Skip to Content

رازەکانی ئەوین و هەناسەکانی دەریا.. تێکست: ستیڤان شەمزینی

رازەکانی ئەوین و هەناسەکانی دەریا.. تێکست: ستیڤان شەمزینی

Closed
by January 6, 2022 General, Poems


رازی یەکەم

سەرسامم بە تۆ
کە توانیت لە دڵی خۆتدا
یەخسیرم بکەیت
سەرسامم بە تۆ
وات لێکردم کتێبی عەشق
پەڕە پەڕە بخوێنمەوە
لە هەر لاپەڕەیەکیشدا
مەرجانی پێکەنین بدۆزمەوە


زۆر زوو زانیم دەریایت
لە بری شەپۆل، مات و بێدەنگ
لە بری پاپۆڕ، عەشقی منت
پێدا تێدەپەڕێت
زۆر زوو زانیم دەریایت و
بە شمشێری جوانی ئەمکوژیت
بە ئاگری نیگا ئەمسووتێنیت
بە چرای پڕ ناڵەی
شەوە کپەکانم ئەناسێنیت


هەمیشە ئەمەوێ
کۆدی رازەکانت بکەمەوە
لەوێ خۆم ئەبینم
دڵم پڕ بووە لە نوری عەشق
هەمیشە ئەمەوێ
تەڵیسمی رازەکانت بشکێنم
لەوێ خۆم ئەبینم
خەونەکانم پڕ بوون لە بریسکە و
ئاسمانم شاگەشگە بووە
بە سەمای پۆلێک ئەستێرە


خێرا وەرە نازەنینم
داری تەمەنم یەک گەڵای پێوە ماوە
بۆ سەوزبوونەوە لە مێرگی عەشقدا
خێرا وەرە فریشتە ژن
لە بەردەم پەنجەرەی چاوەڕوانیدا
تک تک خوێن لە چاوم دێ و
دڵۆپ دڵۆپ فرمێسک لە دڵم


دەبوو ئێمە زووتر یەکتر بناسین
لە کۆڵانەکانی قەسیدەیەکی دڵ تەڕ
لە شەقامە بخوورییەکانی رۆح
دەبوو ئێمە زووتر ئەم رێگە ببڕین
بەرەو باخە پەلکەزێڕینەییەکانی زەردەخەنە
بەرەو ماڵە پڕ مۆمەکانی فەنتازیا
بەرەو کەناراوەکانی دەریای خەون


تۆ ئەتەوێت بەنهێنی خۆشم بوێی
کەچی من بە ئاشکرا ئەوەرێم و
بە پەنهایی و لە تاریکی شەودا ئەگریم
ئەتەوێت بە ئاشکرا شیعرت بۆ بنووسم
کەچی من بە نهێنی ئەتوێمەوە و
بە بەرچاوی خوداوە گۆنات ماچ ئەکەم


هەر چاوەڕوان بووم بازی عەشقی تۆ
لەسەر شانی راستم بنیشێتەوە
وا ئێستا لە دوا نیگای وەریوتدا
تەرمی خۆم لەسەر شان هەڵگرتووە
هەر چاوەڕوان بووم لە باوەشی پێکەنینتا
بە ئارامی سەرخەوێک بشکێنم
وا ئێستا بە دیار ئەلبوومی بیرەوەرییەوە
شەڵاڵی بێدەنگترین گریان بووم


Previous
Next