Skip to Content

شیعرێکی کۆن:.. هەوڵدان بۆ پێناسەکردن.. نەوزاد بەندی

شیعرێکی کۆن:.. هەوڵدان بۆ پێناسەکردن.. نەوزاد بەندی

Closed
by September 14, 2022 General, Poems

وڵاتەکەمان پڕە لە وڵات
پڕین لە ملیاردێر و ملیۆنێر و سواڵکەر
نەخۆشخانە حکومیەکانمان خاڵین لە دەرمان و…دەرەوەی نەخۆشخانەکانمان فول فول لە دەرمان .
هەواکەمان پڕە لە خۆڵ و دوکەڵ
زانکۆ ئاست نزمەکانمان پڕن لە پڕۆفیسۆری لووت بەرز
پەیوەندییەکانمان پڕن لە شەڕ
دیوارەکانمان پڕن لە درز
کاتەکانمان هەمووی بێ سوود ئەڕۆن
گیرفانەکانمان پڕن لەدز
شەقامەکانمان پڕن لە تاسە
نوسینەکانمان پڕن لە هەڵەی چاپ وڕێزمانی
بیرکردنەوەمان پڕن لە هێرش بۆ بیرکردنەوەکانی تر
بازاڕەکانمان پڕن لە عەرەبانە
کۆڵانەکانمان پڕن لە ساحیر و نوشتە نوس و مشایەخ
گۆڕستانەکانمان هەر گۆڕەی جۆرێکە ، چونکە کەسمان لەکەسمان ناچین ..
نەوتەکەمان پڕە لە قەرز
یاساکانمان پڕن لە بێ یاسایی
خاشاکەکانمان پڕن لە خۆراک
مزگەوتەکانمان پڕن لە سواڵکەر
بازاڕەکانمان هەمووی کاڵای تورکی و ئێرانیە و ئەیشڵێن هەردووکیان هۆکاری شێرپەنجەن
شارەکانمان پڕن لە کۆمپانیای وەهمی
پارەکانمان پڕن لە چاپ و تەزویر
دەوڵەمەندەکانمان پڕن لە برسێتی
هەژارەکانمان پڕن لە تەمەڵیی
خواناسەکانمان پڕن لە تقوسی دینی
بێدینەکانمان پڕن لە جنێو و جووتە وەشاندن
بیست و یەک ساڵە ئابڵوقەی ئابووریمان لەسەر هەڵگیراوە ، کەچی هەر نەوتەکەمان بەشێکی بۆ نەوت بەرامبەر بە ئاردێکی بێ کەڵک ، ئەڕوات
سەد ساڵە خەبات ئەکەین ، هێشتا نازانین کێ یارمانە و کێ نەیارمانە ..
گەر خوا دۆعاکانمان قول بکا ، وڵاتەکەمان وێران ئەبێ و یەک کەسی بە زیندوێتی تیا نامێنێتەوە .
نە حوکمەت نەخەڵک ناپرسن ئێمەی وڵاتێکی نەوتیی ، هەتا کەی پارەکەمان چاپی بریمەر بێت و لە بازاڕەکانی جیهاندا سفر بێت؟ ئایا شایانی پارەی ستاندەری سویسریی نین؟

٭٭٭٭٭٭٭٭٭٭٭٭٭ ٭٭٭٭٭٭٭٭٭٭٭٭٭٭ ٭٭٭٭٭٭٭٭٭٭٭٭٭٭
(وەک بە کاری ژیان نەما بین ، وایە )

چونکە
مرۆڤەکان کۆڵیان داوە لە مرۆڤایەتیی و پێکەوەژیان و بەرژەوەندیی گشتی و نەتەوەیی و نیشتمانیی…تەنها و تەنها سەرقاڵی خۆیان و پڕۆژە و بەرژەوەندی تاکە کەسیی خۆیانن ..
هەر بۆیه ئەگەر کەسێک نانێ بداتە هەژارێ ، دەپانزە کامێرا وێنەی دەگرن ..کەسێ قومێ ئاو بداتە پشیلەیەک ، دە دوانزه کەناڵی ڕاگەیاندن باسی دەکەن ..کەسێ مزگەوتێ دروست بکات ، لەسەر تابلۆیەکی گەورە ناوی خۆی دەنوسێ ، لە ئایەتەکانی قورئان گەورەتر ..
هەر کەسێ ئەرکی سەرشانی خۆی جێبەجێ بکا ، چاوەڕێی چەپڵە و سوپاس و پێزانینە ..

نەوزاد بەندی

Previous
Next