ئەمشەو تەنیایی دادەگیرسێنم.. شەماڵ بارەوانی
ئەمشەو
لەگەڵ بێدەنگی شەوەزەنگدا
بەدەم ژەنینی فلوتی ئازار
و
بەباکردنی جگەرەی خەمەوە
شەوێکیتری تەنیایی دادەگیرسێنم
ئەمشەو
ئینجانەی بەختم لەسەر باڵکۆنی
تەنیایی درز دەبات
و
تەرمی خەونەکانم
لەگۆڕستانی عەدەم
دەچێنم
ئەمشەو
نە کۆترێک گمەی دڵخۆشی
لەسەر پەنجەرەی بێتاقەتیم
دەخوێنێت
نە نەغمەی بولبولێک
نمەی بارانی بێزاریم
دەڕەوێنێتەوە
و
نەشنەبای نەسیمێکی تەڕ
پەردەی هیلاکیم دەلەرێنێتەوە
ئەمشەو
ئستاتیکای وشەکانم
دەبن بە تراویلکەو
و
ئەدرەسی هەموو هۆنراوەکانم
دەچنەوە سەر نەسەبی هەڵوەرین
ئەمشەو
دوا فەسڵی خەونەکانمە
و
تنۆکێک بزەم نامێنێت
بۆ فانۆزی پێکەنین
ئەمشەو
شەپۆلێک خەمی سەرشێت
لەپێدەشتی دەرونما
دادەکات
و
هێشووی هەنگاوەکانم
دەبن بەبەرد
ئەمشەو
شیعرەکانم
کاژی چاوەڕوانی
فڕێ دەدەن
و
ڕوخساری دێڕەکانم
ئاوێتەدەبن بە باوەشێک گەڵای
ڕەنگ زەرد
ئەمشەو
هاژەی رووباری خۆزگەکانم
دەخنکێن
و
زۆربای ڕۆحم
مەیلی سەمایەکی خەمناک
دەکات
ئەمشەو
مەوسمی بەهار
هەرێمی دڵم جێ دێڵێت
و
وەرزێکیتری پاییز
دەست پێدەکات
ئەمشەو
جۆگەلەی هیچ ماچێک
کانی مەراقم بەسەرناکاتەوەو
هەواری تامەزرۆییم
تەڕناکات
ئەمشەو
ئاوێنەی ئاواتم
دەشکێت
و
کزەبای
هیچ هەناسەیەک
لەتابووتی جەستەما
هەڵناکات
ئەمشەو
باڵندەی ئومێدم
بە بێ نازی سەردەنێتەوە
و
دووبارە کاروانێکیتری
سەراب
بەرەو هەیوانی تەنیاییم
دێتەوە
