Skip to Content

لێرە.. نەوزاد بەندی

لێرە.. نەوزاد بەندی

Closed
by ئه‌یلول 8, 2022 General, Poems

لێرە ..
هەر لە موچە و دامەزراندن ،
نائومێد نەبوون ..
لە پاییز‌ و ..
لە باران و ..
لە هەوریش نائومێدن خەڵک ..
کەس چاوەڕێی
گۆڕینی دەسەڵات و ..
ڕوخسارە پارە بەدەست و
بڕیاردارەکان ناکا ..
هەروەها کەس چاوەڕێی گۆڕانی کەش و هەوا و ..
لە پەنجەرەدانی نمەی باران و ..
گەڕانەوەی شنەی شەماڵ ناکا …

کەس ناپرسێ ئەم گرانییە چییە ..
بۆچی کوڕی موەلیدەکە دوو ئەوەندەی پار
پارە داوا ئەکا ..
بۆچی پلەی گەرما لە 40 دانابەزێ ..
بۆچی پەرلەمانتاری عەلمانی و ئیسلامیی کێبڕکێیانە لەسەر ژنی دووەم و سێیەم ؟

کەس تاقەتی نییە بپرسێ ، بۆچی ناوبازاڕ بۆگەنی کردووە .. بۆچی کە پۆتن قوفڵی غازەکە لە ئەوروپا ئەگرێتەوە ، دەسەڵاتی کوردییش بتڵە غازەکان لە خەڵک ئەشارێتەوە و .. کەسیش ناپرسێ ئەو هەموو بتڵەیان خستۆتە گۆڕی کام باوکیانەوە ؟؟

لێرە ..
کەس بەلایەوە گرنگ نییە ، گرگنێ دوو سەد هەزار ملیۆن ملیار دۆلار بدزێ و
ئێوارەیش لەسەر تەلەفزیۆن دەرکەوێ و بە دەم و فڵقێکی لارەوە بڵێ : ئیتر لەو خەڵکە قبوڵ ناکەم …

پاییز پاییز نییە ، ئارەزووی خۆیەتی ،
با بە گەرمای هاوین تێی پەڕێنێ ..وەک چۆن سەری مانگ ، بە گیرفانی بەتاڵەوە خۆی لە ڕۆژژمێرەکە ڕەش ئەکاتەوە و ..کەسیش پێی ناڵێ : ئەرێ ڕۆڵە ! موچەکانت چی لێ کرد ؟ پشەکە خواردی یان لێت کەوت یان لە گوزەری کەوفرۆشان لێیان دزیت ؟

بڕوام وایە ، ئەمساڵ مەلاکانیش تاقەتی نوێژەبارانەیان نییە .. ئیتر ئەوانیش ئەزانن ئەم مەخلوقاتە شایانی باران نین .. حەق وایە وەک قەوزە وشک بنەوە و ..کۆمپانیایەکی ئەمەریکیی ، لەسەر پاپۆڕێک بیانکا بە جگەرە …
بڕوام وایه ، ماوەیەکی تر ، ووتاربێژەکانیش تاقەتی ووتاردانیان نامێنێ ، شەرمەزار ئەبن لەو هەموو هاوارەی کردیان ..لەو هەموو نەڕە نەڕە .. لەو هەموو ئایەتەی کە دیزە بە دەرخۆنەیان کرد و .. ئەوەندە باسی ئایەتی دەسنوێژیان کرد ، کارێزی مزگەوت وشکی کرد .. ئەوەندە ئایەتی جیهادیان شاردەوە ، غیرەت لە عیبا بەشەرا نەما …
بڕوام وایە لێرە توخمی مرۆڤ نەماوە .. ئەمانەی تۆ ئەیبینی ، کۆمەڵێ غازاتی ناوسکی ئێران و تورکیا و ڕوسیا و ئەمەریکان ..کەم کەم بە تاڵ ئەبنەوە و..کەم کەمیش پڕ ئەبنەوە ..ئەگینا نە مردن له گۆڕێدایه و .. نە له دایک بوون ..
ئیتر باران چۆن بۆ غازات ئەبارێ ؟
هەور کاری بە غازات چیە ؟
غازات چۆن ئەچێتە بەهەشتەوە ؟؟
…………………..هتد …….

ـــــ نەوزاد بەندی ـــــــــــــــــــــــــــــــــ

Previous
Next
Kurdish