Skip to Content

دەروازەی غوربەت .. شەماڵ بارەوانی

دەروازەی غوربەت .. شەماڵ بارەوانی

Closed
by كانونی یه‌كه‌م 7, 2021 General, Poems


..
بەهۆی تۆوە
هێشتا وشەکانم مەحکومن بە نەزیف
و
لەهجەی ڕستەکانم لەحاڵەتی
سکوتدان

بەهۆی تۆوە
ڕەهێڵەی بارانی گریانم
ناسی
و
ئاشنای دەڤەری خەم بووم

بەهۆی تۆوە
کەشتی ئومێدم
لەنۆکەندی دڵشکان لەنگەری گرت
و
گۆزەی ئاواتم شکا

بڕۆ ئازیز
نامەوێ چیتر
بەو هیلاکی عومرمەوە
بگەڕێمەوە
ناو زەمەنی خۆشباوەڕیم
و
دووبارە
لەکونی کۆنە عیشقێکەوە
چزوی خەیانەت
بمگەزێت

نامەوێ
جارێکیتر
لە ئاوێکی لێڵدا سەوڵ لێبدەمەوە
کەیەکەم بەڵەمم
تێیدا بەشەپۆڵی غەدر خنکا

برۆ فرمێسکەکانت
ببەرەوە بۆ مەملەکەتی خەجاڵەتی
و
ملوانکەی پەشیمانیت
بەگەردنی تەریق بوونەوە بسپێرە

کە شعوری ئینجانەی حەلاجی
حەرفەکانم
بە گوڵە سورەکەی شبلی شکا

کە مەسنەوی موناجاتەکانم
بەفیراقی شەمس
سوتا
موتاڵاکردنی حەسرەتەکانی مەولانا
سودی چییە

کە تێکستەکانم
تووشی عەقیدەی خەمۆکی بوون
و
کتێبی شیعریم
ڕۆشتە سەر عەبەسترین مەزهەب
بەئەرشیفکردنی سەراب
مانای چییە

تازە من چومەوە زەمەنی پیری و
وەرزەکانم
هەمووی بوو بەخەرابات

تازە
باڵندەی خەندەکانم
بەرەو خەرەندی فرمێسک
کۆچیان کرد
و
مەنفای دڵشکانیان کرد بەنیشتمانی
بێدەنگی

ببورە
من خەریکی کۆکردنەوەی
پاشماوەی بیرەوەرییەتاڵەکانم
و
چیتر حەوسەڵەی گوێگرتن
لە سەرگوشتەی هەڵکڕوزانم
نەماوە

خۆمن تازە هەموو چرکاکەنم
لەکارکەوتوون
و
هەناسەکانم
لەلێواری ئیفلیجدان

من
لەمێژە چۆگەڵەی هەنسکەکانم
وشکی کردووە

لەمێژە ڕۆشتومەتەوە
سەر ڕەچەڵەکی عەزابێکی ڕەهاو
و
بوخچەی باوەڕم
تژی بووە لە دەهری بوون

لەمێژە
سپێدەی هەنگاوەکانم
بەرەو دەروازەی غوربەت
کەوتووەتەڕێ و
خۆری چاوەڕوانیم
بەرەو تخوبی ئاوابوون

لەمێژە
سەربردەکانم پڕبوون لە زام
و
مەوتنی ڕۆحم
سیخناخ لەچۆڵەوانی

لەمێژە چۆڵەکەی هێزم
لەفڕین کەوتووەو
و
تەرمی خەونەکانم
بە تابووتی نشووست سپاردووە

ببورە
من ئیدی چومەتە ئەو دیوی وەرزی کوژانەوە
و
میزاجی جارانم نەماوە
ڕادیکاڵانە خۆشم بوێیت

تازە چۆن بتوانم
ئەو هەموو پیرییە لەئاوێنەی تەمەنم
بتەکێنم

چۆن گەمارۆی ئەو هەموو تاڵەسپیەی
قژی هۆنراوەکانم
بشکێنم

چۆن بتوانم
وەرزی پەرتبوون بێدەنگ بکەم
و
کەناری ئۆقرەییم
لەشەپۆڵی هەراسان
بەتاڵ کەمەوە

ببورە
من تاتوانم
هیچ تەرجەمەیەکی
ئەو هەموو بێ تاقەتیەی
دەربەندی دەروونم
بکەم

ناتوانم
غوباری غروری
ئەو تاریکیە نەرسسیەی
باڵەخانەی
ڕۆحم دوور خەمەوە

ئیتر
چۆن بتوانم
جارێکیتر
دوو ڕکعات نوێژی زەمهەریر دابەستم

ناتوانم
نا
ببورە من دەبێ بڕۆم
ئەوە
شەمەندەفەری مەرگ
وا دەگات
بە دوا سنورەکانی تەمەنم

خوا حافیز
ئەی ناپاکی

Previous
Next
Kurdish