Skip to Content

کەی وەفاتی میللەت ڕائەگەیەنن..!!… شيعر: نزار قبانی.. بە کوردی کردن: پشکۆ ناکام

کەی وەفاتی میللەت ڕائەگەیەنن..!!… شيعر: نزار قبانی.. بە کوردی کردن: پشکۆ ناکام

Closed
by May 15, 2022 General, Poems

     1

لە مناڵیمەوە ئەمەوێ

وێنەی ووڵاتێک بکێشم

” ئەگەر وا ناو بنرێ”، بە:

بە ووڵاتی کورد ناو ئەبرێ

كە لێم ببورێ گەر شوشەی مانگم شکان

     و

سوپاسم بکا گەر قەسیدەیەکی

خۆشەویستیم نووسی

     و

ڕێگەم با وەک هەموو

چۆلەکەکانی سەر درەخت

بۆ کردەی خۆشەویستی جووت بم

ئەمەوێ وێنەی ووڵاتێک بکێشم

فێری کردبم هەردەم

لە ئاستی عەشقا بم

هاوینان عەبای خۆشەویستیت بۆ ڕاخەم

لە باران بارینیشا

كراسەکەت بچۆڕم

“”””””””’

     2

ئەمەوێ وێنەی ووڵاتێک بکێشم

پارلەمانێکی لە نێرگس

     و

گەلێکی ناسکی نێرگس ئاسای هەبێ

كۆترەکان لەسەر سەرم بنوون

     و

مەنارەکانی لە چاوما بگرین

ئەمەوێ وێنەی ووڵاتێک بکێشم

هاوڕێ ی شیعر بێ

     و

خۆی هەڵنەقورتێنێتە بیر کردنەوەکانم

     و

چەکدارەکان بەسەر ناوچەوانما نەڕۆن

ئەمەوێ وێنەی ووڵاتێک بکێشم

گەر شیعرێکم نووسی خەڵاتم کا

     و

گەر ڕووباری “شێت”ێتیم

بوو بە لافاوێ

……لێم ببورێ

“””””””””””””’

     3

ئەمەوێ وێنەی شارێک بکێشم

لە هەموو گرێ کوێرەکان، ڕزگار کرا بێ

” مێ” یەتی تیا سەرنەربڕدرێ

     و

لەش و لار  دانەپڵۆسێنرێ

“””””””””””””

     4

باکور گەڕام

باشور گەڕام

هیچ….سوودێکی نەبوو

“چا”ی هەموو چایخانەکان وەک یەک بوو

هەموو یەک بۆنیان هەیە

     و

پیاوەکانی خێڵ خوارد ناجوون

     و

بەیەک سانیە ئافرەت هەڵئەلوشن

“””””””””””””’

5

لە سەرەتاوە هەوڵم یاوە

لە یەکێکی تر نەچم

قسەی “قوتوو”م قبوڵ نەبوە

پەرستنی هیچ “بت”ێکم قبوڵ نەبوە

“”””””””””’

     6

ئەمەوێ هەموو ئەو دەقانەی

لەبەرم کردوون ، بسوتێنم

هەندێک قەسیدە “گۆڕ”ن

     و

هەندێک زمان “کفن”

     و

لە گەڵ دوا ئافرەتیا ڕێککەوتم

بەڵام کە گەیشتم

تێپەڕی بوو زەمەن

“””””””””””

     7

ئەمەوێ خۆم لە دەستەواژەکانم

     و

زمانی ڕستە و ووشەی لێکدراو

پاک بکەمەوە

خۆم لە تەپ و تۆزم بتەکێنم

     و

بە ئاوی باران دەم و چاو بشۆم

ئەمەوێ لە دەسەڵاتی شاخ بکشێمەوە

ئیتر ماڵ ئاوا : خێڵ

ماڵ ئاوا بابان

ماڵ ئاوا ووڵات

“”””””””””””

     8

ئەمەوێ وێنەی ووڵاتێک بکێشم

شوێنی خەوم جێگیر بێ

شوێنی سەرم جێگیر بێ

تا جیاوزای نێوان ووڵات و پاپۆڕ بزانم

بەڵام” ئەوان” پەڕەی وێنەکەیان لێ سەنم

نەیانهێشت،

سیمای ووڵات بکێشم

“”””””””””’

     9

لە مناڵیمەوە ئەمەوێ

كەش و هەوایەکی نێرگس ئاسا

دروست کەم

     و

لە هەموو مێژووی کوردا

بۆ پێشوازی لە عاشقان

یەکەم “ئوتێل”ی خۆشەویستیم

دامەزران

هەموو جەنگەکانی نێوان ژن و پیاو

     و

نێوان کۆتر و ئەوانەی سەریان ئەبڕن

     و

نێوان بۆرەک و ئەوانەی سپێتی بۆرەک زامار ئەکەن

…….هەڵوەشانەوە

بەڵام ئوتێلەکەیان داخستم

ووتیان :

خۆشەویستی نا لایەقە

بە ڕابردووی کورد

     و

بە پاکێتی کورد

     و

بە میراتی کورد

” ئای لە سەیر وسەمەرەیی کورد….!!”

“”””””””””””

     10

ئەمەوێ شێوەی ووڵات

بێتە بەرچاوم

ئەمەوێ بچمە یەکەم شوێنم لای دایکم

     و

دژی ئاوی ڕۆژگار مەلە بکەم

    و

هەنجیر و قۆخ و گوێز بدزم

     و

وەک چۆلەکە بە داوی پاپۆڕەکانا بفڕم

ئەمەوێ بەهەشتی سەر ئەرز

بێنمە بەر چاوم….

