بۆمباکانی ئەمریکا و ماروپەیژەکەی ئیسرائیل و ئێران.. شوان عەباس بەدری
مەعقولە من لێرەوە ئەزانم خامنەیی لەئەگەری تیرۆرکردنی لەلایەن ئەمریکا و ئیسرائیلەوە لاریجانی وەک جێگرەوەی یەکەمی خۆی دیاریکردبوو و هەروەها لە ئەگەری کوژرانی فەرماندە سەربازییەکانی رژێمەکەی بۆ هەر فەرماندەیەک سێ تا چوار جێگرەوەی دەستنیشانکردبوو و هەروەها بە ئاشکرا رایگەیاندبوو، گەر هێرشمان بکەنەوە سەر ئەوا یەک وڵاتی ناوچەکە و بەتایبەتیش وڵاتانی کەنداو سەقامگیری بەخۆیانەوە نابینن، ئەمە جگە لەوەی سیستمی سیاسی و سەربازی و بەرێوەبردنی ئێران سیستمێکی جاڵجاڵۆکەیی ئاڵۆزە و هەروا بە ئاسانی لەبەر یەک هەڵناوەشێتەوە کەچی ئەمریکا و ئیسرائیل ئەو شتانە نەزانن!
هەرچەندە جەنگەکەی ئەمجارە زیاتر لە جەنگی یارییە ئەلیکترۆنییەکانی پلەیستەیشن دەچێت و دیارە کە نە ئەمریکا و نە ئیسرائیل بە تەواوی هێزی وێرانکەری خۆیان دژ بە ئێران بەکار نەهێناوە و زۆربەی خەڵک پێی وایە ئەمریکا و ئیسرائیل لە هێرشەکانیان بۆ سەر ئێران شکستیان هێناوە بەڵام هەروەک لە نووسینەکانی پێشوومدا ئاماژەم پێداوە گەر بەوردی لە جەنگەکە و رووداوەکان و پێشهاتەکانی جەنگەکە بڕوانین ئەوا دەبینین بە پێچەوانەوە هەر سێ وڵاتی بە جەنگ هاتوو واتە ئەمریکا و ئیسرائیل و ئێران رێک ئامانجەکانیان پێکاوە و لەلایەکەوە وڵاتانی کەنداو زیاتر دەستەمۆی ئەمریکای فریادڕەس و پارێزەریان بوون و لەلایەکیشەوە ئیسرائیل وڵاتانی ناوچەکەی تێگەیاند گەر ڕێکەوتنی لەگەڵ نەکەن و تاجی بەرێوەبردنی ناوچەکەی نەکەنە سەر ئەوا چارەنووسی ئێران چاوەڕێیان دەکات کە بێگومان ئەو وڵاتانە بەرگەی دوو مووشەک و فرۆکەیەکی سەربازی ئیسرائیلی ناگرن و هەروەها ئێرانیش بۆ وڵاتانی ناوچەکە و جیهانی سەلماند کە پاروویەکی هەروا ئاسان نییە و بە سانایی قووت نادرێت و بێگومان لە دوای کۆتایی هاتنی جەنگەکە ئێرانێکی هەژدیها ئاسای بریندار دەبینین کە لە یەک کاتدا هەم خەریکی سارێژکردنی برینەکانی دەبێت و هەم دەبێت بە دێوەزمەیەک بۆ وڵاتانی کەنداو !
لێرەشدا پرسیارێک لەناو مێشکماندا درووست دەبێت کە ئاخۆ دواجار لە نێوان بۆمباکانی ئەمریکا و ماروپەیژەکەی ئیسرائیل و ئێران پێگەی وڵاتانی کەنداو دەکەوێتە کوێوە؟
پرسیارێکە و وەڵامەکەی بۆ خوێنەر بە جێ دەهێڵم .
