Skip to Content

کورتە چیرۆک/ لە خۆی هەڵدێ.. گۆران سەباح

کورتە چیرۆک/ لە خۆی هەڵدێ.. گۆران سەباح

Closed
by January 6, 2022 General, Literature



بە تاقی تەنیا ئیشەکانی دەکرد. پلیتی دەبڕی، نەفەری دینارێک. دیمانەیەکی خێرای دەکرد، سێ پرسیار: ناوی تەواوت؟ تەمەنت؟ کارت؟ نەفەری لەسەر کورسی دادەنا، دڵنیای دەکردەوە تا سەری ڕێک لە بەرانبەر ئامێرەکە بێت. پاشان دەچووە گژ ئامێرەکە. بەرنامەکەی ئاکتیڤ دەکرد، چەند دوگمەیەکی دادەگرت: دوگمەی بەئیشخستنی هەستەکان، هیی کاردانەوەکان، هیی سۆز و بیرکردنەوە، هیی وەڵامی ئەندامانی جەستە. ئەوجە تێکستێکی پێشان دەدا و دەیگوت بخوێنەوە.
خەڵك چەند ڕۆژ سڕەی دەگرت، هەفتەیەک پێشتر تەلەفۆنی دەکرد ناوی تۆمار بکات. کاتێ دەگەییە ئەو شوێنەی پڕۆفیسۆرەکە پێی دەگوت بخوێنەوە، یەکسەر هەڵدەهات. ئاوڕیشی نەدەدایەوە. نەیشیدەتوانی بە کەس بڵێ تێکستەکە چییە. ئەمەش وایکردبوو ببێتە مەراق لای خەڵک. ڕۆژ بە ڕۆژ سڕەی دوکانی پڕۆفیسۆرەکە، کە لە تەنیشت پەرلەمان بوو، درێژتر دەبوو. ڕۆژ هەبوو سڕە دەگەیشتە گەڕەکی سێتاقان.
پزیشک، پەرلەمانتار، مامۆستا، بازرگان، ڕۆشنبیر، بیرمەند، جووتیار، هەموو ئاستێک سڕەیان دەگرت، بەڵام کە پڕۆفیسۆر دەیگوت بخوێنەوە، هەر لەگەڵ بینینی یەکەم وشە، هەڵدەهاتن. هەبوو جانتای لە بیر دەچوو، هەبوو کڵاو، چاکەت.
کەناڵەکانی میدیا، ئاسایش، هەواڵگری، پزیشکانی دەروونی لەگەڵ هەڵاتووەکاندا دادەنیشتن، دەیانویست بزانن خەڵک بۆ هەڵدێن. ئەوانیش هەموو شتێکیان باس دەکرد، بەس نەیاندەتوانی بڵێن تێکستەکە چییە. وای لێهات تێکستەکە بووە هەڕەشە. دەسەڵات لێی دەترسا. تاک و کۆمەڵگەیش.
تێکستەکە بووە کەیس و پڕۆفیسۆر درا دادگە. حوکمی دادگە ئەوە بوو پڕۆفیسۆرەکە خۆی تێکستەکە بخوێنێتەوە، هاوکات بۆ هەموو خەڵکیش پەخش بکرێت.
پڕۆفیسۆر لاری نەبوو. ڕۆژی پاشتر سەعات هەشت، هێشتان پڕۆفیسۆر دوکانی نەکردبووەوە، قیامەت هەستا بوو، دەیان کەناڵی تەلەفزیۆنیش ئامادە بوون.
پڕۆفیسۆر لە بەرانبەر ئامێرەکە دانیشت. لە ڕێی مۆبایلەکەی بەرنامەکەی ئاکتیڤ کرد و دوگمەکانی داگرت. تێکستەکە بەدیار کەوت. خوێندییەوە و هەڵنەهات. ئەمەی خوارەوە تێکستەکە بوو:
تۆ ونی. تەمەنت پەنجا ساڵە و خۆت ناناسی. بە حسێبی خۆت، هەموو شتێکت کۆنتڕۆڵ کردووە، هەموو شتێک لەسەر خۆت دەزانی، دەزانی بای چەندی. لێ هیچ لەبارەی خۆتەوە نازانی و هیچیشت کۆنتڕۆڵ نەکردووە. نازانی حەزت لە چییە، حەزت لە چ نییە. نازانی ڕقت لە چییە و لە چ نییە. تا ئێستە نازانی حەزت لە چ ڕەنگێکە، بە چ تێک دەچی. نازانی خۆشترین خواردنت چییە. نازانی چ ستایلێکی پرچت، چ ستایلێکی جلت لێ دێت. کە قسان دەکەی پێت وایە گرنگترین شت دەڵێیت. کە دەڕۆی شای ناکەیە سەپانی خۆت. هەر بابەتێک بکرێتەوە، لێی دەزانی. هەر کارێک بێتە پێشەوە، وەستای. پێت وایە دەتوانی منداڵ بە باشترین شێوە پەروەردە بکەیت، وڵات بە باشترین شێوە بەڕێوە ببەیت. پێت وایە باشترین شۆفێری، باشترین باوکی، برای، مێردی. پێت وایە نەبەزترین و چاونەترسترینی. ڕەخنە لە دار و بەرد دەگریت. ڕات لە هیچ نییە. هیچت پێ هیچ نییە. هەموو شتێک ڕەت دەکەیەوە و چارەسەریشت بۆ هەموو شتێک پێیە.

Previous
Next