     و

چۆن پشووم لە نێوان دەریا دانش بوەکان

     و

دەریاکانی ماست بەسەر بەرم

…..کاتێ هاتمەوە سەر خۆم

تێک شکانی خەوەکەم بۆ دەرکەوت..!!

لە ئاسمانی ئێمەیا مانگ نیە

    و

لە “سیروان” ماسی نیە

    و

لە بەهەشتی سەر ئەرز

……چا نیە

“”””””””’

     11

ئەمەوێ بە شیعر

دەست بەسەر مەحاڵا بگرم

     و

دارتوویەک  بچێنم

بەڵام لەم ووڵاتەی ئێمەیا

قژی دارتوو ئەبڕن

ئەمەوێ ئسسپی ئێرە بکەمە باشترین ئەسپ

بەڵام خەڵکی شار

لە ئەسپ ، بێزارن

“””””””””’

     12

خانمەکەم ؛

ئەمەوێ لە دەرەوەی هەموو کەش و هەوایەکا

لە دەرەوەی هەموو دەقێکا

     و

لە دەرەوەی هەموو شەریعەت و ڕژێمێکا

     خۆشم بوێ ی

بۆ هەچ مەنفایەک چووم

     خۆشم بۆێ ی

تا ڕۆژێک خستمیتە باوەشم

هەست کەم خۆڵی ووڵات

وا لە باوەشم

“””””””””’

     13

لە مناڵیمەوە ئەمەوێ

هەرچی کتێبێک دەربارەی:

پەیامبەری کورد ،

فەرمانڕەواکانی کورد ،

شاعیرانی کورد ، هەیە بخوێنمەوە

“زۆر بە دەگمەن نەبێ..!!”

تەنها ئەو قەسیدەیەم دی

كە لە پێناوی پاروویەک و چەن هەزارێ

قاچی”سولطان” ئەلێسنەوە

” ئای چەن سەیر و سەمەرەیە کورد..!!”

هەر خێڵم بینی کە جیاوازی

لە نێوان گۆشتی ژن و پیاوی بێ توک” کۆستە” ناکەن..!

هەر ئەو ڕۆژنامانەم دی

كە جلی ژێرەوەیان، بۆ هەموو سەرۆکێ

كە لە غەیبەوە هاتبێ

     و

هەر ئەفسەرێ بەسەر لاشەی

میللەتا بێت و بچێ

     و

هەر بازرگانێ بە ئاسانی ئاڵتون بخاتە سەر یەک

دانەکەنێ……

ئای چەن سەمەرەیە..!!

“””””””””””””

     14

پەنجا ساڵە سەیری  حاڵی کورد ئەکەم

ئەبن بە هەورە تریشقە…و

باران نابارێنن

ئەچنە شەڕەوە …و

هاتنە دەرەوە لێ ی  نابینن

“”””””””””’

     15

پەنجا ساڵە

ئەمەوێ وێنەی ووڵاتێک بکێشم

جارێک بە ڕەنگی دەمارەکان

    و

جارێک بە ڕەنگی “توڕەیی”

وێنەم کێشا ،

كە تەواو بوو ، لەخۆم پرسی:

گەر ڕۆژێک وەفاتی کوردیان ڕاگەیان

لە کام گۆڕستان ئەینێژن..؟

     و

کێ بۆی ئەگری..؟

    و

نە کوڕی هەیە ..نە کچ

نە هیچ غەم…!

     و

نە هیچ کەسێکی غەمبار

“””””””””

     16

لە سەرەتای شیعر نووسینمەوە

ئەمەوێ نێوانی خۆم و باپیرە گەورەکانم

……بپێوم

لەشکرم دی ، لەشکریش نەبوو

سەرکەوتنم دی ، سەرکەوتنیش نەبوو

     و

هەموو جەنگەکانم

لەسەر شاشەی تەلەفزیۆن دی

كوژراو لەسەر شاشە

زامار لەسەر شاشە

     و

لە خواوە سەرکەوتنێکمان بەڕێوەیە

….هەر لەسەر شاشە

“”””””””””

     17

ووڵاتەکەمیان کردوە

بە ئەڵقەی” دڕاما “ی ترس

هەموو ئێوارەیەک سەیری ئەکەین

گەر کارەبایان لێ بڕین

…..چۆنی ببینین!!

“””””””””

     18

دوای پەنجا ساڵ

ئەمەوێ ئەوەی دیومە ، تۆمار کەم

میللەتێکم دی پێ ی وایە :

پیاوانی “پاراستن”ی!! نیشتمان

وەک سەریەشە……

وەک هەڵامەت……

وەک سورێژە……

وەک کۆرونا …..

ئیرادەی خوایە..!

لە مەزاد خانە ، کوردایەتیم

بۆ زەم کردن بەسەرا  دی

بەڵام…

……كورد  خۆیم نەدی

“”””””””””””””

“””””””””””””’

(..ئەم شاکارەی نزار قبانی لەسەر چەوسانەوەی  عەربە لە

  لایەن دەسەڵاتدارەکانییەوە ، لە یەک چوونی ناوڕۆکی

قەسیدەکە لە گەڵ ڕابردووی ئێمە و ئەوەی ئەمڕۆ ئەگوزەرێ

بە چاکم زانی بە کەمە دەسەتکارییەکەوە بیکەم  بەکوردی

بە هەمان چێژ و ناوەڕۆکە ڕەسەنەکەی کە گوزارشت لەمڕۆی

خۆمان بکا… ).

پشکۆ ناکام ”  “

Previous
Next