Skip to Content

دوو کۆپلە شیعری نەوزاد بەندی

دوو کۆپلە شیعری نەوزاد بەندی

Closed
by كانونی دووه‌م 28, 2022 General, Poems

کۆپلەیەکی درەنگ وەخت

تەنها گوڵێ لەو گوڵانە ..
تەنها دڵێ لەو دڵانەی
ئەتناردن بۆم ،
نەگەیشتە لام ..
تەنها ووشەیەک ..
یان پیتێ ، لەو نامانەی
بۆت ئەنووسیم ،
نەیدا لە دەرگام ..

ئێ خۆ منیش دار و بەرد نیم ،
دوور کەوتمەوە ..
لە چیرۆکێکی سارد و سڕ ..
لە پرسیارێکی بێ وەڵام

دەمێکە ئەمەوێ ئەمە
بدرکێنم ،
هەر نەمدرکاند
ساڵەهای ساڵە وا لە لام ..

——————————————–

هەندێ جار

هەموو دەرگاکان دابخە
پەنجەرە بکە بە دیوار ..
ڕێی یادگاریت پێ ناگیرێ
یادت دێ بۆ لام جار و بار ..

وون بوونت ، دنیای نەڕوخان
تەنها چرایەک خامۆش بوو ..
ڕوناکیی گۆشەیەکی دڵ ،
لە ناکاوا فەرامۆش بوو ..

من بێ تۆیش هەر وەک جارانم
هەر شەپۆل ئەدا ،دنیای من..
هەر پیاوەکەی بەر بارانم ..
لە جیهانێکی وەک ئاسن

لام ئاساییە ، ناڕەنجێم ..
ڕۆژێ دێ دڵیش ئەوەستێ ..
گەر گونجاوم ..گەر نابەجێم ،
ڕێکم خستی وەک هەڵبەستێ

لەگەڵ هەموو بێدادییەک
خۆم دادەنێم به قەرزاربار ..
کە تۆ بە چەند ووشەیەکت
پاییزت کردم بە بەهار

24.1.2018

Previous
Next