیرە لەسەر شاڕێی
هەموو سەرەتاکان و
کۆتایی گشت رێگاکان
هەر دەگەمەوە بە تۆ!!


بمبورە ئەگەر لە ناکاو
وەک ئەستێرەیەک ون بووم و
لە هیچ شوێنێکی گەردوون ئاسەوارم نەما
هیچ دڵتەنگ مەبە و چاوەڕێی بەهارێک بکە
وەک چڵە نێرگزێک بڕوێم لەسەر رێتا


لەوەتی من هەم
خەونی رەنگاورەنگت پێوە ئەبینم
چەشنی خەونی هەژارێک بۆ پارچەیەک نان
لەوەتی من هەم بە بێدەنگی خۆشم ویستی
هەر وەک عەشقی باڵندەیەک بۆ ئاسمان

————-




Previous
Next