Skip to Content

عـەزاب.. شەماڵ بارەوانی

عـەزاب.. شەماڵ بارەوانی

Closed
by December 25, 2021 General, Poems

تازه دەگەڕێیتەوە
دوای ئەوەی ئەرشیفی ژیانم
لێوان لێو بوو
لەگریانی خەست
لەخەمی هەراش
لە عەزابی ڕووت

کات زۆر درەنگە
دەبوا زوو بێیتەوە
بەر لەوەی
چرکەکانی تەمەنم
لەکار بکەوێت
و
باڵی سەمای زۆربام
بشکێت

بەرلەوەی
درەختی ئومێدم
غەریزەی یەئس بگرێت
و
خونچەی ئازارەکانم
بپشکوێت

بەر لەوەی
دیواری بەختم درز ببات
و
کراسی چاوەڕوانیم
بدڕێت

بەرلەوەی
شەپۆلی حوزن
لە کەناری دەروونم بەرقەراربێت
و
باڵندەی بزە
لە مەملەکەتی تەنیاییم بفڕێت

تاکەی
لەنۆکەندی تارمایی دا
سەوڵی خۆشباوەڕی لێبدەم
و
کەشتی حەزەکانم
لە ناو شەپۆلی غەدردا
بخنکێت

تاکەی
لەدەڤەری دڵپاکیم دا
سەراب بڕوێت

ببورە
من ئیتر ئشتیای
جەنگێکی بێ ماناو
ئۆقرەی نشوستم نەماوە

چیتر
قوماری عیشق و
شەڕی ئەو هەموو
دۆڕانە بەمن ناکرێت

من ناتوانم
ئەو هەموو هێشووەی هەڵوەرین
کۆبکەمەوە

خۆمن
هەموو قاقاکانم
بوون بەخەڵووز
و
وەرزی خەونەکانم
پایز

من لەمێژە
چوومەتەوە سەر نەسلی هیلاکی
و
ڕەنگی سەحرام
لێ ڕواوە

لەمێژە
ڕۆشتوومەتە سەر عەقیدەی دەهریبوون
و
بەرگی ڕاهیبەییم فڕێداوە

دەی
من دەبێ بڕۆم

وادەی وەڕزیم تەواوبوو
و
ئیتر سەنگەری عیشق جێ دێڵم

دەستدەکەم
بەسەفەری دڵشکان
و
دەڕۆمەوە سنووری فەنابوون

ماڵئاوا
ئەی شکست

Previous
Next